കൊച്ചി: വ്യാജ ഫേസ്ബുക്ക് പ്രൊഫൈലുകൾക്കെതിരെ നടി സംയുക്ത വർമ. തന്റെ പേരിൽ നിരവധി വ്യാജ അക്കൗണ്ടുകൾ ശ്രദ്ധയിൽപ്പെട്ടതായി നടി പറയുന്നു. വഞ്ചിക്കപ്പെടാൻ സാധ്യതയുണ്ടെന്നും ജാഗ്രത പാലിക്കണമെന്നും നടി ആരാധകരെ ഓർമപ്പെടുത്തി.
“ഒരു പ്രധാനപ്പെട്ട കാര്യം പറയാനാണ് ഈ വീഡിയോ ഇപ്പോൾ പങ്കുവയ്‌ക്കുന്നത്.
സംയുക്ത വർമ എന്ന പേരില്‍ ബ്ലൂ ടിക്കോട് കൂടിയ ഇന്‍സ്റ്റഗ്രാം അക്കൗണ്ട് മാത്രമാണ് ഞാൻ കൈകാര്യം ചെയ്യുന്നത്. അല്ലാതെയുള്ള ഒരു സമൂഹ മാധ്യമങ്ങളിലും ഞാന്‍ സജീവമല്ല. സംയുക്ത വർമ എന്ന പേരിൽ ഫേസ്ബുക്കിൽ തുടങ്ങിയിട്ടുള്ള ഒരു അക്കൗണ്ടും എന്റെ അനുവാദത്തോടു കൂടിയോ സമ്മതത്തോട് കൂടിയോ അറിവോട് കൂടിയോ തുടങ്ങിയിട്ടുള്ളതല്ല. ഒരുപാട് പേര് അത് ഞാന്‍ ആണെന്ന് തെറ്റിദ്ധരിച്ച് പേഴ്സണൽ മെസേജ് അയയ്‌ക്കുന്നുണ്ട്, ഫോളോ ചെയ്യുന്നുണ്ട്. ഇന്നത്തെ കാലഘട്ടം ഒരുപാട് തട്ടിപ്പുകൾ നടക്കുന്നതാണ്. ശ്രദ്ധിക്കുക,” സംയുക്ത വർമ പറയുന്നു. നടനും പങ്കാളിയുമായ ബിജു മേനോന്റെ ഫേസ്ബുക്ക് പേജിലൂടെയാണ് ഇക്കാര്യങ്ങള്‍ വിശദീകരിക്കുന്ന വീഡിയോ നടി പങ്കുവച്ചത്.
സംയുക്ത വർമ എന്ന പേരിൽ സമൂഹമാധ്യമങ്ങളിൽ നിരവധി വ്യാജ പ്രൊഫൈലുകള്‍ ഉണ്ടാകുന്നുണ്ട്. പല അക്കൗണ്ടുകള്‍ക്കും ലക്ഷക്കണക്കിന് ഫോളോവേഴ്സ് ആണ് ഉള്ളത്. ഈ സാഹചര്യത്തിലാണ് നടി രംഗത്തെത്തിയത്.
സമ്മാനപദ്ധതിയെന്ന പേരില്‍ സോഷ്യല്‍ മീഡിയയില്‍ തന്റെ പേരും ഫോട്ടോയും വച്ച് തട്ടിപ്പ് നടക്കുന്നതായും ഇത്തരം ലിങ്കുകളില്‍ ക്ലിക്ക് ചെയ്യരുതെന്നും അഭ്യര്‍ത്ഥിച്ച് ഗിന്നസ് പക്രു കഴിഞ്ഞദിവസം വീഡിയോ ചെയ്തിരുന്നു. ‘അടുത്ത കാലത്ത് സോഷ്യല്‍ മീഡിയയില്‍ എന്റെ പേര് വച്ച് സാമ്പത്തിക തട്ടിപ്പ് നടക്കുന്നു
നിങ്ങളെ വിജയിയായി തിരഞ്ഞെടുത്തു എന്നും അഭിനന്ദങ്ങള്‍ എന്നും പറഞ്ഞാണ് സന്ദേശം വരുന്നത്. നിര്‍ദേശങ്ങള്‍ പാലിക്കുക, ഇവിടെ രജിസ്റ്റര്‍ ചെയ്യുക എന്ന് പറഞ്ഞ് ഒരു ലിങ്കും കൊടുത്തിട്ടുണ്ട്. ഇതെന്ത് സംഭവമാണെന്ന് എനിക്ക് അറിയില്ല. ഇത് ആരോ തട്ടിപ്പിന് വേണ്ടി ഉപയോഗിക്കുന്ന ലിങ്കും കാര്യങ്ങളുമാണ്. എന്റെ പേരും ചിത്രവും കൊടുത്ത് ഒരു സൈറ്റ് ഉണ്ടാക്കിയിട്ടുണ്ട്. വെല്‍കം ടും ഗിന്നസ് പക്രു എന്നാണ് ഇതില്‍ എഴുതിയിരിക്കുന്നത്. ഇത് കൃത്യമായ സാമ്പത്തിക തട്ടിപ്പാണ്. ആരും ഇതില്‍ ചെന്ന് പെടരുത്. എനിക്ക് യാതൊരു വിധ സമ്മാനപദ്ധതികളോ സോഷ്യല്‍ മീഡിയ വഴിയുള്ള സാമ്പത്തിക ഇടപാടുകളോ ഒന്നുമില്ല, ദയവ് ചെയ്ത് എല്ലാവരും ശ്രദ്ധിക്കണമെന്നും’ ഗിന്നസ് പക്രു സോഷ്യല്‍മീഡിയിയില്‍ പങ്കുവച്ച വീഡിയോയില്‍ പറഞ്ഞു.
