പാലക്കാട്: ദിവ്യ നെയ്യുന്നത് ഒരു കൂട്ടം സ്വപ്നങ്ങളാണ്. ഹയര്സെന്ഡറി വിഭാഗം പ്രവൃത്തിപരിചയമേളയില് മുളകൊണ്ടുള്ള ഉത്പന്ന നിര്മാണ മത്സരത്തില് പങ്കെടുക്കാനെത്തിയതായിരുന്നു പാലക്കാട് അഗളി ജിഎച്ച്എസ്എസിലെ പി.സി. ദിവ്യ. എന്നാല്, അധികനേരം നിലത്തിരുന്ന് ചെയ്യാന് ദിവ്യക്ക് കഴിഞ്ഞില്ല. വെപ്പ് കാലുവച്ച് അധികനേരം ഇരിക്കാന് കഴിയാത്ത അവസ്ഥയിലായിരുന്നു. ആരോടും ഒന്നും പറഞ്ഞില്ല. കടുത്ത വേദനക്കിടെയിലും നാലിനങ്ങള് നിര്മിച്ചു.
ഒന്നാംക്ലാസില് പഠിക്കുമ്പോഴാണ് വിധിയുടെ രൂപത്തിലെത്തിയ കെഎസ്ആര്ടിസി ദിവ്യയുടെ ജീവിതം മാറ്റിമറിച്ചത്. സ്കൂള് വിട്ട് വീട്ടിലേക്ക് പോകുമ്പോള് റോഡ് മുറിച്ചുകടക്കുന്നതിനിടെ കെഎസ്ആര്ടിസി ഇടിക്കുകയായിരുന്നു. അപകടത്തെ തുടര്ന്ന് വലതു കാല് മുട്ടിന് താഴെ മുറിച്ചുമാറ്റി. പിന്നീട് ആശുപത്രി കയറിയിറങ്ങുക മാത്രമായി. പഠനം മുടങ്ങി. തുടര്ന്ന് നാലാംക്ലാസിലാണ് സ്കൂളിലേക്ക് പോകുന്നത്. അമ്മൂമ്മയും അപ്പൂപ്പനുമാണ് മുളകൊണ്ടുള്ള സാധനങ്ങള് ഉണ്ടാക്കാന് പഠിപ്പിച്ചത്. എട്ടാംക്ലാസുമുതല് വിവിധ മത്സരങ്ങളില് പങ്കെടുത്ത് സമ്മാനം നേടി. കഴിഞ്ഞവര്ഷം സംസ്ഥാന ശാസ്ത്രോത്സവത്തില് നാലാംസ്ഥാനം ലഭിച്ചിരുന്നു. അച്ഛന് ചന്ദ്രനും അമ്മ കുമാരിയും ചായക്കട നടത്തുകയാണ്.
