ന്യൂദല്ഹി: ദല്ഹി ഭീകരാക്രമണം നടത്തിയ ഭീകരര് ഗൂഢാലോചന നടത്തിയത് കോഡ് ഭാഷയില്. പാക് ഭീകരസംഘടനയായ ജെയ്ഷെ മുഹമ്മദിന്റെ വനിതാ വിഭാഗം നേതാവായ ഡോ. ഷഹീന് ഷാഹിദും കൂട്ടാളികളും തമ്മിലുള്ള ചാറ്റുകള് പുറത്തായതോടെയാണ് ഇവര് കോഡ് ഭാഷയിലൂടെ ആശയവിനിമയം നടത്തിയിരുന്നതെന്ന് കണ്ടെത്തിയത്. സ്ഫോടകവസ്തുക്കള്ക്ക് മരുന്ന് എന്ന കോഡ് ഭാഷയാണ് ഇവര് ഉപയോഗിച്ചിരുന്നതെന്നും കണ്ടെത്തി.
ഭീകരവാദ ശൃംഖലയിലെ കൂട്ടാളികള്ക്കിടയില് ഡോ. ഷഹീന് മാഡം സര്ജന് എന്ന പേരിലുമാണ് അറിയപ്പെട്ടിരുന്നത്. ഇവരുമായി ബന്ധമുള്ള ചിലരുടെ നമ്പറുകളും അന്വേഷണസംഘം കണ്ടെടുത്തു.
മാഡം എക്സ്, മാഡം ഇസഡ് എന്നീ പേരുകളില് സേവ് ചെയ്ത രണ്ടു നമ്പറുകളിലേക്ക് ഷഹീന് നിരന്തരം സന്ദേശമയച്ചിരുന്നു. ഈ നമ്പറുകളില് നിന്ന് ഷഹീന് തിരിച്ചും സന്ദേശങ്ങളും ഫോണ്കോളുകളും വന്നിരുന്നു. ഈ രണ്ട് കോണ്ടാക്ടുകള്ക്കും ഷഹീന്റെ ഫോണില് ഡിസ്പ്ലേ ചിത്രം ഉണ്ടായിരുന്നില്ല.
മാഡം എക്സ്, മാഡം ഇസഡ് എന്നിവരുമായുള്ള ചാറ്റുകളില് മരുന്ന് എന്ന വാക്ക് ആവര്ത്തിച്ച് ഉപയോഗിച്ചിരുന്നതായാണ് കണ്ടെത്തല്. ഓപ്പറേഷന് ഒരിക്കലും മരുന്ന് കുറയരുത് എന്നായിരുന്നു ഒരു സന്ദേശം. ഓപ്പറേഷനില് കൂടുതല് ശ്രദ്ധ കൊടുക്കണമെന്ന് മറ്റൊരു സന്ദേശത്തില് പറയുന്നു. മാഡം ഇസഡ് എന്ന പേരില് സേവ് ചെയ്തിരുന്ന നമ്പറില് നിന്നാണ് ഈ സന്ദേശം എത്തിയത്. ജെയ്ഷെയിലേക്ക് സ്ത്രീകളെ റിക്രൂട്ട് ചെയ്യുന്നതിനെയാണ് ‘ഓപ്പറേഷന് ഹംദാര്ദ്’ എന്ന പേരുകൊണ്ട് ഉദ്ദേശിച്ചതെന്നും റിപ്പോര്ട്ടുകളില് പറയുന്നു.
ഇത്തരത്തില് ചില നിര്ണായക വിവരങ്ങള് ഇവര് പങ്കുവച്ചിട്ടുണ്ടെന്നാണ് അന്വേഷണ സംഘത്തിന് ലഭിക്കുന്ന വിവരം.
