കൊച്ചി: രാഷ്ട്രീയ സ്വയംസേവക സംഘം ശതാബ്ദിയിലെത്തുന്ന പശ്ചാത്തലത്തിൽ കേരളത്തിലെ പ്രവർത്തന ചരിത്രം രേഖപ്പെടുത്തുന്ന ഗ്രന്ഥപരമ്പരയുടെ ആദ്യ ഭാഗമായ ‘രാഷ്ട്രീയ സ്വയംസേവകസംഘം കേരളത്തിൽ’ പ്രകാശനത്തിനൊരുങ്ങി. അഞ്ച് ഭാഗങ്ങളായുള്ള ഈ ഗ്രന്ഥപരമ്പരയുടെ ഒന്നാം ഭാഗം നാളെ (സെപ്തംബർ 26ന്) വൈകിട്ട് ആറിന് ആർഎസ്എസ് ദക്ഷിണകേരള പ്രാന്ത കാര്യാലയമായ എളമക്കര മാധവനിവാസിൽ പ്രകാശനം ചെയ്യും.
റിട്ട. ജസ്റ്റിസ് എം.ആർ. ഹരിഹരൻനായരുടെ അദ്ധ്യക്ഷതയിൽ ചേരുന്ന പരിപാടിയിൽ മുതിർന്ന ആർഎസ്എസ് പ്രചാരകൻ എസ്. സേതുമാധവനാണ് പ്രകാശന കർമ്മം നിർവഹിക്കുന്നത്. പ്രശസ്ത സാഹിത്യകാരൻ സി. രാധാകൃഷ്ണൻ ഗ്രന്ഥം ഏറ്റുവാങ്ങും. ആർഎസ്എസ് ദക്ഷിണ ക്ഷേത്ര സഹബൗദ്ധിക് പ്രമുഖ് കെ.പി. രാധാകൃഷ്ണൻ പുസ്തക പരിചയം നടത്തും. ചിന്മയ മിഷൻ റീജിയണൽ ഹെഡ് സ്വാമി വിവിക്താനന്ദ സരസ്വതി, കൊടുങ്ങല്ലൂർ വിവേകാനന്ദ വേദിക് വിഷൻ ഡയറക്ടർ ഡോ, എം. ലക്ഷ്മികുമാരി, കുരുക്ഷേത്ര പ്രകാശൻ മാനേജിങ് ഡയറക്ടർ കാ.ഭാ. സുരേന്ദ്രൻ എന്നിവർ സംസാരിക്കും. മുതിർന്ന ആർഎസ്എസ് പ്രചാരകൻ എം.എ. കൃഷ്ണൻ, ജന്മഭൂമി മുൻ മുഖ്യപത്രാധിപർ പി. നാരായണൻ എന്നിവർ സംബന്ധിക്കും.,
കേരളത്തിൽ 1942 ൽ പ്രവർത്തനം ആരംഭിച്ചതു മുതൽ സംഘടനാ സംവിധാനമനുസരിച്ച് കേരളപ്രാന്തം രൂപീകൃതമായ 1964 വരെയുള്ള സംഘചരിത്രമാണ് ഒന്നാം ഭാഗത്തിലുള്ളത്. പ്രവർത്തനത്തുടക്കത്തിന്റെയും വികാസത്തിന്റെയും വ്യാപനത്തിന്റെയും സമാജപരിവർത്തനത്തിന്റെയും വസ്തുതാപരമായ വിവരണങ്ങൾ അടങ്ങിയ ഈ ഗ്രന്ഥത്തിൽ തുടക്കം മുതലുള്ള എല്ലാ ഘട്ടങ്ങളുടെയും വിശദാംശങ്ങളുണ്ട്.
