സര്‍ക്കാര്‍ പ്രതിസന്ധിയില്‍; പക്ഷെ, വാഗ്ദാനപ്പെരുമഴ

തിരുവനന്തപുരം: ശബരിമല സ്വര്‍ണക്കൊള്ളയടക്കമുള്ള സര്‍ക്കാര്‍ സ്‌പോണ്‍സേര്‍ഡ് അഴിമതികള്‍ തദ്ദേശ സ്വയംഭരണ തെരഞ്ഞെടുപ്പില്‍ തിരിച്ചടിയാകുമെന്ന് വന്നതോടെ വാഗ്ദാനപ്പെരുമഴയുമായി പിണറായി സര്‍ക്കാര്‍. ക്ഷേമപെന്‍ഷന്‍ 2000 രൂപയാക്കി. സര്‍ക്കാര്‍ ജീവനക്കാര്‍ക്ക് ഒരുഗഡു ഡിഎ അനുവദിച്ചു. പുതുതായി 1000 രൂപ സ്ത്രീ സുരക്ഷാ പെന്‍ഷനും പ്രഖ്യാപിച്ചു.

1,600 രൂപ സാമൂഹ്യ സുരക്ഷാ പെന്‍ഷന്‍ 400 രൂപ കൂട്ടി 2,000 രൂപയാക്കി. 35 മുതല്‍ 60 വയസ് വരെയുള്ള, ഏതെങ്കിലും സാമൂഹ്യ ക്ഷേമ പെന്‍ഷന്‍ ലഭിക്കാത്ത എഎവൈ (മഞ്ഞക്കാര്‍ഡ്), പിഎച്ച്എച്ച് (മുന്‍ഗണനാ വിഭാഗം പിങ്ക് കാര്‍ഡ്) വിഭാഗത്തില്‍പ്പെട്ട സ്ത്രീകള്‍ക്ക് പ്രതിമാസം 1000 രൂപ വീതം അനുവദിക്കും. യുവതലമുറക്ക് കണക്ട് ടു വര്‍ക്ക് സ്‌കോളര്‍ഷിപ്പ്. പ്രതിവര്‍ഷ കുടുംബ വരുമാനം ഒരു ലക്ഷം രൂപയില്‍ താഴെയുള്ള, പ്ലസ് ടു കഴിഞ്ഞ് നൈപുണ്യ കോഴ്‌സുകളില്‍ പഠിക്കുന്നവരോ വിവിധ ജോലി/ മത്സര പരീക്ഷകള്‍ക്ക് തയ്യാറെടുക്കുന്നവരോ ആയ 18 മുതല്‍ 30 വയസ് വരെയുള്ള യുവതി/ യുവാക്കള്‍ക്ക് പ്രതിമാസം 1,000 രൂപ വീതം ധനസഹായം.

കുടുംബശ്രീ എഡിഎസുകള്‍ക്കുള്ള പ്രവര്‍ത്തന ഗ്രാന്റ് പ്രതിമാസം 1,000 രൂപ. സര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കും ഒരു ഗഡു ഡിഎ, ഡിആര്‍ കൂടി. ഡിഎ കുടിശ്ശികയുടെ 4ശതമാനം നവംബറില്‍ വിതരണം ചെയ്യും. പതിനൊന്നാം ശമ്പള പരിഷ്‌കരണ കുടിശികയുടെ മൂന്നും നാലും ഗഡുക്കള്‍ 2026 ഏപ്രില്‍ 1നു ശേഷം പിഎഫില്‍ ലയിപ്പിക്കും. പിഎഫ് ഇല്ലാത്തവര്‍ക്ക് പണമായി 2026 ഏപ്രില്‍ 1നു ശേഷം നല്‍കും. അങ്കണവാടി വര്‍ക്കര്‍മാരുടെയും ഹെല്‍പ്പര്‍മാരുടെയും പ്രതിമാസ ഓണറേറിയവും സാക്ഷരത പ്രേരക്മാരുടെ പ്രതിമാസ ഓണറേറിയവും 1000 രൂപ വീതം വര്‍ദ്ധിപ്പിച്ചു. ആശാ വര്‍ക്കര്‍മാരുടെ പ്രതിമാസ ഓണറേറിയം 1000 രൂപയും വര്‍ദ്ധിപ്പിച്ചിട്ടുണ്ട്.

പാചകത്തൊഴിലാളികളുടെ ഓണറേറിയം ദിവസം 50 രൂപവച്ച് പ്രതിമാസം 1100 രൂപ കൂട്ടി. പ്രീ പ്രൈമറി ടീച്ചര്‍മാരുടെയും ആയമാരുടെയും പ്രതിമാസ വേതനം 1000 രൂപ കൂടി വര്‍ദ്ധിപ്പിച്ചു. ഗസ്റ്റ് ലക്ചറര്‍മാരുടെ പ്രതിമാസ വേതനം പരമാവധി 2000 രൂപ വര്‍ദ്ധിപ്പിച്ചു. റബ്ബറിന്റെ താങ്ങുവില കിലോഗ്രാമിന് 180 രൂപയില്‍ നിന്നും 200 രൂപയാക്കി. നെല്ലിന്റെ താങ്ങുവില 30 രൂപയാക്കി.

അതേസമയം സര്‍ക്കാര്‍ കടുത്ത സാമ്പത്തിക പ്രതിസന്ധിയിലാണെന്നും കേന്ദ്രസര്‍ക്കാര്‍ ഞെരിക്കുന്നുവെന്നുമാണ് പിണറായി സര്‍ക്കാരിന്റെ പ്രചരണം. എന്നാല്‍ പെന്‍ഷന്‍ വര്‍ദ്ധനയും പുതിയ പെന്‍ഷന്‍ പദ്ധതിയും ഉള്‍പ്പെടെയുള്ള പ്രഖ്യാപനത്തിന് മാത്രം 18618 കോടിരൂപ പ്രതിവര്‍ഷം അധികം ചെലവാകും. മാത്രമല്ല പെന്‍ഷന്‍, ഡിഎ കുടിശ്ശിക വിതരണത്തിനുള്ള പണം വേറെയും. കടുത്ത സാമ്പത്തിക പ്രതിസന്ധിയിലാണെങ്കില്‍ എങ്ങനെ ഈ തുക കണ്ടെത്തുമെന്നാണ് ചോദ്യം.