അമിത് ഷായുടെയും നിര്‍മ്മലയുടെയും ഇടപെടല്‍ ഫലം കണ്ടു;ടാറ്റയ്‌ക്കുള്ളിലെ തര്‍ക്കം തീര്‍ത്ത് ടാറ്റ ട്രസ്റ്റ് ബോര്‍ഡ് അംഗങ്ങള്‍

മുംബൈ: ടാറ്റാ ട്രസ്റ്റ് ബോര്‍ഡിലെ ആറ് അംഗങ്ങള്‍ തമ്മില്‍ നിലനിന്നിരുന്ന തര്‍ക്കങ്ങളും ഭിന്നതകളും ആറേമുക്കാല്‍ മണിക്കൂര്‍ നീണ്ട ടാറ്റാ ട്രസ്റ്റ് ബോര്‍ഡ് യോഗത്തില്‍ ഒത്തുതീര്‍ന്നു. കഴിഞ്ഞ ദിവസം ടാറ്റാട്രസ്റ്റിനുള്ളിലെ ഭിന്നത തീര്‍ക്കാന്‍ കേന്ദ്ര ആഭ്യന്തരമന്ത്രി അമിത് ഷായും ധനമന്ത്രി നിര്‍മ്മല സീതാരാമനും ഇടപെട്ടിരുന്നു. ഇവരുടെ ഇടപെടല്‍ ഫലം കണ്ടതായാണ് റിപ്പോര്‍ട്ടുകള്‍.

വിവിധ ടാറ്റാഗ്രൂപ്പ് കമ്പനികളുടെ ലാഭവീതമായ 1712 കോടി രൂപ ജീവകാരുണ്യപ്രവര്‍ത്തനങ്ങള്‍ക്ക് ഉപയോഗിക്കുന്നതിനെക്കുറിച്ചുള്ള ചര്‍ച്ചയിലും ടാറ്റാ ട്രസ്റ്റ് ബോര്‍ഡ് യോഗത്തില്‍ ധാരണയായതായി അറിയുന്നു. പക്ഷെ തീരുമാനം എന്തെന്നത് വെളിപ്പെടുത്തിയിട്ടില്ല.

അഭിപ്രായഭിന്നതകള്‍ കൂട്ടായചര്‍ച്ചകളിലൂടെ പരിഹരിക്കാമെന്ന് ധാരണയായിട്ടുണ്ട്. വ്യക്തി താല്പര്യത്തിനപ്പുറത്ത് ടാറ്റാ ട്രസ്റ്റിന്റെ പൊതുതാല്പര്യങ്ങള്‍ക്ക് പ്രാധാന്യം നല്‍കണമെന്നും തീരുമാനമായി. 2024-25ലെ സാമ്പത്തിക റിപ്പോര്‍ട്ട് പ്രകാരം ടാറ്റാ സണ്‍സില്‍ നിന്നുള്ള 1712 കോടി രൂപ ജീവകാരുണ്യ പ്രവര്‍ത്തനങ്ങള്‍ക്കുള്ള സ്ഥാപനങ്ങളിലേക്ക് ടാറ്റാ ട്രസ്റ്റ് നീക്കിവെച്ചിരുന്നു. ടാറ്റാ സണ്‍സില്‍ 66 ശതമാനം ഓഹരി പങ്കാളിത്തം ടാറ്റാ ട്രസ്റ്റിനുണ്ട്. അതിനാലാണ് ടാറ്റാ ട്രസ്റ്റിലെ ആറ് ബോര്‍ഡംഗങ്ങള്‍ എടുക്കുന്ന നയതീരുമാനങ്ങള്‍ ടാറ്റയെ സംബന്ധിച്ച് നിര്‍ണ്ണായകമാവുന്നത്. അതിനാല്‍ തന്നെ ഈ ആറ് ബോര്‍ഡംഗങ്ങള്‍ തമ്മിലുള്ള അഭിപ്രായഭിന്നതകളും വലിയ ആശങ്കയുണ്ടാക്കും. അതിനാലാണ് അത് പരിഹരിക്കാന്‍ കേന്ദ്രസര്‍ക്കാര്‍ തന്നെ നേരിട്ട് രംഗത്തിറങ്ങിയത്.

രത്തന്‍ ടാറ്റയുടെ മരണ ശേഷം നോയല്‍ ടാറ്റ ചെയര്‍മാന്‍ പദവിയില്‍ എത്തിയതോടെ അദ്ദേഹത്തിന്റെ പല തീരുമാനങ്ങളും ടാറ്റാ ട്രസ്റ്റിലെ അംഗങ്ങള്‍ ചോദ്യം ചെയ്യാന്‍ തുടങ്ങിയതോടെയാണ് അഭിപ്രായഭിന്നതകള്‍ പുറത്തുവന്നു തുടങ്ങിയത്. ഉപ്പ് തൊട്ട് കര്‍പ്പൂരം വരെ സൂര്യന് കീഴിലുള്ള ഒട്ടുമിക്ക എല്ലാ മേഖലകളിലും ടാറ്റാഗ്രൂപ്പിന് സാന്നിധ്യമുണ്ട്. ഇന്ത്യയിലെ ഏറ്റവും വലിയ കോര്‍പറേറ്റ് ഭീമനായ ടാറ്റയിലെ തര്‍ക്കം ലോകമെമ്പാടും ചൂടന്‍ ചര്‍ച്ചാവിഷയമാണ്. ഇതോടെയാണ് കേന്ദ്രസര്‍ക്കാരിലെ രണ്ട് കാബിനറ്റ് മന്ത്രിമാരായ ആഭ്യന്തരമന്ത്രി അമിത് ഷായും ധനമന്ത്രി നിര്‍മ്മല സീതാരാമനും ടാറ്റാട്രസ്റ്റിലെ നോയല്‍ ടാറ്റ, വൈസ് ചെയര്‍മാന്‍ വേണു ശ്രീനിവാസന്‍, ടാറ്റ സണ്‍സ് ചെയര്‍മാന്‍ എന്‍ ചന്ദ്രശേഖരന്‍, ടാറ്റ ട്രസ്റ്റ് ട്രസ്റ്റി ഡാരിയസ് ഖംബട്ട എന്നിവരുമായി ചര്‍ച്ചകള്‍ നടത്തിയിരുന്നു. ഈ ചര്‍ച്ചയാണ് ഒക്ടോബര്‍ 10ന്റെ ടാറ്റാ ട്രസ്റ്റ് ബോര്‍ഡില്‍ ഐക്യം തിരികെകൊണ്ടുവന്നത്.