അമരാവതി (മഹാരാഷ്‌ട്ര): വിജയദശമി ആഘോഷങ്ങളുടെയും സംഘടനയുടെ ശതാബ്ദി ആഘോഷങ്ങളുടെയും ഭാഗമായി ഒക്‌ടോബറിൽ മഹാരാഷ്‌ട്രയിലെ അമരാവതി ജില്ലയിൽ സംഘടിപ്പിക്കുന്ന പരിപാടിയിൽ പങ്കെടുക്കാൻ ചീഫ് ജസ്റ്റിസ് ബി.ആർ. ഗവായിയുടെ അമ്മയെ രാഷ്‌ട്രീയ സ്വയംസേവക സംഘം ക്ഷണിച്ചുവെന്ന് ഇന്ത്യാ ടുഡേ റിപ്പോർട്ട് ചെയ്യുന്നു.
ഒക്ടോബർ അഞ്ചിന് അമരാവതിയിലെ കിരൺ നഗർ പ്രദേശത്തുള്ള നർസമ്മ മഹാവിദ്യാലയ മൈതാനത്ത് ആർഎസ്എസിന്റെ അമരാവതി മഹാനഗർ ശാഖ സംഘടിപ്പിക്കുന്ന പരിപാടിയിൽ ചീഫ് ജസ്റ്റിസ് ബി ആർ ഗവായിയുടെ അമ്മ ഡോ. കമൽതായ് ഗവായിയെ മുഖ്യാതിഥിയായാണ് ക്ഷണിച്ചിരിക്കുന്നത്.
സംഘത്തിന്റെ നൂറാം വാർഷികത്തിൽ പ്രാദേശിക തലത്തിലാണ് രാജ്യവ്യാപകമായി ശതാബ്ദി ആഘോഷ പരിപാടികൾ സംഘടിപ്പിക്കുന്നത്. സംഘടനാ പരിപാടികൾക്ക് പുറമേ രാജ്യമെമ്പാടും ഒരു ലക്ഷത്തിലധികം ‘ഹിന്ദു സമ്മേളനങ്ങളും’ ആയിരക്കണക്കിന് സിമ്പോസിയങ്ങളും ഉൾപ്പെടെ നിരവധി പരിപാടികൾ നടത്താനാണ് പദ്ധതി. ഒക്ടോബർ 2 ന് നാഗ് പുരിലെ സംഘ ആസ്ഥാനത്ത് സർ സംഘചാലക് ഡോ.മോഹൻ ഭഗവതിന്റെ വിജയദശമി വാർഷിക പ്രഭാഷണത്തോടെയാണ് ഒരു വർഷത്തെ ആഘോഷ പരിപാടികൾ തുടങ്ങുന്നത്.
