പട്ന: എന്‍ഡിഎ സഖ്യം മഹാവിജയം നേടിയ ബീഹാറില്‍ പുതിയ സര്‍ക്കാര്‍ രൂപീകരണ ചര്‍ച്ചകള്‍ പുരോഗമിക്കുന്നു. മുഖ്യമന്ത്രി നിതീഷ് കുമാര്‍ ഇന്ന് രാവിലെ മന്ത്രിസഭാ യോഗം വിളിച്ചിട്ടുണ്ട്.
മന്ത്രിസഭാ യോഗത്തില്‍ നിലവിലെ മന്ത്രിസഭ പിരിച്ചുവിടാനുള്ള തീരുമാനം അംഗീകരിക്കും. നിതീഷ്‌കുമാര്‍ രാജ്ഭവനില്‍ എത്തി ഗവര്‍ണര്‍ ആരിഫ് മുഹമ്മദ് ഖാന് രാജി സമര്‍പ്പിക്കും. പുതിയ മന്ത്രിസഭ രൂപീകരിക്കുന്നതുവരെ നിതീഷ് കുമാറിനോട് കാവല്‍ മുഖ്യമന്ത്രിയായി തുടരാന്‍ ഗവര്‍ണര്‍ ആവശ്യപ്പെടും.
ബിജെപി നിയമസഭാകക്ഷി യോഗം നാളെ പട്നയില്‍ ചേരുമെന്ന വാര്‍ത്തകളും പുറത്തുവരുന്നുണ്ട്. പുതിയ സര്‍ക്കാരിന്റെ സത്യപ്രതിജ്ഞാ ചടങ്ങിനുള്ള ഒരുക്കങ്ങള്‍ പട്നയിലെ ഗാന്ധി മൈതാനത്ത് ആരംഭിച്ചു. ഇതിന്റെ ഭാഗമായി ഈ മാസം 20 വരെ ഗ്രൗണ്ട് അടച്ചിട്ടിരിക്കുകയാണ്.
മുന്‍മുഖ്യമന്ത്രിയും ആര്‍ജെഡി നേതാവുമായ ലാലു പ്രസാദ് യാദവിന്റെ മകനും മുന്‍ ഉപമുഖ്യമന്ത്രിയുമായ തേജസ്വി യാദവിന്റെ സഹോദരന്‍ തേജ് പ്രതാപ് യാദവിന്റെ പാര്‍ട്ടിയായ ജനശക്തി ജനതാദള്‍ (ജെജെഡി) എന്‍ഡിഎയെ പിന്തുണയ്‌ക്കും.
എന്‍ഡിഎ സര്‍ക്കാരിന് ധാര്‍മിക പിന്തുണ നല്‍കുമെന്ന് പാര്‍ട്ടി അറിയിച്ചു. ആര്‍ജെഡി വിട്ട ലാലുപ്രസാദിന്റെ മകള്‍ രോഹിണി ആചാര്യയെ പാര്‍ട്ടിയുടെ ദേശീയ ചുമതല ഏറ്റെടുക്കാന്‍ ക്ഷണിക്കുമെന്നും പാര്‍ട്ടി വക്താവ് അറിയിച്ചു.
