മെല്‍ബണ്‍: ലോകമത പാര്‍ലമെന്റിനെ തുടര്‍ന്ന് കഴിഞ്ഞദിവസം ആസ്‌ട്രേലിയയില്‍ ശ്രീനാരായണഗുരു സോഷ്യല്‍ സൊസൈറ്റിയുടെ ആഭിമുഖ്യത്തില്‍ ഗുരുദര്‍ശന സമീക്ഷ സംഘടിപ്പിച്ചു. ദൈവദശകം ആലപിച്ച ശേഷം ശ്രീനാരായണ ധര്‍മ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ ഗുരുദര്‍ശന സമീക്ഷ ഉദ്ഘാടനം ചെയ്തു. പാശ്ചാത്യമെന്നും പൗരസ്ത്യമെന്നുമുള്ള വേര്‍തിരിവുകള്‍ ഇല്ലാതായി ലോകം ഒന്നായി തീരുന്ന ഒരു കാലം ഉണ്ടാകുമെന്ന് ഗുരുദേവന്‍ പ്രവചിച്ചിട്ടുണ്ടെന്ന് സ്വാമി സച്ചിദാനന്ദ പറഞ്ഞു.
ജനറല്‍ സെക്രട്ടറി സ്വാമി ശുഭാംഗാനന്ദ അനുഗ്രഹപ്രഭാഷണം നടത്തി. ഡോ. ശശി തരൂര്‍ എംപി മുഖ്യപ്രഭാഷണവും മഞ്ജു സേനന്‍ വിശദീകരണ പ്രസംഗവും നടത്തി. ഫാ. ജിബിന്‍ സാബു (ഓര്‍ത്തഡോക്‌സ് ചര്‍ച്ച്), മുന്‍ ട്രഷറര്‍ സ്വാമി വിശാലാനന്ദ, സ്വാമി ധര്‍മ്മചൈതന്യ, സ്വാമി അസംഗാനന്ദഗിരി, മങ്ങാട് ബാലചന്ദ്രന്‍, കെ. ജി. ബാബുരാജന്‍ ബഹറിന്‍, കെ. മുരളീധരന്‍ (മുരളിയാ) അബുദാബി, അനൂപ് (മെഡിമിക്‌സ്), മനോജ് (ദല്‍ഹി), ഗോകുലം ഗോപാലന്‍, ഡോ. സിദ്ദിഖ് അഹമ്മദ് ഹാജി, ചാണ്ടി ഉമ്മന്‍ എംഎല്‍എ, പ്രോഗ്രാം ഓര്‍ഗനൈസര്‍ ഫിന്നി മാത്യു തുടങ്ങിയവര്‍ പങ്കെടുത്തു. സര്‍വമതസമ്മേളന ശതാബ്ദി ആഗോളതല ആഘോഷത്തിന്റെ ഭാഗമായി മെല്‍ബണ്‍ വിക്ടോറിയ പാര്‍ലമെന്റില്‍ നടന്ന ലോകമതപാര്‍ലമെന്റില്‍ ആസ്‌ട്രേലിയന്‍ സര്‍ക്കാര്‍ ശ്രീനാരായണ ഗുരുദേവന്റെ ചിത്രം ആലേഖനം ചെയ്ത ഗുരുദേവസ്മാരക സ്റ്റാമ്പ് പുറത്തിറക്കി. ശ്രീനാരായണ ധര്‍മ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ, ജനറല്‍ സെക്രട്ടറി സ്വാമി ശുഭാംഗാനന്ദ എന്നിവര്‍ക്ക് നല്‍കി ആസ്‌ട്രേലിയന്‍ ഗവ. വിപ്പ് ലീ ടര്‍ലാമീസ്, പാര്‍ലമെന്ററി സെക്രട്ടറി ഷീനവാട്ട് എന്നിവര്‍ ചേര്‍ന്ന് സ്റ്റാമ്പ് പ്രകാശനം നിര്‍വഹിച്ചു.
