ന്യൂദല്ഹി: വനവാസികളുടെ ഉന്നതികള്ക്ക് ‘ഊര്’ എന്ന പേര് പുനസ്ഥാപിക്കുമെന്ന് പട്ടികജാതി പട്ടികവര്ശ വികസന മന്ത്രി കെ.എ.തുളസി. ഉന്നതി ഒഴിവാക്കി ഊര് എന്നത് തിരികെ നല്കണമെന്ന വനവാസികളുടെയും ഊര് മൂപ്പന്മാരുടെ അഭ്യര്ത്ഥന മാനിച്ചാണ് തീരുമാനമെന്നും കേരള ഹൗസില് പത്രപ്രവര്ത്തകയൂണിയന് സംഘടിപ്പിച്ച മൈക് ടുഗദര് പരിപാടിയില് മന്ത്രി പറഞ്ഞു.
ഊര് എന്നത് വനവാസികളുടെ പാരമ്പര്യത്തിന്റെയും സംസ്കാരത്തിന്റെയും അവിഭാജ്യ ഘടകമാണെന്ന് മന്ത്രി കൂട്ടിച്ചേര്ത്തു. പേര് തിരികെ നല്കണമെന്ന് നിരവധി ഊര് മൂപ്പന്മാരും ആവശ്യം ഉന്നയിച്ചിരുന്നു. ഇത് മുന്നിര്ത്തിയാണ് പഴയ പേര് തന്നെ നിലനിര്ത്താന് തീരുമാനിച്ചത്. പേരുമാറ്റത്തില് ഉടന് ഉത്തരവ് പുറത്തിറക്കുമെന്നും മന്ത്രി പറഞ്ഞു. അതേസമയം പട്ടികജാതി വിഭാഗങ്ങള് താമസിക്കുന്ന സ്ഥലങ്ങള്ക്ക് നല്കിയ ‘ഉന്നതി’ തുടരുമെന്നും പരാതികള് ഉണ്ടായാല് പേര് മാറ്റുന്ന കാര്യം പരിഗണിക്കുമെന്നും മന്ത്രി വ്യക്തമാക്കി.
2024 ജൂണില് 18ന് അന്നത്തെ പട്ടികജാതി-പട്ടികവര്ഗ വികസന മന്ത്രി കെ. രാധാകൃഷ്ണന് രാജിവയ്ക്കുന്നതിന് തൊട്ടുമുമ്പാണ് പേരുമാറ്റല് ഉത്തരവ് പുറത്തിറക്കിയത്. ‘കോളനി’, ‘സങ്കേതം’, ‘ഊര്’ എന്നീ പേരുകള് ഒഴിവാക്കി പകരം ‘ഉന്നതി’, ‘നഗര്’, ‘പ്രകൃതി’ തുടങ്ങിയവ നല്കാനായിരുന്നു നിര്ദ്ദേശം. എന്നാല് വനവാസികള് ഊര് എന്ന വാക്ക് തന്നെ ഉപയോഗിക്കുകയായിരുന്നു. പേര് മാറ്റത്തിലൂടെയല്ല അടിസ്ഥാനസൗകര്യ വികസനത്തിലൂടെയാണ് ഊരുകളെ ഉന്നതിയിലേക്ക് എത്തിക്കേണ്ടതെന്നും വിവിധ വനവാസി സംഘടനകളും ആവശ്യപ്പെട്ടിരുന്നു.
മൂന്നുമുതല് 15വരെ വീടുകളുള്ള പട്ടികജാതി ഉന്നതികളില് വീട്, കുടിവെള്ളം, റോഡ് എന്നിവ നടപ്പിലാക്കുന്നതിന് പഞ്ചമി പദ്ധതി യും മന്ത്രി പ്രഖ്യാപിച്ചു. ചെറിയ ഉന്നതികളിലൂടെ വികസനത്തിന് മാദണ്ഡങ്ങള് തടസമാകുന്നത് ഒഴിവാക്കാനാണ് പുതിയ പദ്ധതി. പഞ്ചമി പദ്ധതിയിലൂടെ 40 ലക്ഷം വരെ ചെലവഴിക്കും. ലൈഫ് പദ്ധതിക്ക് പുറമേ പട്ടികജാതി, പട്ടികവര്ഗ വിഭാഗങ്ങള്ക്കായി സ്ഥലവും വീടും ഉള്പ്പെടെ നല്കുന്ന പ്രത്യേക ഭവന പദ്ധതിയും ഉടന് ആരംഭിക്കും. കേന്ദ്രമന്ത്രിമാരുമായുള്ള കൂടിക്കാഴ്ചയില് സംസ്ഥാന സര്ക്കാരിന്റെ പദ്ദതികള്ക്കെല്ലാം പൂര്ണ പിന്തുണ നല്കിയിട്ടുണ്ടെന്നും വിവിധ പദ്ധതികളില് ലഭിക്കാനുള്ള 240 കോടി ഉടന് അനുവദിക്കുമെന്ന് ഉറപ്പ് ലഭിച്ചിട്ടുണ്ടെന്നും മന്ത്രി പറഞ്ഞു. പാലക്കാട് എംപിയും മന്ത്രിയുടെ ഭര്ത്താവുമായ വി.കെ.ശ്രീകണ്ഠനും മൈക്ക് ടുഗദര് പരിപാടിയില് പങ്കെടുത്തു.
