കാട്ടാക്കട: സംസ്ഥാന ഭാഗ്യക്കുറിയുടെ ഭാഗ്യധാരാ രണ്ടാം സമ്മാനമായ 30 ലക്ഷം രൂപ കാട്ടാക്കട സ്വദേശിയായ പൂക്കെട്ട് തൊഴിലാളി സുനില്‍കുമാറിന്. തിങ്കളാഴ്ച നറുക്കെടുത്ത ഭാഗ്യധാരയുടെ ഒരുകോടി ഭാഗ്യക്കുറിയുടെ രണ്ടാം സമ്മാനമാണ് കാട്ടാക്കട അഞ്ചുതങ്ങിന്മൂട് മണ്ണാകോണം റോസ് നിവാസില്‍ വാടകയ്‌ക്ക് താമസിക്കുന്ന സുനില്‍ കുമാറിന് ലഭിച്ചത്.
കാട്ടാക്കടയില്‍ കെഎസ്ആര്‍ടിസി ബസ് ഡിപ്പോക്ക് എതിര്‍വശത്തുള്ള ഷാജി ദാസിന്റെ ഉടമസ്ഥതയിലുള്ള റോജ ഫ്ലവറില്‍ 15 വര്‍ഷമായി പൂ കെട്ടുന്ന ജോലി ചെയ്തു വരികയാണ് സുനില്‍കുമാര്‍. ആറുമാസത്തിന് മുന്‍പാണ് ലോട്ടറി ടിക്കറ്റ് എടുക്കുന്ന ശീലം തുടങ്ങിയത്. ആദ്യം ഒന്നും രണ്ടും ടിക്കറ്റ് എടുത്തു തുടങ്ങി. ഇപ്പോള്‍ ദിവസം 3 ടിക്കറ്റ് വരെ എടുക്കുമെന്ന് സുനില്‍കുമാര്‍ പറയുന്നു.
500 രൂപയുടെ ഒരു സമ്മാനം മാത്രമാണ് ഇതിന് മുന്‍പ് സുനില്‍കുമാറിന് ലഭിച്ചിട്ടുള്ളത്. ഇന്ത്യന്‍ ബാങ്ക് കാട്ടാക്കട ശാഖയില്‍ ലോട്ടറി ടിക്കറ്റ് ഏല്‍പ്പിച്ചതായി സുനില്‍ പറഞ്ഞു. തൊഴിലുറപ്പ് തൊഴിലാളിയായ സൗമ്യയാണ് ഭാര്യ. മക്കള്‍: രേണുക, അതുല്‍. സ്വന്തമായി ഭൂമി എന്ന സ്വപ്‌നം കണ്ടിരിക്കുമ്പോഴാണ് ഭാഗ്യം കടാക്ഷിച്ചത്. ഈ തുകക്ക് ഭൂമി വാങ്ങി വീട് പണിയണമെന്നാണ് ആഗ്രഹമെന്ന് സുനില്‍ പറഞ്ഞു.
