ശബരിമല സ്വര്‍ണക്കൊള്ള; ദേവസ്വം മഹസര്‍ അപൂര്‍ണം, എല്ലാം അഞ്ചുവരിയിലൊതുക്കി, ബോധപൂർവം പിഴവ് ആവർത്തിച്ചു

പത്തനംതിട്ട: ശബരിമല സ്വര്‍ണക്കൊള്ളയ്‌ക്കു 2019ല്‍ വഴിയൊരുക്കിയത് അപൂര്‍ണമായ ദേവസ്വം മഹസറും അനുബന്ധ രേഖകളും. നിയമപരമായ വ്യവസ്ഥകളൊന്നും പാലിക്കാതെ ഏതാനും വരികളില്‍ മഹസര്‍ ഒതുക്കിയാണ് കൊള്ളയ്‌ക്കു കളമൊരുക്കിയതെന്നാണ് പ്രത്യേക അന്വേഷണ സംഘത്തിന്റെ കണ്ടെത്തല്‍. ഈ സപ്തം. ഏഴിന് ദ്വാരപാലക ശില്‍പങ്ങളില്‍ നിന്ന് വീണ്ടും പാളികള്‍ ഇളക്കിയപ്പോഴും മഹസറില്‍ ബോധപൂര്‍വം പിഴവാവര്‍ത്തിച്ചെന്നും കണ്ടെത്തി. അന്വേഷണ ഭാഗമായി എസ്‌ഐടി രണ്ടു തവണ മഹസര്‍ രേഖകള്‍ ആവശ്യപ്പെട്ടിരുന്നു. അവ ദേവസ്വം ബോര്‍ഡ് കൈമാറിയില്ല. തുടര്‍ന്ന് എസ്‌ഐടി സ്വരം കടുപ്പിച്ചപ്പോഴാണ് മഹസര്‍ രേഖകള്‍ അപൂര്‍ണമാണെന്നത് അന്വേഷണ സംഘത്തെ അറിയിച്ചത്.

2019ല്‍ സ്വര്‍ണ കവചിത പാളികള്‍ സന്നിധാനത്തു നിന്ന് ഇളക്കുമ്പോള്‍ 1998ല്‍ സ്വര്‍ണം പൊതിഞ്ഞപ്പോഴത്തെ മഹസറിന് അനുബന്ധമായാണ് പുതിയ മഹസര്‍ തയാറാക്കേണ്ടിയിരുന്നത്. സ്വര്‍ണം പൊതിയാന്‍ വിജയ് മല്യക്ക് ദേവസ്വം ബോര്‍ഡ് അനുമതിയേകിയ സാഹചര്യം മുതല്‍ പണികള്‍ നടത്തി പൂര്‍ത്തീകരിച്ചതു വരെ വ്യക്തമാക്കിയ ശേഷം 2019ല്‍ വീണ്ടും പാളികള്‍ ഇളക്കാനുള്ള കാരണവും മഹസറില്‍ നിയമ പ്രകാരം സൂചിപ്പിക്കേണ്ടതാണ്. കൂടാതെ ഇതിന് അനുമതി നല്കിയ തീയതി, അതിനായി നടത്തിയ ആചാര കര്‍മങ്ങള്‍, വാതിലുകള്‍, കട്ടിളപ്പാളികള്‍, ദ്വാരപാലക ശില്‍പങ്ങള്‍ അടക്കമുള്ളവ ഇളക്കിയ തീയതി, സമയം, ഉദ്യോഗസ്ഥരുടെയും തന്ത്രി അടക്കമുള്ളവരുടെയും സാന്നിധ്യം സംബന്ധിച്ച വിവരങ്ങള്‍, എവിടെ പണി നടത്തി, ആരാണ് സ്‌പോണ്‍സര്‍ തുടങ്ങിയ കാര്യങ്ങളെല്ലാം മഹസറില്‍ വേണം. ഓരോ ദിവസത്തെയും നിര്‍മാണ പുരോഗതി വ്യക്തമാക്കുന്ന ഡെയ്‌ലി സ്‌പോട്ട് മഹസറും ആവശ്യമാണ്.

ദിവസേന പണിയാരംഭിച്ച സമയം, എന്തു പണികള്‍ ചെയ്തു, വൈകിട്ട് എപ്പോള്‍ പൂര്‍ത്തിയായി, ഉപയോഗിച്ച സ്വര്‍ണത്തിന്റെ അളവ്, ബാക്കി സ്വര്‍ണം എവിടെ സൂക്ഷിച്ചു എന്നിവ ഡെയ്‌ലി മഹസറിലും കൃത്യമായി രേഖപ്പെടുത്തണം. 2019ല്‍ ഇക്കാര്യം വ്യക്തമാക്കുന്ന ഡെയ്‌ലി മഹസര്‍ തയാറാക്കിയിരുന്നില്ല. നിര്‍മാണ സ്ഥലത്ത് ദേവസ്വം ഉദ്യോഗസ്ഥരുടെ സാന്നിധ്യവുമില്ലായിരുന്നു എന്നത് വ്യക്തമായി.

1999ല്‍ വിജയ് മല്യ സ്വര്‍ണം പൊതിഞ്ഞപ്പോള്‍ നിയമ പ്രകാരം പൂര്‍ണമായ മഹസറാണോ തയാറാക്കിയതെന്നത് പരിശോധിക്കണമെന്ന ആവശ്യവും ശക്തമാണ്. അങ്ങനെയെങ്കില്‍ സ്വര്‍ണം പൊതിഞ്ഞ ഓരോ ഭാഗത്തിന്റെയും കൃത്യമായ തൂക്കം മഹസറിലുണ്ടാകണം.

ഈ രേഖകളെല്ലാം ദേവസ്വം കമ്മിഷണര്‍, എക്‌സിക്യൂട്ടീവ് ഓഫീസര്‍, തിരുവാഭരണ കമ്മിഷണര്‍ അടക്കമുള്ളവരുടെ രജിസ്റ്ററുകളില്‍ ലഭ്യമാകേണ്ടതാണ്. മഹസര്‍ ബുക്കിലും എം ബുക്കിലും ഇതിന്റെ കോപ്പികള്‍ ലഭിക്കണം. ദ്വാരപാലക ശില്‍പങ്ങളില്‍ പൊതിഞ്ഞ സ്വര്‍ണത്തിന്റെ അളവ് ദേവസ്വം വിജിലന്‍സ് കണക്കാക്കിയത് യുബി ഗ്രൂപ്പ് 1998ല്‍ ദേവസ്വം ബോര്‍ഡിന് കൈമാറിയ കംപ്ലീഷന്‍ സര്‍ട്ടിഫിക്കറ്റില്‍ നിന്നാണ്. ഇതു കേവലം അനുമാനമാണൊയെന്നും സംശയമുണ്ട്.