പാലക്കാട് : രാഷ്ട്രപതിയുടെ ശബരിമല ദര്‍ശനത്തെ വിമര്‍ശിച്ച് വാട്‌സാപ്പില്‍ സ്റ്റാറ്റസിട്ട ആലത്തൂര്‍ ഡിവൈഎസ്പി ആര്‍.മനോജ് കുമാറിനോട് പാലക്കാട് എസ്പി വിശദീകരണം തേടി. രാഷ്ട്രപതിയുടെ സന്ദര്‍ശനത്തില്‍ ആചാര ലംഘനമുണ്ടായെന്നും ഹൈക്കോടതി വിധികള്‍ കാറ്റില്‍ പറത്തിയെന്നുമായിരുന്നു മനോജ് കുമാറിന്റെ വാട്‌സാപ്പ് സ്റ്റാറ്റസ്. എന്നാല്‍ ട്രെയിന്‍ യാത്രയ്‌ക്കിടെ മറ്റൊരാള്‍ വാട്‌സാപില്‍ അയച്ചുതന്നെ കുറിപ്പ് വായിച്ചു നോക്കുന്നതിനിടെ അബദ്ധത്തില്‍ സ്റ്റാറ്റസ് ആയിപ്പോയതാണെന്നാണ് ഡിവൈഎസ്പി പറയുന്നത്. പരമോന്നത പദവിയിലിരിക്കുന്ന ഒരു വ്യക്തിക്കെതിരെ ഒരു സര്‍ക്കാര്‍ ഉദ്യോഗസ്ഥന്‍ തന്നെ വിമര്‍ശനം ഉയര്‍ത്തുന്നത് കടുത്ത ചട്ടലംഘനമാണ്. ഇത് ഒരു തരത്തിലും ന്യായീകരിക്കത്തക്കതല്ലെന്ന വിമര്‍ശനവും പൊതുവില്‍ ഉയര്‍ന്നിരുന്നു. ബിജെപി അടക്കം വിഷയത്തില്‍ പ്രതിഷേധം ഉയര്‍ത്തി. ഇതേത്തുടര്‍ന്നാണ് വിശദീകരണം തേടിയത്. വിശദീകരണം തൃപ്തികരമല്ലെങ്കില്‍ തുടര്‍ നടപടി ഉണ്ടാകും.
