വി.വി
കലാകാരന്മാരുടെ ഇച്ഛാശക്തിയെ കാലത്തിനും തോല്‍പ്പിക്കാന്‍ സാധിക്കില്ല എന്നതിന് നിരവധി ഉദാഹരണങ്ങളുണ്ട്. പ്രായം തളര്‍ത്താത്ത ആത്മവീര്യവുമായി അവര്‍ കലോപാസന തുടരും. പ്രശസ്ത നര്‍ത്തകി മീനാ കുറുപ്പ് അവരിലൊരാളാണ്. അന്‍പത്തിരണ്ടാമത്തെ വയസ്സില്‍ കഥകളിയില്‍ അരങ്ങേറ്റം കുറിച്ചിരിക്കുകയാണ് മീന. ഗുരുവായൂരിലെ മേല്‍പ്പത്തൂര്‍ ഓഡിറ്റോറിയത്തിലായിരുന്നു അരങ്ങേറ്റം. തുടക്കക്കാരിയുടെ സംഭ്രമം ഏതുമില്ലാതെ കളിവിളക്കിന് മുന്നില്‍ അവര്‍ നിറഞ്ഞാടി. നര്‍ത്തകി സീനാ ഉണ്ണിയും മീനയ്‌ക്കൊപ്പം കഥകളിയില്‍ അരങ്ങേറി.
മുരിങ്ങൂര്‍ ശങ്കരന്‍ പോറ്റി എഴുതിയ ‘കുചേലവൃത്തം’ ആട്ടക്കഥയിലെ ഒരു ഭാഗമാണ് ഇവര്‍ അവതരിപ്പിച്ചത്. ശ്രീകൃഷ്ണനായി മീനാ കുറുപ്പും രുക്മിണിയായി സീന ഉണ്ണിയും വേഷമിട്ടു. കാണികളുടെ കണ്ണും മനസ്സും കവര്‍ന്ന ഇരുവരും പ്രായഭേദമന്യേ സ്ത്രീകള്‍ക്കും കഥകളി പഠിച്ച് അരങ്ങത്തെത്താം എന്നതിന് മാതൃകയായി.
കോഴിക്കോട് ചോമ്പാല സ്വദേശിനിയാണ് മീന. കാക്കനാട് കേന്ദ്രമായി പ്രവര്‍ത്തിക്കുന്ന ഇന്ത്യന്‍ കള്‍ച്ചറല്‍ ആന്‍ഡ് ഹെറിറ്റേജ് സെന്ററിന്റെ മാനേജിങ് ഡയറക്ടറാണ്. കലാമണ്ഡലം അരവിന്ദാണ് ഗുരുനാഥന്‍.
2018 ല്‍ ഡോ. കെ.കെ.എന്‍ കറുപ്പ് (കാലിക്കറ്റ് യൂണിവേഴ്‌സിറ്റി മുന്‍ വൈസ് ചാന്‍സലര്‍) രക്ഷാധികാരിയായും മകള്‍ മീന കുറുപ്പ് മാനേജിങ് ഡയറക്ടറായും ഗായത്രി, അഞ്ജലി, സന എന്നിവര്‍ ഡയറക്ടര്‍മാരായും സ്ഥാപിച്ച ഇന്‍ഡ്യന്‍ കള്‍ച്ചറല്‍ ആന്‍ഡ് ഹെറിട്ടേജ് സെന്ററില്‍ ഭരതനാട്യം, മോഹിനിയട്ടം, വെസ്റ്റേണ്‍ ഡാന്‍സ്, സംഗീതം, മാര്‍ഷ്യല്‍ ആര്‍ട്ട്‌സ്, ഇന്‍സ്ട്രുമെന്റല്‍ ക്ലാസ് എന്നിവയും നടത്തി വരുന്നു.
കൂടാതെ അണ്ണാമലൈ യൂണിവേഴ്‌സിറ്റിയുടെ അംഗീകാരത്തോടെ ഭരതനാട്യത്തില്‍ ഡിഗ്രിയും മാസ്റ്റേഴ്‌സ് കോഴ്‌സുകളും, കേന്ദ്രസര്‍ക്കാര്‍ അംഗീകൃത സര്‍ട്ടിഫിക്കറ്റ് കോഴ്‌സുകളും, തമിഴ്‌നാട് തഞ്ചാവൂര്‍, തമിഴ് യൂണിവേഴ്‌സിറ്റിയുടെ ഗ്രേഡ് കോഴ്‌സുകളും നടത്തിവരുന്നു.
ഊരാളുങ്കല്‍ യുഎല്‍സിസിയുടെ ക്വാളിറ്റി കണ്‍ട്രോള്‍ സാങ്കേതിക വിഭാഗത്തില്‍ ഉദ്യോഗസ്ഥനായ അനില്‍കുമാര്‍ പൊറ്റെക്കാടാണ് മീനയുടെ ഭര്‍ത്താവ്. നൃത്തസപര്യയില്‍ കുടുംബത്തിന്റെ പിന്തുണയാണ് മീനാ കുറുപ്പിന് ഊര്‍ജ്ജമേകുന്നത്.
