കോട്ടയം: കത്തോലിക്കാ വിശ്വാസത്തിന്റെ പരമോന്നത സ്ഥാനമായ വത്തിക്കാനില്‍ മുസ്ലീം വിശ്വാസികള്‍ക്ക് നിസ്‌കാര മുറി അനുവദിച്ച ലയോ മാര്‍പാപ്പയുടെ നടപടിയെ ഹിജാബ് വിലക്കിയ കേരളത്തിലെ ക്രൈസ്തവ സ്‌കൂളിന്‌റെ നിലപാടുമായി ചേര്‍ത്തുവായിച്ച് സോഷ്യല്‍മീഡിയ. വത്തിക്കാന്‍ മുസ്ലീംമത വിശ്വാസികളെ ചേര്‍ത്തു നിര്‍ത്തുമ്പോള്‍ കേരളത്തില്‍ മുസ്ലീം- ക്രൈസ്തവ ഭിന്നിപ്പുണ്ടാക്കുന്നുവെന്നാണ് വിമര്‍ശനം.
ഇറ്റാലിയന്‍ പത്രം ‘ലാ റിപ്പബ്ലിക്ക’ക്ക് നല്‍കിയ അഭിമുഖത്തിലാണ് വത്തിക്കാന്‍ ലൈബ്രറിയുടെ വൈസ് പ്രിഫെക്റ്റ് ഫാ. ജിയാക്കോമോ കാര്‍ഡിനാലി വത്തിക്കാന്‍ ലൈബ്രറിയില്‍ മുസ്ലിം പണ്ഡിതര്‍ക്ക് മാര്‍പാപ്പ പ്രാര്‍ത്ഥനാ മുറി അനുവദിച്ച കാര്യം സ്ഥിരീകരിച്ചത്. പഠനത്തിനായി എത്തുന്ന ചില മുസ്ലിം പണ്ഡിതര്‍ ആവശ്യപ്പെട്ടതിനെത്തുടര്‍ന്നാണ് സൗകര്യം ഒരുക്കിയത്.
ലോകത്തിലെ ഏറ്റവും പഴക്കമേറിയ ലൈബ്രറികളിലൊന്നാണ് വത്തിക്കാന്‍ ലൈബ്രറി. 1475-ല്‍ പോപ്പ് സിക്സ്റ്റസ് നാലാമനാണ് ഇത് സ്ഥാപിച്ചത്. 80,000 കൈയെഴുത്തുപ്രതികള്‍, 50,000 ആര്‍ക്കൈവല്‍ രേഖകള്‍, നാണയങ്ങള്‍, മെഡലുകള്‍, ഇരുപത് ലക്ഷത്തോളം പുസ്തകങ്ങള്‍ എന്നിവ ഇവിടെയുണ്ട്.
