കൊച്ചി: സംഘ ആദര്ശത്തിലേക്ക് കൈപിടിച്ചെത്തിച്ച സ്വര്ഗീയ പി. മാധവ്ജിക്കൊപ്പം തന്നെയാണ് പി.ഇ.ബി. മേനോന്റെ അന്ത്യവിശ്രമവും. ഇന്ന് ഉച്ചതിരിഞ്ഞ് 2 ന് ആലുവ വെളിയത്തുനാട് തന്ത്രവിദ്യാപീഠത്തിലെ മാധവ്ജി അന്ത്യവിശ്രമം കൊള്ളുന്ന മാധവ്ജി സ്മൃതിമണ്ഡപത്തില് തന്നെയാണ് പി.ഇ.ബി. മേനോനും അന്ത്യവിശ്രമസ്ഥാനം ഒരുങ്ങുന്നത്.
തന്ത്രവിദ്യാപീഠം ആചാര്യനായിരുന്ന കല്പ്പുഴ ദിവാകരന് നമ്പൂതിരിപ്പാട് അന്ത്യവിശ്രമം കൊള്ളുന്നതും ഇവിടെ തന്നെയാണ്. 1973 ല് ആലുവ വിദ്യാധിരാജ സ്കൂളിന്റെ ഉടമസ്ഥതയുള്ള ഗീതാഭവന് ട്രസ്റ്റ് സംഘടിപ്പിച്ച ഒരു ചടങ്ങില് പ്രഭാഷണത്തിനെത്തിയപ്പോഴാണ് ആര്എസ്എസ് പ്രചാരകനായിരുന്ന പി. മാധവ്ജിയെ അദ്ദേഹം കണ്ടുമുട്ടുന്നത്. അതൊരു പരിവര്ത്തനത്തിന്റെ മുഹൂര്ത്തമായിരുന്നു.
മാധവ്ജിയുമായി സംസാരിച്ചപ്പോള് ഒരു പുതിയ വെളിച്ചം, ദര്ശനം ലഭിച്ച പ്രതീതിയായിരുന്നു മേനോന് സാറിന്. മാധവ്ജി തെളിയിച്ച പ്രകാശത്തിലൂടെയായിരുന്നു പിന്നീടുള്ള യാത്ര. കേരള ക്ഷേത്രസംരക്ഷണ സമിതിയുടെ പ്രവര്ത്തനങ്ങളിലൂടെയാണ് തുടക്കം. സമിതിയുടെ 11 ാമത് സംസ്ഥാന സമ്മേളനത്തിന്റെ സ്വാഗതസംഘ അധ്യക്ഷനായി. പിന്നീട് സംസ്ഥാന ജോ. സെക്രട്ടറിയും ഉപാധ്യക്ഷനുമായി. തുടര്ന്ന് സംഘ ചുമതലകളിലേക്ക്. മാധവ്ജിയുടെ സ്വപ്ന സാക്ഷാത്കാരമായ തന്ത്രവിദ്യാപീഠത്തിന്റെ ചുമതല വിടപറയുന്നതുവരെ വഹിച്ചിരുന്നു. അവസാനം മാധവ്ജിക്കൊപ്പം അന്ത്യവിശ്രമവും.
