കുമരകം: ഭാരതത്തിന്റെ പ്രഥമ വനിതയെ സ്വീകരിക്കാന്‍ വിനോദസഞ്ചാര കേന്ദ്രമായ കുമരകം അണിഞ്ഞൊരുങ്ങുന്നു. 23 – ന് വൈകുന്നേരം കോട്ടയം പോലീസ് പരേഡ് ഗ്രൗണ്ടില്‍നിന്നും കാര്‍ മാര്‍ഗം കുമരകം താജ് ഹോട്ടലിലേക്ക് യാത്ര ചെയ്യാനുള്ള ക്രമീകരണങ്ങള്‍ ഒരുക്കി തുടങ്ങി. ഇല്ലിക്കല്‍ പാലം മുതല്‍ കവണാറ്റിന്‍കര വരെയുള്ള റോഡ് കുഴികള്‍ അടച്ച് സഞ്ചാരയോഗ്യമാക്കാനുള്ള നടപടികള്‍ ആരംഭിച്ചു.
റോഡരികിലെ കാടു വെട്ടി വൃത്തിയാക്കിക്കൊണ്ടിരിക്കുന്നു. വഴി വിളക്കുകള്‍ എല്ലാം പ്രവര്‍ത്തന സജ്ജമാക്കി വരുകയാണ്. പാലങ്ങളും കലുങ്കുകളും പെയിന്റ് ചെയ്തു ഭംഗിയാക്കും. പാലങ്ങളിലെല്ലാം റിഫ്‌ലക്ടറുകള്‍ സ്ഥാപിക്കും. മൂന്നു വര്‍ഷങ്ങളായി കുമരകം നിവാസികള്‍ അനുഭവിച്ചു കൊണ്ടിരുന്ന യാത്രാ ദുരിതത്തിനു കാരണമായ കോണത്താറ്റു പാലത്തിലൂടെ വാഹനങ്ങള്‍ക്ക് ഗതാഗതം അനുവദിച്ചതും പ്രസിഡന്റിന്റെ ആഗമനം മുന്നില്‍ കണ്ടാണ്.
വൈദ്യുതിവിതരണം കുറ്റമറ്റതാക്കാന്‍ ബോര്‍ഡ് മുന്നൊരുക്കങ്ങള്‍ നടത്തി വരുന്നു. ഇതിന്റെ ഭാഗമായി കഴിഞ്ഞ ഒരു ദിവസം വൈദ്യുതി വിതരണം മുടക്കി ചെങ്ങളം സബ്‌സ്റ്റേഷനില്‍ അറ്റകുറ്റപണികള്‍ നടത്തി. നിലവില്‍ ഉള്ള ഫീഡര്‍ തകരാറിലായാല്‍ സമാന്തര ഫീഡര്‍ പ്രവര്‍ത്തിപ്പിക്കാനുള്ള സംവിധാനം സജ്ജമാക്കി. ഇതും തകരാറിലായാല്‍ കല്ലറ സബ് സ്റ്റേഷനില്‍ നിന്നും തലയാഴം വഴിയുള്ള ഫീഡര്‍ പ്രവര്‍ത്തിപ്പിക്കാനുള്ള ക്രമീകരണങ്ങളും ചെയ്തിട്ടുണ്ട്. പ്രകൃതിക്ഷോഭം മൂലം ലൈനില്‍ തകരാറുകള്‍ സംഭവിച്ചാല്‍ ഉടന്‍ പരിഹാരം കാണാന്‍ 22, 23 തീയതികളില്‍ പ്രത്യേക സംഘത്തെ നിയോഗിക്കും.
കുമരകത്ത് ആരോഗ്യ മേഖലയില്‍ പ്രവര്‍ത്തിക്കുന്ന കമ്പ്യൂണിറ്റി ഹെല്‍ത്ത് സെന്ററില്‍ പ്രത്യേക വി.വി .ഐ.പി അത്യാഹിത എസി മുറി ഒരുക്കി. ഡപ്യൂട്ടി ഡിസ്ട്രിക്ട് മെഡിക്കല്‍ ഓഫീസര്‍ ഡോക്ടര്‍മാരുടെ സംഘത്തിന് നേതൃത്വം നല്‍കും. എല്ലാ വിധ സജ്ജീകരണങ്ങളോടു കൂടിയ ആംബുലന്‍സുകളും തയ്യാറാക്കുന്നുണ്ട്.
പ്രസിഡന്റ് വിശ്രമിക്കുന്ന താജ് ഹോട്ടലിന് സമീപത്തെ പ്രാദേശിക കാര്‍ഷിക ഗവേഷണ കേന്ദ്രത്തിലെ താമരക്കുളം മനോഹരമാക്കും. ഗവേഷണ കേന്ദ്രത്തിന്റെ കവാടത്തില്‍ പ്രധാന റോഡരികിലാണ് നയന മനോഹര താമരക്കുളം. കുമരകം സന്ദര്‍ശിക്കുന്ന വിനോദ സഞ്ചാരികളുടെ ഒരു പ്രധാന ആകര്‍ഷണമാണ് ഈ താമരക്കുളം. രണ്ട് വര്‍ഷം മുമ്പ് കുമരകത്ത് നടന്ന ജി – 20 ഉച്ചകോടിയില്‍ സംബന്ധിച്ച വിദേശ പ്രതിനിധികളുടെ മനം കവര്‍ന്ന കാഴ്ചയായിരുന്നു ദീപാലംകൃതമായ താമരക്കുളം.
ജില്ലയിലെത്തുന്ന രാഷ്‌ട്രപതിയുടെ ഹെലികോപ്റ്റര്‍ പോലീസ് ഗ്രൗണ്ടിലാണ് ലാന്റ് ചെയ്യുക, എന്നാല്‍ എന്തെങ്കിലും സാഹചര്യത്തില്‍ അവിടെ ലാന്റ് ചെയ്യാന്‍ സാധിച്ചില്ലെങ്കില്‍ നെഹ്‌റു സ്റ്റേഡിയത്തിലാവും ലാന്റ് ചെയ്യുക. അതിന്റെ ഭാഗമായി വര്‍ഷങ്ങളായി കാട് പിടിച്ചു കിടക്കുന്ന നെഹ്‌റു സ്റ്റേഡിയത്തിലെ കാട് വെട്ടി. കായിക താരങ്ങളുടെ കാലങ്ങളായുള്ള ആവശ്യമായിരുന്നു മൈതാനം വൃത്തിയാക്കുക എന്നത് എന്നാല്‍ അത് നടന്നില്ല.
നെഹ്‌റു സ്റ്റേഡിയം കാടുകയറി ഉപയോഗിക്കാനാകാത്തതിനാല്‍ ജില്ലയില്‍ നടത്തേണ്ട എല്ലാ കായികമത്സരങ്ങളും പാലാ മുനിസിപ്പല്‍ സ്റ്റേഡിയത്തിലാണ് നടത്തുന്നത്. എന്നാല്‍ രാഷ്ട്രപതിയെ വരവേല്‍ക്കാനായി സ്‌റ്റേഡിയവും കാട് വെട്ടി വൃത്തിയാക്കി.
ജന്മഭൂമി ഓണ്‍ലൈന്‍