തിരുവനന്തപുരം: മിതമായ നിരക്കില് കൂടുതല് സാങ്കേതിക മികവിലൂടെ സുരക്ഷിത യാത്രയൊരുക്കാന് ‘കേരള സവാരി 2.0’ ആപ്പ്. സര്ക്കാര് നടപ്പാക്കിയ ഓണ്ലൈന് ഓട്ടോ/ ടാക്സി പ്ലാറ്റ്ഫോമായ കേരള സവാരി അതിന്റെ ടു പോയിന്റ് ഒ പതിപ്പിലൂടെ വീണ്ടും പ്രവര്ത്തനം ആരംഭിക്കുകയാണ്. ഡിസംബറോടെ കേരള സവാരി ഒരു മള്ട്ടി മോഡല് ഗതാഗത സംവിധാന ആപ്പായി മാറും. തിരുവനന്തപുരത്തേയും കൊച്ചിയിലേയും പൂര്ണ്ണമായ പ്രവര്ത്തനത്തിന് ശേഷം മറ്റ് ജില്ലകളിലേക്കും നഗരങ്ങളിലേക്കും പദ്ധതി വ്യാപിപ്പിക്കുമെന്നും മന്ത്രി ശിവന്കുട്ടി പറഞ്ഞു. ‘കേരള സവാരി 2.0’ ഓട്ടോകളുടെ ഫ്ളാഗ് ഓഫ് സെക്രട്ടേറിയറ്റിനു മുമ്പില് മന്ത്രി നിര്വഹിച്ചു.
പോലീസ്, ഗതാഗതം, ഐ.റ്റി., പ്ലാനിംഗ് ബോര്ഡ് തുടങ്ങിയ വകുപ്പുകളുടെ സഹകരണത്തോടെയാണ് കേരള സവാരി യാഥാര്ത്ഥ്യമാക്കിയത്. കേന്ദ്ര പൊതുമേഖലാ സ്ഥാപനമായ ഐ.ടി.ഐ. പാലക്കാടിന്റെ സാങ്കേതിക സഹായത്തോടെയാണ് ഇത് നടപ്പിലാക്കിയത്. നിലവില്, ഐ.ടി.ഐ. പാലക്കാട് കണ്ടെത്തിയ മൂവിംഗ് ടെക് ആണ് പുതിയ ടെക്നിക്കല് ടീം.
മറ്റ് ഓണ്ലൈന് പ്ലാറ്റ്ഫോമുകളില് നിന്ന് വ്യത്യസ്തമായി, കേരള സവാരി പ്രവര്ത്തിക്കുന്നത് സബ്സ്ക്രിപ്ഷന് രീതിയിലാണ്. സര്ക്കാരിന്റെ നിശ്ചിത നിരക്കിലുള്ള ഈ സംവിധാനം ഡ്രൈവര്മാര്ക്ക് ഉയര്ന്ന വരുമാനം ഉറപ്പാക്കുന്നു. 2025 മെയ് 6 ലെ സര്ക്കാര് ഉത്തരവ് പ്രകാരം പദ്ധതിയുടെ പുതുക്കിയ നിരക്ക് പ്രാബല്യത്തില് വന്നിട്ടുണ്ട്.
വെറുമൊരു ഓട്ടോ/ടാക്സി ആപ്പ് എന്നതിലുപരി കേരള സവാരിയെ ഒരു മള്ട്ടി മൊബിലിറ്റി ആപ്പാക്കി മാറ്റാനാണ് ലക്ഷ്യമിടുന്നത്. ഇതിനായി മെട്രോ, വാട്ടര് മെട്രോ, ടൂറിസം, തീര്ത്ഥാടനം, റെയില്വേ, പ്രീ-പേയ്ഡ് ഓട്ടോ കൗണ്ടര് എന്നിവിടങ്ങളിലെ ടിക്കറ്റ് ബുക്കിംഗുമായി സംയോജിപ്പിക്കും. സര്ക്കാര് നിരക്ക് നിശ്ചയിക്കുന്നതനുസരിച്ച് ആംബുലന്സ്, ഗുഡ്സ് വെഹിക്കിള് സര്വീസുകളും ഉള്പ്പെടുത്താനാവുമെന്നും മന്ത്രി പറഞ്ഞു.
