തിരുവനന്തപുരം: പട്ടികജാതി ക്ഷേമഫണ്ട് വെട്ടിക്കുറച്ച സംസ്ഥാന സര്ക്കാര് നടപടിക്കെതിരെ അന്വേഷണം പ്രഖ്യാപിച്ച് ദേശീയ പട്ടികജാതി കമ്മിഷന്. ബിജെപി പട്ടികജാതി മോര്ച്ച സംസ്ഥാന പ്രസിഡന്റ് ഷാജുമോന് വട്ടേക്കാട് ദേശീയ പട്ടികജാതി കമ്മിഷന് നല്കിയ പരാതിയിലാണ് ദേശീയ പട്ടികജാതി കമ്മിഷന് അന്വേഷണത്തിന് ഉത്തരവിട്ടത്.
പട്ടികജാതി വികസന വകുപ്പ് പ്രിന്സിപ്പല് സെക്രട്ടറിയോട് മുപ്പതു ദിവസത്തിനകം മറുപടി നല്കണമെന്നും ബന്ധപ്പെട്ട രേഖകള് കമ്മിഷന് മുന്നില് ഹാജരാക്കണമെന്നും ദേശീയ പട്ടികജാതി കമ്മിഷന് ആവശ്യപ്പെട്ടു. സംസ്ഥാനത്ത് പട്ടികജാതി വിഭാഗങ്ങള്ക്കനുവദിച്ച പട്ടികജാതി ക്ഷേമ ഫണ്ട് സംസ്ഥാന സര്ക്കാര് പിന്നീട് വെട്ടികുറച്ചു. ഇത് മൂലം പട്ടികജാതി പദ്ധതികള് സംസ്ഥാനത്ത് പൂര്ണമായും സ്തംഭിച്ചു.
പട്ടികജാതി ക്ഷേമത്തിന് അനുവദിച്ച 1370 കോടി രൂപയില് 450 കോടി രൂപ വെട്ടിച്ചുരുക്കി 920 കോടിയാക്കി കുറച്ചിരുന്നു. പട്ടികവര്ഗ ക്ഷേമത്തിന് അനുവദിച്ച 502 കോടി രൂപയില് നിന്നും 112 കോടി രൂപ വെട്ടിക്കുറച്ചു 390 കോടി രൂപയാക്കി സര്ക്കാര് കുറച്ചു. പട്ടികവിഭാഗങ്ങളുടെ ഭവന നിര്മാണത്തിന് 140 കോടി രൂപ ലൈഫ് മിഷന് വഴി അനുവദിച്ചെങ്കിലും ഒരു രൂപ പോലും ചിലവഴിച്ചില്ല.
പട്ടികജാതി പെണ്കുട്ടികളുടെ വിദ്യാഭ്യാസത്തിനും സാമൂഹ്യ നിലവാരം ഉയര്ത്തുന്നതിനുമായി വാത്സല്യ നിധി പദ്ധതിക്കായി 10 കോടി രൂപ അനുവദിച്ചെങ്കിലും അപേക്ഷ പോലും വിളിക്കാതെ പദ്ധതി പൂര്ണമായും ഉപേക്ഷിച്ചു. ഇത് സംബന്ധിച്ച് മുഖ്യമന്ത്രിക്കും പട്ടികജാതി വര്ഗ വകുപ്പ് മന്ത്രിക്കും പട്ടികജാതി മോര്ച്ച പരാതി നല്കിയിട്ടും യാതൊരു നടപടിയും ഉണ്ടാകാത്തതിനെ തുടര്ന്നാണ് പട്ടികജാതി മോര്ച്ച സംസ്ഥാന പ്രസിഡന്റ് ഷാജുമോന് വട്ടേക്കാട് ദേശീയ പട്ടികജാതി കമ്മീഷന് പരാതി നല്കിയത്.
