തിരുവനന്തപുരം : ജനാധിപത്യത്തിന്റെ പുതിയ മാതൃക സമ്മാനിക്കാനുള്ള തയാറെടുപ്പിലാണെന്ന് മുഖ്യമന്ത്രി പിണറായി വിജയന്. നവകേരളം സിറ്റിസണ്സ് പ്രോഗ്രാം എന്ന പേരില് നവകേരള വികസന ക്ഷേമ പരിപാടി നടപ്പാക്കുമെന്നും സംസ്ഥാനത്തിന്റെ പുരോഗതിക്കും വികസനത്തിനും കരുത്തും ദിശാ ബോധവും സമ്മാനിക്കുമെന്നും അദ്ദേഹം വാര്ത്താസമ്മേളനത്തില് പറഞ്ഞു.
അഭിപ്രായങ്ങളും നിര്ദ്ദേശങ്ങളും സ്വീകരിച്ച് ജനങ്ങള്ക്ക് പറയാനുള്ളത് കേള്ക്കും. സമഗ്ര പഠന റിപ്പോര്ട്ട് തയാറാക്കും. വരും കാല നാടിന്റെ പുരോഗതിക്ക് രൂപരേഖ ഉണ്ടാക്കും.
സന്നദ്ധ പ്രവര്ത്തകര് വീടുകള് തോറും എത്തി വിവരങ്ങള് ശേഖരിക്കും. നവകേരള നിര്മ്മിതിയില് ഏറെ മുന്നേറാന് സര്ക്കാരിന് കഴിഞ്ഞു. ജനുവരി ഫെബ്രുവരി മാസങ്ങളില് വീടുകള് തോറും വിവര ശേഖരണം നടത്തും. ക്രോഡീകരിച്ച റിപ്പോര്ട്ട് ശുപാര്ശ സഹിതം നല്കും. വാര്ഡുകള് തോറും വീടുകള് കയറിയാണ് വിവരശേഖരണം നടത്തുക. കൂടാതെ ജനങ്ങളില്നിന്ന് ആശയങ്ങളും അഭിപ്രായങ്ങളും സ്വീകരിച്ച് പരാതികള്ക്ക് പരിഹാരം കാണാന് സിറ്റിസണ് കണക്ട് പ്രവര്ത്തനമാരംഭിച്ചു.
നവകേരള നിര്മിതി പ്രവര്ത്തനങ്ങള് എല്ലാ മേഖലയിലും നടക്കുന്നു. കേരളത്തിന്റെ മുഖച്ഛായ മാറുന്നതിന്നുള്ള പ്രവര്ത്തനങ്ങളാണ് നടക്കുന്നത്.ഏറ്റവും മികച്ച ആരോഗ്യ സംവിധാനവും വിദ്യാഭ്യാസ സംവിധാനവും ഒരുക്കാന് സംസ്ഥാനത്തിന് കഴിഞ്ഞിട്ടുണ്ട്. ഈ നേട്ടങ്ങള്ക്കൊപ്പം ജനാധിപത്യത്തെ ശാക്തീകരിക്കുന്ന പ്രവര്ത്തനങ്ങളും ഒപ്പം കൊണ്ടുപോയി. തിരഞ്ഞെടുപ്പ് പ്രചരണ പരിപാടിയിലെ ഓരോ വാഗ്ദാനവും പൂര്ത്തീകരിച്ചു. പ്രോഗ്രസ് റിപ്പോര്ട്ടിലൂടെ ഇത് ജനങ്ങളെ അറിയിക്കുന്ന സമ്പ്രദായവും തുടങ്ങിയെന്ന് മുഖ്യമന്ത്രി പറഞ്ഞു.
കേരള മോഡല് ലോക ശ്രദ്ധ നേടിയെന്ന് മുഖ്യമന്ത്രി അവകാശപ്പെട്ടു. ജനങ്ങളുമായി സംവദിച്ചാണ് എല്ഡിഎഫ് സര്ക്കാര് നാടിന്റെ പുരോഗതി ഉറപ്പാക്കുന്നത്.ജനപക്ഷ നയങ്ങള് സ്വീകരിച്ചാണ് ഉയര്ന്ന നിലവാരത്തിലുള്ള നാടായി കേരളത്തെ മാറ്റിയത്. സര്ക്കാരിന് ജനപക്ഷ നയങ്ങളാണുള്ളതെന്ന് മുഖ്യമന്ത്രി പറഞ്ഞു.
