തനതു ഭാവഭംഗികളോടെയും ഔചിത്യദീക്ഷയോടെയുമാണ് അന്നുമിന്നും ചിറ മഹോത്സവത്തിന്റെ സംവിധാന നിര്‍വഹണം. സീതയുടെ കണ്ണീര്‍ക്കടലിനെ തടഞ്ഞുനിര്‍ത്താനുള്ള ഐതിഹാസിക സേതുബന്ധനത്തിന് നവാവബോധമേകുന്ന സംരംഭം ഈ വൈഷ്ണവ ഗ്രാമത്തിന്റെ ഐഹികവും പാരത്രികവുമായ സ്വപ്‌നസാഫല്യത്തെ തഴുകുന്നു. താപത്രയത്തിനു നേരെ തൊടുത്തുവിടുന്ന രാമശരം പോലെയാണ് തൃപ്രയാറപ്പന്റെ കടാക്ഷം. വിശ്വശാന്തിയുടെ സ്‌നേഹവര്‍ഷം ചൊരിയുന്ന തൃപ്രയാര്‍ തേവര്‍ ചിറകട്ടുത്സവത്തിലെ അനന്താകര്‍ഷക ലയത്തില്‍ വിശ്വരൂപത്തിളക്കമായ് ഉദിച്ചുനില്‍ക്കും. കാരണപൂരുഷനും കാരുണ്യസാഗരവുമായ ശ്രീരാമചന്ദ്രന്റെ അധര്‍മനിഗ്രഹണ വ്യഗ്രതയില്‍ സംസ്ഥാപനം ചെയ്തു വിശ്വകര്‍മാത്മജനായ നളന്റെ വിസ്മയസങ്കല്പത്തില്‍ ആസൂത്രണം ചെയ്ത വീരേതിഹാസമാണ് സേതുബന്ധനം. മൈത്രി, ഐക്യം, ദൃഢവ്രതം, ധീരത, വീരം എന്നീ ശക്തിപ്രഭവങ്ങളെയും മാനവതാ ലക്ഷ്യപ്രമാണങ്ങളെയും തുയിലുണര്‍ത്തുകയാണ് ‘തേവരോണ’ത്തിന്റെ ഫലസിദ്ധി.
പരമാത്മാവില്‍ നിന്ന് ജീവാത്മാവിലേക്കിടുന്ന പാലമാണ് ഭക്തി. രാമനില്‍ നിന്ന് അയോദ്ധ്യാരാമനിലേക്കും അയോദ്ധ്യാരാമനില്‍ നിന്ന് ആത്മാരാമനിലേക്കുമുള്ള ത്യാഗസ്‌നേഹവീര്യങ്ങളുടെ ബന്ധനപ്രാപ്തിയാണ് ഈ ഉത്സവമഹിമയുടെ ആന്തരികത. രാമനും അയോദ്ധ്യാരാമനും ആത്മാരാമനും ഏകമെന്നെണ്ണുന്ന തത്വമസീ ദര്‍ശനത്തിന്റെ ഔപനിഷകസത്തയാണ് അപൂര്‍വമായ ഈ അനുഷ്ഠാനസരണിയിലൂടെ സമൂഹം നേടിയെടുക്കുന്നത്.
യുദ്ധവിജയത്തിന്റെ കനല്‍പ്പാതയാണ് രാമസേതു. വ്യക്തിയെയും സമൂഹത്തെയും രാഷ്‌ട്രത്തെയും ലക്ഷ്യപ്രാപ്തമാക്കുന്ന ധര്‍മ കാഹളങ്ങളും ആയുധക്കോപ്പുകളും ജയാരവമന്ത്രങ്ങളുമായി സ്വയം സൃഷ്ടിച്ച ധര്‍മ ധീരപാതയിലൂടെ ചരിച്ച് കര്‍മഭടന്മാര്‍ നേടുന്ന അധര്‍മക്കുരുതിയുടെയും ധര്‍മസംസ്ഥാപനത്തിന്റെ കര്‍മശ്രേണിയെയും ഐതിഹാസികമായി അടയാളപ്പെടുത്തുകയാണ് സേതുപ്രയാണം. 2025 ഒക്ടോബര്‍ രണ്ടിനാണ് തൃപ്രയാറപ്പന്റെ സേതുബന്ധനം. തൃക്കാക്കരയപ്പനെ അന്ന് വീടുകളില്‍ പ്രതിഷ്ഠിച്ച് ആനന്ദിക്കാം! ശ്രീരാമപാദങ്ങളില്‍ അനന്തകോടി പ്രണാമമര്‍പ്പിക്കാം! രാമരാജ്യത്തിന്റെ വിഭൂതിമാര്‍ഗത്തില്‍ സകലാഭീഷ്ടദായകനായ തൃപ്രയാറപ്പന്റെ അനുഗ്രഹസ്തം ഭക്തശിരസിനുമേല്‍ ഉയരുകയായി. ഉള്ളംതുടിക്കുന്ന രാമരസ മന്ത്രണം ജ്വലിക്കുന്നു ‘ജയ് സീതാറാം’!
(പ്രമുഖ സാഹിത്യകാരനും തിരൂര്‍ തുഞ്ചത്തെഴുത്തച്ഛന്‍ മലയാളം സര്‍വകലാശാല അക്കാദമിക് കൗണ്‍സില്‍ അംഗവുമാണ് ലേഖകന്‍)
ജന്മഭൂമി ഓണ്‍ലൈന്‍