തിരുവനന്തപുരം: മുഖ്യമന്ത്രി പിണറായി വിജയൻ സൗദി അറേബ്യ സന്ദർശിക്കാനൊരുങ്ങുന്നു. ഈ മാസം 17 മുതൽ 19 വരെയാണ് മുഖ്യമന്ത്രി സൗദി അറേബ്യ സന്ദർശിക്കുന്നത്. ഔദ്യോഗിക ആവശ്യങ്ങൾക്കായാണ് മുഖ്യമന്ത്രി സൗദി സന്ദർശിക്കുന്നത്. മുഖ്യമന്ത്രിയായതിനു ശേഷം ആദ്യമായാണ് പിണറായി സൗദി സന്ദർശിക്കുന്നത്. ഈ മാസം 16 ന് ബഹ്റൈനിലേക്ക് പോകുന്ന മുഖ്യമന്ത്രി, ബഹ്റൈനിലെ ഏകദിന സന്ദർശനത്തിനു ശേഷമാണ് സൗദിയിലേക്ക് തിരിക്കുക.
സൗദിയിലെ വിവിധ പരിപാടികളിൽ മുഖ്യമന്ത്രി പങ്കെടുക്കും.കേരളാ സർക്കാരിന്റെ മലയാളം മിഷൻ സൗദി ചാപ്റ്ററിന്റെ ‘മലയാളോത്സവം’ പൊതു പരിപാടിയിൽ സംബന്ധിക്കാനാണ് മുഖ്യമന്ത്രി എത്തുന്നത്. ദമാം, റിയാദ്, ജിദ്ദ എന്നിവിടങ്ങളിൽ സംഘടിപ്പിക്കുന്ന ‘മലയാളോത്സവ’ത്തിൽ അദ്ദേഹം പങ്കെടുക്കും. മലയാള ഭാഷാ പഠനത്തിനും പ്രചരണത്തിനുമായി ആഗോള തലത്തിൽ പ്രവർത്തിക്കുന്ന സംവിധാനമാണ് കേരള സർക്കാരിന്റെ മലയാളം മിഷൻ.
ഈ മാസം 17 ന് ദമാമിലും, 18 ന് ജിദ്ദയിലും, 19 ന് റിയാദിലുമാണ് ‘മലയാളോത്സവം’ നടക്കുന്നത്. സാംസ്കാരിക മന്ത്രി സജി ചെറിയാൻ, മറ്റു മന്ത്രിമാർ, നോർക്ക ഡയറക്ടർ ബോർഡ് അംഗങ്ങൾ എന്നിവരും മുഖ്യമന്ത്രിക്കൊപ്പമുണ്ടാകും.
