നാൻജിങ് ; ചൊറിച്ചിലിന് ഓൺലൈനിൽ നിന്ന് വാങ്ങിയ സ്കിൻ ക്രീം ഉപയോഗിച്ച സ്ത്രീയ്‌ക്ക് ഗുരുതര ആരോഗ്യപ്രശ്നങ്ങൾ ഉണ്ടായതായി റിപ്പോർട്ട് . ‘ചൈനീസ് പരമ്പരാഗത മരുന്ന്’ എന്ന് അവകാശപ്പെട്ട സ്കിൻ ക്രീം തുടർച്ചയായി 10 വർഷം ഉപയോഗിച്ച 40 വയസ്സുള്ള സ്ത്രീയുടേ ശരീരത്തിൽ പാമ്പിന്റെ ചർമ്മത്തിന് സമാനമായ രീതിയിൽ പർപ്പിൾ-ചുവപ്പ് നിറത്തിലുള്ള വിള്ളലുകൾ പ്രത്യക്ഷപ്പെട്ടിട്ടുണ്ട്. കഴിഞ്ഞ മാസം ഇവരെ നാൻജിങ്ങിലെ സോങ്ഡ ആശുപത്രിയിൽ പ്രവേശിപ്പിച്ചിരുന്നു.
പത്ത് വർഷം മുൻപ് വലത് കാലിൽ ചുവന്ന പാടുകളും ചൊറിച്ചിലും ഉണ്ടായതിനെ തുടർന്നാണ് വനിത ക്രീം ഉപയോഗിക്കാൻ തുടങ്ങിയത്. കൃത്യമായ വൈദ്യസഹായം തേടുന്നതിനുപകരം, ‘എല്ലാത്തരം ചർമ്മരോഗങ്ങളും സുഖപ്പെടുത്താൻ കഴിയുന്ന ശുദ്ധമായ പരമ്പരാഗത ചൈനീസ് മരുന്നാണ്’ എന്ന് ഓൺലൈനിൽ അവകാശപ്പെട്ട ക്രീമാണ് ഇവർ വാങ്ങിയത്. പത്ത് വർഷത്തോളം തുടർച്ചയായി ക്രീം ഉപയോഗിക്കുകയും ചെയ്തു.
‘ആദ്യം ഇത് ഉപയോഗിച്ചപ്പോൾ, ചൊറിച്ചിൽ നന്നായി കുറഞ്ഞിരുന്നു. ഇത് ശരിയായ മരുന്നാണെന്ന് വിശ്വസിച്ചു’ –ദുരനുഭവം നേരിട്ട 40 വയസ്സുകാരി പറഞ്ഞു. എന്നാൽ, അടുത്തിടെ വലിയ തോതിലുള്ള ആരോഗ്യ പ്രശ്നങ്ങൾ അനുഭവപ്പെടുകയായിരുന്നു. ശരീരമാകെ പാമ്പിനെപ്പോലെ പർപ്പിൾ-ചുവപ്പ് വിള്ളലുകൾ പ്രത്യക്ഷപ്പെട്ടു. ഇതോടൊപ്പം പല അവയവങ്ങളിലും വീക്കം, ഓക്കാനം, ഛർദ്ദി, കൈകളിലെ മരവിപ്പ് തുടങ്ങിയ മറ്റ് ലക്ഷണങ്ങളും അനുഭവപ്പെടാൻ തുടങ്ങിയതോടെ ക്രീമിന് പാർശ്വഫലമുണ്ടെന്ന് തിരിച്ചറിഞ്ഞു.
ആശുപത്രിയിൽ നടത്തിയ പരിശോധനയിൽ, ഇവരുടെ ശരീരത്തിൽ കോർട്ടിസോളിന്റെ അളവ് ഗണ്യമായി കുറവാണെന്ന് കണ്ടെത്തി.പിറ്റ്യൂട്ടറി ഗ്രന്ഥി ആവശ്യത്തിന് ഹോർമോണുകൾ (കോർട്ടിസോൾ പോലുള്ളവ) പുറത്തുവിടാത്തതിനാലാണ് ഈ അവസ്ഥയുണ്ടായത്.
ഓൺലൈനിൽ വിൽക്കുന്ന ‘ഹോർമോൺ രഹിത’ ഹെർബൽ ക്രീമുകളിൽ കൂടിയ അളവിൽ സ്റ്റിറോയിഡുകൾ അടങ്ങിയിരിക്കുന്നുണ്ട് .ചൊറിച്ചിലിന് സ്റ്റിറോയിഡുകൾ പെട്ടെന്ന് ആശ്വാസം നൽകുമെങ്കിലും, ദീർഘകാല ഉപയോഗം ചർമ്മത്തിന് പ്രശ്നങ്ങൾ സൃഷ്ടിക്കും. സ്റ്റിറോയിഡുകൾ ചർമ്മത്തിലൂടെ ആഗിരണം ചെയ്യപ്പെടുകയും കാലക്രമേണ ശരീരത്തിൽ അടിഞ്ഞുകൂടി അഡ്രിനൽ പ്രവർത്തനത്തെ അടിച്ചമർത്തുകയും പരിഹാരമില്ലാത്ത ആരോഗ്യപ്രശ്നങ്ങൾക്ക് കാരണമാകുകയും ചെയ്യും. ചർമ്മ മരുന്നുകൾ, പ്രത്യേകിച്ച് ഹോർമോൺ അടിസ്ഥാനമാക്കിയുള്ളവ, ഡോക്ടറുടെ മേൽനോട്ടത്തിൽ മാത്രമേ ഉപയോഗിക്കാവൂ .
