രാജ് കോട്ട് :രണ്ട് ദിവസം മുന്പ് ഗുജറാത്തിലെ ഭാവ് നഗറില് മോദി സന്ദര്ശനം നടത്തിയിരുന്നു. അപ്പോള് സദസ്സിന്റെ മുന്നിരയില് മോദിയുടെ രേഖാചിത്രവുമേന്തി ഒരു പയ്യന് നില്ക്കുന്നത് പ്രധാനമന്ത്രിയുടെ ശ്രദ്ധയില്പ്പെട്ടു. മോദി പ്രസംഗം നടത്തിക്കൊണ്ടിരുന്നപ്പോള് ഉടനീളം മോദിയുടെ ശ്രദ്ധ ആകര്ഷിക്കാനായി താന് വരച്ച ചിത്രം ഉയര്ത്തിക്കാട്ടി നില്ക്കുകയായിരുന്നു ആ പയ്യന്. എങ്ങിനെയെങ്കിലും മോദിയുടെ ശ്രദ്ധ ആകര്ഷിക്കുക എന്നത് തന്നെയായിരുന്നു ആ പയ്യന്റെ ലക്ഷ്യം. പ്രസംഗം തീരാറായപ്പോള് മോദി സുരക്ഷാ ഉദ്യോഗസ്ഥരോട് ആ പയ്യന്റെ ചിത്രം വാങ്ങാന് ആവശ്യപ്പെട്ടു.
രവി പാര്മര് എന്നാണ് ഈ 13 കാരന്റെ പേര്. താന് വരച്ച ചിത്രം മോദി ഏറ്റുവാങ്ങുന്നത് പയ്യന് കണ്ടു. മാത്രമല്ല മോദി ഇതാ തന്റെ ചിത്രത്തെക്കുറിച്ച് അഭിനന്ദന വാക്കുകള് പറയുന്നു. “നന്നായിട്ടുണ്ട്…കുട്ടീ…”. ഇതോടെ നിയന്ത്രണം വിട്ട് രവി പാര്മര് എന്ന 13 കാരന് പൊട്ടിപ്പൊട്ടിക്കരഞ്ഞു. അപ്പോള് മോദി ആ പയ്യനെ ആശ്വസിപ്പിച്ചു. “കരയരുത്. ഞാന് താങ്കളുടെ ചിത്രം സ്വീകരിച്ചുകഴിഞ്ഞു. ആ ചിത്രത്തില് തന്റെ മേല്വിലാസം ഉണ്ടെങ്കില് തീര്ച്ചയായും ഞാന് കത്തയയ്ക്കും.”.
Emotions of a small boy who drew a sketch for modiji ❤️🥹 This is the PM Modi@ArunKosli7@MrSinha_ @kathiyawadiii#Bhavnagar #Gujarat #ModiInBhavnagar pic.twitter.com/anC0WoPtaF
— Manan Trivedi (@itsurbunny7) September 20, 2025
“ഇത്തരം ചെറിയ കുട്ടികളുടെ സ്നേഹം പിടിച്ചുപറ്റലാണ് നമ്മുടെ ജീവിതത്തിലെ വിലമതിക്കാനാകാത്ത മൂലധനം.” മോദി ഇത് പറഞ്ഞ് നിര്ത്തിയപ്പോള് സദസ്സില് നിന്നും നീണ്ട കരഘോഷം മുഴങ്ങി.
ഗുജറാത്തിലെ ഭാവ് നഗറിലെ ഗോഘയ്ക്കടുത്തുള്ള നാഗ് ധനിബ ഗ്രാമത്തിലാണ് രവി പാര്മര് എന്ന 13 കാരന് ജീവിക്കുന്നത്. “മൊബൈല് ഫോണില് മോദിയുടെ ചിത്രം ഡൗണ്ലോഡ് ചെയ്ത ശേഷമാണ് ഞാന് അത് വരയ്ക്കാന് ശ്രമിച്ചത്. അദ്ദേഹത്തെ ഒരിയ്ക്കല് കാണണമെന്നത് എന്റെ സ്വപ്നമായിരുന്നു. അദ്ദേഹം എന്റെ ചിത്രം വാങ്ങുകയും അതിനെ വേദിയില് നിന്നും മോദി പ്രശംസിച്ച് പറയുകയുംചെയ്തപ്പോള് കരച്ചില് അടക്കാനായില്ല. “- തന്റെ അനുഭവം രവി പാര്മര് വിവരിച്ചതിങ്ങിനെ.
“മോദിയുടെ ചിത്രം വരയ്ക്കുമ്പോള് കൂട്ടുകാര് പറഞ്ഞത് മോദി എന്റെ ചിത്രം വാങ്ങില്ല എന്നാണ്. പക്ഷെ പൊലീസുകാരന് ആ ചിത്രവും പിടിച്ച് സദസ്സിന്റെ മുന്നിരയില് നില്ക്കാന് എന്നെ അനുവദിച്ചു. എന്റെ കഠിനപ്രയത്നം മോദി മനസ്സിലാക്കി. ചിത്രം വാങ്ങി.” – എട്ടാം ക്ലാസുകാരനായ രവി പാര്മര് പറയുന്നു.
രവി പാര്മറിന്റെ ഗ്രാമത്തിലെ തലവന് ഹര്ദേവ് സിന്ഹ് ഗോലി പറയുന്നത് കേള്ക്കുക:”രവി പാര്മര് ഒരു കടുത്ത മോദി ആരാധകനാണ്. കഴിഞ്ഞ മൂന്ന് വര്ഷമായി മോദിയെ കാണാന് ആഗ്രഹിക്കുന്നു. ഭാവ് നഗറിലേക്ക് പ്രധാനമന്ത്രി വരുന്നത് അറിഞ്ഞപ്പോഴാണ് കുട്ടി ആ ചിത്രംവരച്ചത്. മോദി പങ്കെടുക്കുന്ന പൊതുജന റാലിയില് തന്നെക്കൂടി കൊണ്ടുപോകണമെന്ന് രവി പാര്മര് തന്റെ അധ്യാപകനോട് അഭ്യര്ത്ഥിക്കുകയായിരുന്നു. അതനുസരിച്ചാണ് രവി പാര്മറെ കൊണ്ടുപോയത്. കുട്ടി താന് വരച്ച മോദിയുടെ ചിത്രവും പിടിച്ച് മുന്നിരയില് സ്ഥാനം പിടിക്കുകയുംചെയ്തു. മോദി അത് കണ്ടു. സ്വീകരിച്ചു”.
