ചങ്ങനാശ്ശേരി: പമ്പയില്‍ നടന്ന ശബരിമല സമ്മേളനവുമായി ബന്ധപ്പെട്ട് എന്‍എസ്എസ് എടുത്തിരിക്കുന്ന നിലപാട് വിശ്വാസികള്‍ക്ക് ഏറെ ഗുണം ചെയ്യുമെന്ന് ജനറല്‍ സെക്രട്ടറി ജി. സുകുമാരന്‍ നായര്‍. നായര്‍ സര്‍വ്വീസ് സൊസൈറ്റിയുടെ 2024-25 സാമ്പത്തിക വര്‍ഷത്തെ ബാക്കിപത്രം അവതരിപ്പിച്ചുള്ള സമ്മേളനത്തില്‍ സംസാരിക്കുകയായിരുന്നു അദ്ദേഹം.
ശബരിമല വിഷയത്തില്‍ മാത്രമാണ് ഈ നിലപാട്. ഇതില്‍ രാഷ്‌ട്രീയ മുതലെടുപ്പ് നടത്താമെന്ന് ആരും കരുതേണ്ട. എന്‍എസ്എസ് അന്നും ഇന്നും സമദൂര നിലപാടിലാണ്. നാളിതുവരെ സമുദായാചാര്യന്‍ മന്നത്ത് പദ്മനാഭന്റെ നിലപാടുകള്‍ക്കനുസരിച്ച് മാത്രമാണ് എന്‍എസ്എസ് മുന്നോട്ടു പോകുന്നത്.
സംസ്ഥാന സര്‍ക്കാര്‍ ശബരിമലയിലെ ആചാരനുഷ്ഠാനങ്ങള്‍ തെറ്റിക്കുന്നുവെന്ന് വന്നപ്പോള്‍ അതിനെതിരെ എന്‍എസ്എസ് രംഗത്ത് വന്നു. അതിനെതിരെ നാമജപം സംഘടിപ്പിച്ചു. നാമജപഘോഷമായി ശക്തി പ്രാപിച്ചപ്പോള്‍ മാറി നിന്നവരൊക്കെ കൂടെ കൂടി. വീണ്ടും സര്‍ക്കാര്‍ തെറ്റായ നിലപാടിലൂടെ മുന്നോട്ടു പോകുകയാണോയെന്ന് ചിന്തിക്കുന്ന സമയത്താണ് അവര്‍ തന്നെ ശബരിമല സമ്മേളനവുമായി എന്‍എസ്എസിനെ സമീപിച്ചത്. ശബരിമലയിലെ ആചാര-അനുഷ്ഠാനങ്ങള്‍ സംബന്ധിച്ച് എന്‍എസ്എസ് നിലപാട് ശരിയാണെന്നു തോന്നിയതു കൊണ്ടാണ് സര്‍ക്കാരും ദേവസ്വം ബോര്‍ഡും എന്‍എസ്എസിനെ സമീപിച്ചതെന്നും സുകുമാരന്‍ നായര്‍ പറഞ്ഞു.
കോണ്‍ഗ്രസ് എങ്ങനെയെങ്കിലും അധികാരത്തില്‍ ഏറാനുള്ള വ്യഗ്രത മാത്രമാണ് കാണിക്കുന്നത്. ഇതിനു വേണ്ടി അവരും ഒന്നും ചെയ്തില്ല. ഈ നാടിനോടുള്ള കൂറാണോ ഇവര്‍ക്കുള്ളതെന്നും അദ്ദേഹം ചോദിച്ചു.
വരവുചെലവു കണക്കും ബാക്കിപത്രവും അംഗീകരിച്ചു
ചങ്ങനാശ്ശേരി: നായര്‍ സര്‍വീസ് സൊസൈറ്റിയുടെ 2024-25 സാമ്പത്തിക വര്‍ഷത്തെ വരവു-ചെലവു കണക്കും, ഇന്‍കം ആന്റ് എക്‌സ്‌പെന്റിച്ചര്‍ സ്റ്റേറ്റ്‌മെന്റും, ബാക്കിപത്രവും പെരുന്നയില്‍ ചേര്‍ന്ന പ്രതിനിധിസഭായോഗം ഐകകണ്‌ഠേന പാസാക്കി. യോഗത്തില്‍ എന്‍എസ്എസ് പ്രസിഡന്റ് ഡോ. എം ശശികുമാര്‍ അധ്യക്ഷനായി.മുന്നിരിപ്പ് ഉള്‍പ്പെടെ 126,48,56,486 രൂപ മൊത്തം വരവും, 116,24,12,209 രൂപ മൊത്തം ചെലവും 10,24,44,277 രൂപ നീക്കിയിരിപ്പും 1,66,96,476 രൂപ റവന്യൂ കമ്മിയും കാണിക്കുന്ന ഇന്‍കം ആന്റ് എക്‌സ്‌പെന്റിച്ചര്‍ സ്റ്റേറ്റ്‌മെന്റും, ബുക്ക് വാല്യൂ അനുസരിച്ച് 204,33,48,073 രൂപയുടെ സ്വത്ത് വിവരം അടങ്ങുന്ന ബാക്കിപത്രവും, റിപ്പോര്‍ട്ടും എന്‍എസ്എസ് പ്രസിഡന്റ് അവതരിപ്പിച്ചു. എന്‍എസ്എസ് ട്രഷറര്‍ അഡ്വ. എന്‍. വി. അയ്യപ്പന്‍പിള്ള ഓഡിറ്റേഴ്സ് റിപ്പോര്‍ട്ട് അവതരിപ്പിച്ചു. ചര്‍ച്ചകള്‍ക്ക് ശേഷം പൊതുയോഗം ഇത് അംഗീകരിച്ചു. സമ്മേളനത്തില്‍ ജനറല്‍ സെക്രട്ടറി ജി. സുകുമാരന്‍ നായര്‍ അവതരിപ്പിച്ച ഔദ്യോഗിക പ്രമേയങ്ങളും യോഗം പാസാക്കി.
