കോട്ടയം: അധ്യാപക നിയമനത്തിലെ ഭിന്നശേഷി സംവരണവുമായി ബന്ധപ്പെട്ട് ക്രൈസ്തവ സഭകള് ഒന്നാകെ പിണറായി സര്ക്കാരുമായി ഇടഞ്ഞതോടെ അപകടം മണത്ത കേരള കോണ്ഗ്രസ് എം അനുരഞ്ജന നീക്കവുമായി രംഗത്തിറങ്ങി. വിദ്യാഭ്യാസ മന്ത്രി ശിവന്കുട്ടിയുമായി നേര്ക്കുനേര് ഏറ്റുമുട്ടലിലേക്ക് പ്രശ്നം വളര്ന്നതോടെയാണ് ചെയര്മാന് ജോസ് കെ മാണി രംഗത്തിറങ്ങാന് നിര്ബന്ധിതനായത്.
എയ്ഡഡ് സ്കൂള് മേഖല നേരിടുന്ന പ്രതിസന്ധികളെക്കുറിച്ച് ക്രൈസ്തവസഭ മാനേജ്മെന്റുകള് ഉന്നയിക്കുന്ന വിഷയങ്ങള് എല്ഡിഎഫ് സര്ക്കാര് ഉടന് രമ്യമായി പരിഹരിക്കുമെന്ന ഉറപ്പുമായി സഭാ ആസ്ഥാനങ്ങളില് കയറിയിറങ്ങുകയാണ് കേരള കോണ്ഗ്രസ് എം നേതാക്കള്. ജോസ് കെ. മാണി നേരിട്ട് സഭാ നേതൃത്വത്തെ ഫോണില് വിളിച്ച് ആശ്വസിപ്പിക്കുന്നുമുണ്ട്. അധ്യാപക നിയമനത്തിലെ ഭിന്നശേഷി സംവരണ നിയമന കാര്യത്തില് എന്എസ്എസ് മാനേജുമെന്റ് കോടതിയെ സമീപിച്ച് അനുകൂല വിധി സമ്പാദിച്ചിരുന്നു. എന്നാല് ആ വിധി എന്എസ്എസ് സ്കൂളുകള്ക്കു മാത്രമാണ് ബാധകമായത്. ഇതേത്തുടര്ന്നാണ് ക്രൈസ്ത മാനേജുമെന്റുകള് ഉടക്കിയത്.
ക്രൈസ്തവ സഭകളും സര്ക്കാരും തമ്മില് ചര്ച്ചകള് ആവശ്യമാണെങ്കില് കേരള കോണ്ഗ്രസ് എം മുന്കൈയെടുക്കുമെന്ന് ജോസ് കെ. മാണി പറയുന്നു. വളരെ അനുഭാവപൂര്ണമായ നിലപാടാണ് ഇക്കാര്യത്തില് സര്ക്കാര് സ്വീകരിച്ചിട്ടുള്ളതെന്നും അദ്ദേഹം അവകാശപ്പെടുന്നുണ്ട്.
