ചെന്നൈ: ചെന്നൈയിലെ അയ്യപ്പന്താങ്കല് ഗവണ്മെന്റ് ഹയര് സെക്കന്ഡറി സ്കൂളില് മുന്കൂര് അനുമതിയില്ലാതെ ഗുരു പൂജയും കായിക പരിശീലനവും നടത്തിയതിന് 47 ആര്എസ്എസ് അംഗങ്ങളെ പോരൂരിനടുത്ത് വെച്ച് കസ്റ്റഡിയിലെടുത്ത് ചെന്നൈ പോലീസ്.
ഇതിനെതിരെ കടുത്ത വിമര്ശനവുമായി തമിഴ്നാട് ബിജെപി നേതാവ് തമിഴ്സൈ സൗന്ദരരാജന് രംഗത്തെത്തി. വര്ഷങ്ങളായി പരിപാടികള് നടത്തുന്ന സ്ഥലത്താണ് അവര് ശാഖ നടത്താന് ശ്രമിച്ചതെന്നും പറഞ്ഞു.
ദിവസേനയുള്ള സാമൂഹിക വിരുദ്ധ പ്രവര്ത്തനങ്ങള് കണ്ടില്ലെന്ന് നടിക്കുമ്പോള് ദേശീയവും പരമ്പരാഗതവും ആത്മീയവും രാജ്യസ്നേഹപരവുമായ സാംസ്കാരിക പരിപാടികള് തടയുകയാണെന്ന് മുഖ്യമന്ത്രി എം കെ സ്റ്റാലിന്റെ നേതൃത്വത്തിലുള്ള തമിഴ്നാട് സര്ക്കാരിനെ സൗന്ദരരാജന് വിമര്ശിച്ചു. അറസ്റ്റ് അത്യധികം അപലപനീയവും ജനാധിപത്യവിരുദ്ധവുമാണെന്നും കസ്റ്റഡിയിലുള്ളവരെ ഉടന് വിട്ടയക്കണമെന്നും അവര് ആവശ്യപ്പെട്ടു.
ആര്എസ്എസിന്റെ 100-ാം വാര്ഷികം ആഘോഷിക്കുന്ന വിജയദശമി ദിനത്തിലാണ് അറസ്റ്റ് നടന്നത്.
തമിഴ്നാട്ടിലെ സാമൂഹിക വിരുദ്ധ പ്രവര്ത്തനങ്ങളെയും, മോശമായി വരുന്ന ക്രമസമാധാന നിലയെയും എംകെ സ്റ്റാലിന് സര്ക്കാര് കണ്ടില്ലെന്ന് നടിക്കുന്നു. എന്നാല് ദേശീയവും പരമ്പരാഗതവും ആത്മീയവും രാജ്യസ്നേഹപരവുമായ സാംസ്കാരിക പ്രവര്ത്തനങ്ങള് തടയുന്നു. ഇത് ഡിഎംകെയുടെ ദേശവിരുദ്ധ മനോഭാവം വ്യക്തമാക്കുന്നുവെന്ന് സൗന്ദരാജന് വ്യക്തമാക്കി.
പോലീസ് കസ്റ്റഡിയിലുള്ള ആര്എസ്എസ് കാര്യകര്ത്താക്കളെ സൗന്ദരരാജന് സന്ദര്ശിക്കുകയും ധാര്മ്മിക പിന്തുണ അറിയിക്കുകയും, അവരെ കസ്റ്റഡിയിലെടുത്തതിന്റെ കാരണം പോലീസിനോട് ചോദിക്കുകയും ചെയ്തു. 47 പേര് മാത്രമടങ്ങുന്ന ഒരു ചെറിയ കൂട്ടം ആളുകളാണ് പരിപാടി നടത്തിയതെന്നും മുന്കൂര് അനുമതിയില്ലാതെ വര്ഷങ്ങളായി ഇതേ സ്ഥലത്ത് ഇത്തരം പരിപാടികള് നടക്കുന്നുണ്ടെന്നും അവര് ചൂണ്ടിക്കാട്ടി.
മുന്കൂര് അനുമതി വാങ്ങാതെ പരിപാടി നടത്തിയതിനാണ് പ്രവര്ത്തകരെ കസ്റ്റഡിയിലെടുത്തതെന്ന് പോരൂര് പോലീസ് പറഞ്ഞു.
സംസ്ഥാനത്തെ ക്രമസമാധാന പ്രശ്നങ്ങളെക്കുറിച്ചും സൗന്ദരരാജന് ആശങ്ക അറിയിച്ചു. മയക്കുമരുന്ന് കടത്ത്, സ്ത്രീകളുടെ സുരക്ഷയ്ക്ക് നേരെയുള്ള ഭീഷണികള് തുടങ്ങിയ പ്രശ്നങ്ങള് അഴിഞ്ഞാടുമ്പോള് സമാധാനപരമായി നടക്കുന്ന
സാംസ്കാരിക സമ്മേളനങ്ങള്ക്ക് എന്തിനാണ് അനുമതിയുടെ ആവശ്യമെന്നും അവര് ചോദ്യം ചെയ്തു.
