കോട്ടയം: പ്രതിഷേധ സമരങ്ങളില് ഭരണമുന്നണി പുറത്തെടുക്കുന്ന മന്ത്രിമാരെ രക്ഷപ്പെടുത്തല് പ്രക്രിയ കോണ്ഗ്രസിനോട് മതിയെന്നും ബിജെപിക്ക് അതേ നാണയത്തില് മറുപടി നല്കാന് അറിയാമെന്നും മേഖലാ പ്രസിഡന്റ് എന്. ഹരി.
ശബരിമലയിലെ സ്വര്ണക്കൊള്ളയ്ക്കെതിരെ ബിജെപി നടത്തിയ പ്രതിഷേധ മാര്ച്ചിനെ സിപിഎമ്മിന്റെ ഗുണ്ടാ ബലവും അധിക്ഷേപവും കൊണ്ട് വിരട്ടാമെന്ന് കരുതേണ്ട.
ദേവസം മന്ത്രി വി എന് വാസവന്റെ ഏറ്റുമാനൂരിലെ ഓഫീസിലേക്ക് നടത്തിയ മാര്ച്ചില് പങ്കെടുത്ത സഹോദരിമാര്ക്ക് നേരെ സഖാക്കള് അഴിഞ്ഞാടുകയായിരുന്നു. എട്ടുമുക്കാല് അട്ടി പ്രയോഗവും ദേഹ നിന്ദയും ഗുരുദക്ഷണിയായി ലഭിച്ച സഖാക്കന്മാരുടെ തിണ്ണ മിടുക്ക് ബിജെപിയോട് വേണ്ട.
സ്വതന്ത്ര ഭാരതത്തില് ഭരണകൂട ഒത്താശയോടെ ക്ഷേത്രങ്ങളെ കൊള്ളയടിക്കുന്ന ഏക ഭരണകൂടം സിപിഎമ്മിന്റെതാണ്. ധാര്മിക ഉത്തരവാദിത്തം ഏറ്റെടുത്ത് രാജിവെക്കാന് ദേവസ്വം മന്ത്രിയും ബോര്ഡും സ്വമേധയാ തയാറാക്കേണ്ടതായിരുന്നു. ശബരിമലയിലെ തീവെട്ടി കൊള്ളയ്ക്ക് പിന്നാലെ ഏറ്റുമാനൂര് ഗുരുവായൂര് ക്ഷേത്രങ്ങളിലും ആരോപണം ഉയര്ന്നിട്ടുണ്ട്.
കേരളത്തിലെ ക്ഷേത്രങ്ങളെ കൊള്ളയടിക്കുന്ന അവിശ്വാസി സര്ക്കാരിനെതിരെ ഇനിയും പ്രതികരിക്കും.ശബരിമലയില് ആചാരലംഘനത്തിന് എതിരെ നടത്തിയ നാമജപ ഘോഷയാത്രകളെ പോലും തല്ലിച്ചതച്ച സര്ക്കാര് ആണ് കേരളം ഭരിക്കുന്നത്. ക്ഷേത്രങ്ങളെ വെറും കച്ചവട കണ്ണോടെ കാണുന്ന ഭരണകൂടം പ്രാര്ത്ഥനാനിരതമായ എതിര്പ്പുകളെ പോലും ചവിട്ടി അരയ്ക്കുമെന്ന് കേരളം കണ്ടതാണ്.
യുവതി പ്രവേശന കാലത്തെ പൊലീസ് ഭീകരതയുടെ മുറിപ്പാടുകളുമായാണ് ശബരിമലയെ സംരക്ഷിക്കാന് വീണ്ടും ബിജെപി തെരുവില് ഇറങ്ങുന്നത്. ആ തീ ജ്വാലയെ അണയ്ക്കാനോ പ്രതിരോധിക്കാനോ സഖാക്കള്ക്ക് കഴിയില്ലെന്ന് എന് ഹരി പറഞ്ഞു.
