വഡോദര : ഗുജറാത്തിലെ അഹമ്മദാബാദിൽ അനധികൃതമായി താമസിച്ച് വന്നിരുന്ന ബംഗ്ലാദേശി സ്ത്രീകളെ പോലീസ് അറസ്റ്റ് ചെയ്തു. അഹമ്മദാബാദിന് സമീപമുള്ള സോള പ്രദേശത്തിന്റെ വിവിധ ഭാഗങ്ങളിൽ വ്യാജ തിരിച്ചറിയൽ കാർഡുകളുമായി താമസിച്ചിരുന്ന 17 ബംഗ്ലാദേശി സ്ത്രീകളെയാണ് കഴിഞ്ഞ ദിവസം അഹമ്മദാബാദ് പോലീസ് അറസ്റ്റ് ചെയ്തത്. 21 നും 49 നും ഇടയിൽ പ്രായമുള്ള ഈ സ്ത്രീകൾ സാധുവായ രേഖകളില്ലാതെ വാടക വീടുകളിൽ താമസിക്കുന്നതായി പോലീസ് കണ്ടെത്തി.
പ്രദേശത്ത് നിരവധി ബംഗ്ലാദേശി പൗരന്മാരുടെ സാന്നിധ്യം സൂചിപ്പിക്കുന്ന ഒരു പ്രത്യേക രഹസ്യ വിവരത്തെ തുടർന്നാണ് ഓപ്പറേഷൻ ആരംഭിച്ചതെന്ന് അസിസ്റ്റന്റ് പോലീസ് കമ്മീഷണർ (എസിപി) എച്ച്.എം. കൻസാഗര പറഞ്ഞു. വിവരം ലഭിച്ച ഉടൻ സോള പോലീസ് സ്റ്റേഷനിലെ സംഘങ്ങൾ നാലോ അഞ്ചോ സ്ഥലങ്ങളിൽ റെയ്ഡ് നടത്തി അതിർത്തി ഏജന്റുമാർ വഴി അനധികൃതമായി ഭാരതത്തിലേക്ക് കടന്ന 17 സ്ത്രീകളെ അറസ്റ്റ് ചെയ്യുകയായിരുന്നുവെന്നും അദ്ദേഹം പറഞ്ഞു.
കസ്റ്റഡിയിലെടുത്ത സ്ത്രീകൾ വീട്ടുജോലിക്കാരായും തൊഴിലാളികളായും ജോലി ചെയ്യുന്നവരാണെന്ന് റിപ്പോർട്ടുണ്ട്. എന്നാൽ വേശ്യവൃത്തിയും സംഘടിത അതിർത്തി റാക്കറ്റുകളും ഉൾപ്പെടുന്നവരുമായി ഇവർക്ക് ആഴത്തിലുള്ള ബന്ധമുണ്ടെന്നും പോലീസ് സംശയിക്കുന്നു. വേശ്യാവൃത്തിയോ മറ്റ് നിയമവിരുദ്ധ പ്രവർത്തനങ്ങളോ നടക്കാനുള്ള സാധ്യത തള്ളിക്കളയാനാവില്ല. ഇവരെ ചോദ്യം ചെയ്യുന്നതിലൂടെ അവർക്ക് ഏതെങ്കിലും അതിർത്തി കടത്തുമായി ബന്ധപ്പെട്ടോ ദേശവിരുദ്ധ ശൃംഖലയുമായോ ബന്ധമുണ്ടോ എന്ന് വെളിപ്പെടുമെന്നും എസിപി പറഞ്ഞു.
കസ്റ്റഡിയിലെടുത്ത 17 സ്ത്രീകളെയും ഒന്നിലധികം സുരക്ഷാ, രഹസ്യാന്വേഷണ ഏജൻസികൾ കൂടുതൽ ചോദ്യം ചെയ്യുന്നതിനായി അഹമ്മദാബാദിലെ ജോയിന്റ് ഇന്ററോഗേഷൻ സെന്ററിലേക്ക് (ജെഐസി) മാറ്റി. ഈ വ്യക്തികൾ എങ്ങനെയാണ് ഭാരതത്തിലേക്ക് പ്രവേശിച്ചതെന്നും വ്യാജ രേഖകൾ സമ്പാദിച്ചതെന്നും ഗുജറാത്തിന്റെ വാണിജ്യ തലസ്ഥാനത്ത് വർഷങ്ങളോളം കണ്ടെത്താനാകാതെ താമസിച്ചതെന്നും പോലീസ് പരിശോധിച്ചുവരികയാണ്.
ഇന്ത്യ-ബംഗ്ലാദേശ് അതിർത്തിയിൽ പ്രവർത്തിക്കുന്ന ഏജന്റുമാർ വഴിയാണ് സ്ത്രീകൾ ഭാരതത്തിലേക്ക് കടന്നതെന്നും നിരീക്ഷണത്തിലെ സുഷിരങ്ങളും പഴുതുകളും ചൂഷണം ചെയ്തതായും പ്രാഥമിക അന്വേഷണത്തിൽ നിന്ന് വ്യക്തമാണ്. ഇത് അതിർത്തി കടന്നുള്ള മനുഷ്യക്കടത്ത്, നിയമവിരുദ്ധ താമസം, സാധ്യതയുള്ള ദേശവിരുദ്ധ ബന്ധങ്ങൾ എന്നിവയെക്കുറിച്ച് ഗുരുതരമായ ആശങ്കകൾ ഉയർത്തുന്നുണ്ടെന്നും പോലീസ് പറഞ്ഞു.
അന്വേഷണത്തിന്റെ ഫലം വരുന്നതുവരെ വിദേശി നിയമപ്രകാരം നാടുകടത്തൽ നടപടികൾ ഇവർക്കെതിരെ അധികൃതർ ആരംഭിച്ചിട്ടുണ്ട്. നിയമപരമായ നടപടിക്രമങ്ങൾക്കനുസൃതമായി നാടുകടത്തൽ പ്രക്രിയ ആരംഭിച്ചതായി അഹമ്മദാബാദ് പോലീസ് പ്രസ്താവനയിൽ പറഞ്ഞു. അതേ സമയം നിർബന്ധിത വാടക പരിശോധനയില്ലാതെ ഈ സ്ത്രീകൾക്ക് അവരുടെ സ്വത്തുക്കൾ വാടകയ്‌ക്ക് നൽകിയ അഞ്ച് വീട്ടുടമസ്ഥർക്കെതിരെയും പോലീസ് കേസെടുത്തിട്ടുണ്ട്.
