നീലേശ്വരം: പ്രണയം നടിച്ച് വീട്ടമ്മയിൽ നിന്നും സ്വർണാഭരണങ്ങൾ തട്ടിയെടുത്തെന്ന പരാതിയിൽ യൂത്ത് കോൺഗ്രസ് നേതാവ് അറസ്റ്റിൽ. യൂത്ത് കോൺഗ്രസ് നീലേശ്വരം മണ്ഡലം ജനറൽ സെക്രട്ടറിയും ഐഎൻടിയുസി നേതാവുമായ നീലേശ്വരം മാർക്കറ്റിലെ കാട്ടിക്കുളത്ത് ഷെനീറാണ് അറസ്റ്റിലായത്. കോഴിക്കോട് മെഡിക്കൽ കോളേജ് പൊലീസ് സ്റ്റേഷൻ പരിധിയിൽ താമസിക്കുന്ന വീട്ടമ്മയാണ് പരാതിക്കാതി. പ്രണയം നടിച്ച് പത്തു പവൻ സ്വർണാഭരണം തട്ടിയെടുത്തു എന്നാണ് പരാതി.
ഏതാനും മാസം മുമ്പ് ചന്തേര പൊലീസ് സ്റ്റേഷൻ പരിധിയിലെ ഒരു വീട്ടമ്മയെയും സമാനരീതിയിൽ ഇയാൾ തട്ടിപ്പിനിരയാക്കിയിരുന്നു. വീട്ടമ്മ പൊലീസിൽ പരാതി നൽകിയെങ്കിലും പണം തിരിച്ചുനൽകി അന്ന് കേസ് ഒതുക്കിതീർക്കുകയായിരുന്നു.വ്യാജ ഫെയ്‌സ്ബുക്ക് അക്കൗണ്ട് വഴിയാണ് ഇയാൾ വീട്ടമ്മയുമായി ബന്ധം സ്ഥാപിച്ചത്. പരിചയപ്പെട്ട് മൂന്നുദിവസം കൊണ്ടാണ് പണയം വയ്‌ക്കാൻ എന്ന് പറഞ്ഞ് ഷെനീർ 10 പവൻ തട്ടിയെടുത്തത്.
പിന്നീട് മൊബൈൽ ഫോൺ സ്വിച്ച് ഓഫ് ചെയ്യുകയായിരുന്നു. കബളിപ്പിക്കപ്പെട്ടതായി മനസ്സിലാക്കിയ വീട്ടമ്മ തുടർന്ന് മെഡിക്കൽ കോളേജ് പൊലീസ് സ്റ്റേഷനിൽ പരാതി നൽകി.കേസെടുത്ത മെഡിക്കൽ കോളേജ് പോലീസ് നീലേശ്വരം പൊലീസിന്റെ സഹായത്തോടെയാണ് ഷെനിറിനെ അറസ്റ്റ് ചെയ്‌തത്‌. കോഴിക്കോട് മെഡിക്കൽ കോളേജ് പൊലീസ് ഇൻസ്പെക്‌ടർ കെ. ബൈജുവിന്റെ നേതൃത്വത്തിലുള്ള സംഘമാണ് ഇയാളെ പിടികൂടിയത്.
