തിരുവനന്തപുരം: പ്രഥമ സ്വര്‍ണകപ്പിനായി കായിക കേരളം ഇന്ന് കളത്തിലിറങ്ങും. ചാമ്പ്യന്‍ പട്ടം നിലനിര്‍ത്താനായി അതിശക്തരെയാണ് ആതിഥേയരായ തിരുവനന്തപുരം കളത്തിലറക്കുന്നത്. പോരാട്ടത്തിനിറങ്ങുമ്പോള്‍ കഴിഞ്ഞവര്‍ഷം പിന്നിലായ തൃശൂരും മലപ്പുറവും പാലക്കാടും കടുത്ത മത്സരത്തിനായി കച്ചകെട്ടിക്കഴിഞ്ഞു.
1935 പോയിന്റോടെ തിരുവനന്തപുരത്തിന് ചാമ്പ്യനാകാന്‍ കരുത്ത് പകര്‍ന്നത് നീന്തലിലെയും അത്‌ലറ്റിക്‌സിലെയും ഗെയിംസുകളിലെയും താരങ്ങളുടെ വന്‍പടയാണ്. 227 സ്വര്‍ണമാണ് അത്‌ലറ്റിക്‌സിലും ഗെയിംസിലുമായി തിരുവന്തപുരം കഴിഞ്ഞതവണ നേടിയത്. ഇത്തവണ 1300 കായിക താരങ്ങളാണ് തിരുവനന്തപുരത്തിനായി കളത്തിലിറങ്ങുന്നത്. നീന്തലിലില്‍ കാലങ്ങളായി തിരുവനന്തപുരത്തിന്റെ ആധിപത്യമാണ്. അത് മറികടക്കുക മറ്റ് ജില്ലകള്‍ക്ക് ബാലികേറാമലയാകും. കഴിഞ്ഞ തവണ രണ്ടാം സ്ഥാനത്തെത്തിയ തൃശൂരിന് 848 പോയിന്റേ നേടാനായിരുന്നുള്ളൂ. മാത്രമല്ല അത്‌ലറ്റിക്‌സില്‍ സ്വര്‍ണം വിരലില്‍ എണ്ണാവുന്നത് മാത്രമായി ഒതുങ്ങുകയും ചെയ്തിരുന്നു. 1500 പേരുമായാണ് തൃശൂര്‍ തലസ്ഥാനത്തേക്ക് എത്തിയിരിക്കുന്നത്.
അത്‌ലറ്റിക്‌സിന്റെ കരുത്തിലാണ് മലപ്പുറത്തിന്റെ പോരാട്ടം. 824 പോയിന്റായിരുന്നു മലപ്പുറത്തിന്. അത്‌ലറ്റിക്‌സില്‍ ഇക്കുറി 300 പേരാണ് മലപ്പുറത്തിനായി ട്രാക്കില്‍ ഇറങ്ങുന്നത്. പഴയ കരുത്തന്മാരായ എറണാകുളം തങ്ങളുടെ മേല്‍കോയ്‌മ തിരിച്ചുപിടിക്കാനുള്ള തയാറെടുപ്പില്‍ 2264 പേരെ കളത്തിലിറക്കും. നാലമതായിരുന്ന പാലക്കാടും അഞ്ചാമതായിരുന്ന കണ്ണൂരും മെഡല്‍ വേട്ട മെച്ചപ്പെടുത്താനുള്ള തന്ത്രങ്ങളുമായാണ് ഗ്രൗണ്ടിലിറങ്ങുന്നത്.
