കോഴിക്കോട്: പവിത്രനും ഭാര്യ ശ്രീജയും രാവിലെ വീട്ടില്‍ നിന്ന് ഒന്നിച്ച് പ്രചാരണത്തിനിറങ്ങും. ഇരുവരും എന്‍ഡിഎ സ്ഥാനാര്‍ത്ഥികള്‍. പവിത്രന്‍ ആലംമ്പറ്റ് ഫറോക്ക് മുന്‍സിപ്പാലിറ്റിയിലെ 34-ാം വാര്‍ഡ് ചേനംപറമ്പിലാണ് മത്സരിക്കുന്നത്. ഭാര്യ ശ്രീജ പവിത്രന്‍ ഫറോക്ക് ടൗണിലെ അഞ്ചാം വാര്‍ഡിലും. ഫറോക്കും മാറും എന്ന കാര്യത്തില്‍ ഇരുവര്‍ക്കും ഉറപ്പുണ്ട്. നാട്ടുകാരുടെ പിന്തുണയില്‍ നിന്നുള്ള ആത്മവിശ്വാസത്തിലാണ് ഇരുവരും.
ശ്രീജയുടെ മൂന്നാം അങ്കമാണിത്. രണ്ട് തവണയും ഫറോക്ക് നഗരസഭയിലേക്ക് മത്സരിച്ചു. 2020ല്‍ കരുവന്തിരുത്തി മൂന്നാം വാര്‍ഡില്‍ 35 വോട്ടിനാണ് പരാജയപ്പെട്ടത്. കന്നിയങ്കത്തിന് ഇറങ്ങുന്ന പവിത്രന്‍ ബിജെപി ഏരിയ പ്രസിഡന്റാണ്. 2020 ല്‍ എന്‍ഡിഎക്ക് ആറ് വോട്ടിന് നഷ്ടമായ 34-ാം വാര്‍ഡ് തിരിച്ചു പിടിക്കാനുള്ള തിരക്കിട്ട പ്രവര്‍ത്തനത്തിലാണ് പവിത്രന്‍. സഹൃദയ റസിഡന്‍സ് അസോസിയേഷന്‍ പ്രസിഡന്റ് എന്ന നിലയില്‍ വോട്ടര്‍മാര്‍ക്ക് ഏറെ സുപരിചിതനാണ്. ഫറോക്കില്‍ ടെക്‌നോ വിഷന്‍ കമ്പ്യൂട്ടര്‍ ഡിസൈനിംങ്ങ് സെന്ററിന്റെ ഉടമകളാണ് ഈ ദമ്പതികള്‍. ഫറോക്ക് മുന്‍സിപ്പാലിറ്റിയില്‍ ബിജെപിക്ക് നിലവില്‍ ഒരംഗമാണുള്ളത്. കഴിഞ്ഞ തെരഞ്ഞെടുപ്പില്‍ ചുരുങ്ങിയ വോട്ടിന് പരാജയപ്പെട്ട സീറ്റുകളില്‍ വിജയം ഉറപ്പിച്ചാല്‍ ഇത്തവണ നിര്‍ണായക ശക്തിയായി ബിജെപി മാറും. അതില്‍ രണ്ടു വാര്‍ഡുകള്‍ തങ്ങളുടേതായിരിക്കുമെന്നു പറയുന്നു പവിത്രനും ശ്രീജയും.
ജന്മഭൂമി ഓണ്‍ലൈന്‍