ന്യൂദല്ഹി: പ്രധാനമന്ത്രി നരേന്ദ്രമോദിയുടെ 75-ാം ജന്മദിനത്തോടനുബന്ധിച്ച് രാജ്യമെങ്ങും വിപുലമായ സേവന പ്രവര്ത്തനങ്ങളുമായി ബിജെപി. ജന്മദിനമായ 17 മുതല് മഹാത്മാഗാന്ധിയുടെയും ലാല് ബഹദൂര് ശാസ്ത്രിയുടെയും ജയന്തിദിനമായ ഒക്ടോബര് രണ്ട് വരെ വികസിതവും സ്വാശ്രയവുമായ ഭാരതമെന്ന ആഹ്വാനത്തോടെ സമൂഹത്തിലെ എല്ലാ വിഭാഗങ്ങളുടെയും സജീവപങ്കാളിത്തം ഉറപ്പാക്കി കൊണ്ടാകും പരിപാടികള് സംഘടിപ്പിക്കുകയെന്ന് കേന്ദ്രമന്ത്രി ഭൂപേന്ദ്ര യാദവും ബിജെപി ദേശീയ ജനറല് സെക്രട്ടറി സുനില് ബന്സാലും വാര്ത്താ സമ്മേളനത്തില് അറിയിച്ചു.
സേവനം, ശുചിത്വം, സ്വാശ്രയത്വം, രാഷ്ട്രനിര്മാണം എന്നിവയില് ശ്രദ്ധ കേന്ദ്രീകരിച്ചാണ് പരിപാടികള്. രാജ്യമെമ്പാടും വലിയ തോതിലുള്ള രക്തദാന ക്യാമ്പുകള്, ആരോഗ്യ പരിശോധന ക്യാമ്പുകള്, വിപുലമായ ശുചീ കരണ പ്രവര്ത്തനങ്ങള്, പരിസ്ഥിതി സംരക്ഷണ കാമ്പ യിന്, പ്രദര്ശനങ്ങള്, സംവാദങ്ങള്, സമ്മേളനങ്ങള്, വിശിഷ്ട വ്യക്തികളെ ആദരിക്കല്, ദിവ്യാംഗര്ക്ക് സഹായ ഉപകരണ വിതരണം, 75 കേന്ദ്രങ്ങളില് യുവമോര്ച്ച നമോ യുവ റണ് കൂട്ടയോട്ടം, കായികമേളകള്, ചിത്രരചനാ മത്സരങ്ങള് എന്നിവ സംഘടിപ്പിക്കും.
മോദിയുടെ ജീവിതത്തെയും നേട്ടങ്ങളെയും കുറിച്ചുള്ള പ്രദര്ശനങ്ങള് എല്ലാ ജില്ലകളിലും സംഘടിപ്പിക്കും. പ്രമുഖവ്യക്തികള് പങ്കെടുക്കുന്ന സംവാദങ്ങളും സമ്മേളനങ്ങളും സംഘടിപ്പിക്കും. വിവിധ സംസ്ഥാനങ്ങളിലായി 771 സംവാദ പരിപാടികളാണ് സംഘടിപ്പിക്കുക. 21 മുതല് ഡിസംബര് വരെ കായിക മേളകള് സംഘടിപ്പിക്കും. പണ്ഡിറ്റ് ദീന്ദയാല് ഉപാധ്യായ ജയന്തിയോടനുബന്ധിച്ച് രാജ്യമെമ്പാടും സ്വാശ്രയ ഭാരതം- വികസിത ഭാരതം കാമ്പയിന് ആരംഭിക്കും. സ്വദേശി ഉല്പന്നങ്ങള് പ്രോത്സാഹിപ്പിക്കുന്നതിനായി, ജില്ലകളില് വോക്കല് ഫോര് ലോക്കല് പ്രദര്ശനങ്ങള്, മേളകള് എന്നിവ സംഘടിപ്പിക്കും. ഈ കാമ്പയിന് ഡിസംബര് 25 വരെ തുടരും.
അമ്മയുടെ പേരില് ഒരു മരം പദ്ധതി ഈ മാസം 25 മുതല് വ്യാപകമായി പുനരാരംഭിക്കും. രാജ്യത്തുടനീളം വൃക്ഷത്തൈകള് നടുന്നതും നഗരവനങ്ങളും പാര്ക്കുകളും സൃഷ്ടിക്കുന്നതും ഇതില് ഉള്പ്പെടും. സംസ്ഥാന സര്ക്കാരുകളുടെ പങ്കാളിത്തത്തോടെ, പരിസ്ഥിതി സംരക്ഷണത്തിനായുള്ള ഒരു രാജ്യവ്യാപക പ്രസ്ഥാനമായി മാറ്റാനാണ് പദ്ധതി.
നരേന്ദ്രമോദി രാഷ്ട്രീയത്തില് സേവനത്തെ ശക്തമായ അടിത്തറയായി സ്ഥാപിച്ചതായി ഭൂപേന്ദ്രയാദവ് പറഞ്ഞു. എല്ലാ പ്രതിസന്ധി ഘട്ടങ്ങളിലും ജനങ്ങളെ പ്രചോദിപ്പിച്ചു, പാവപ്പെട്ടവര്ക്കുള്ള ക്ഷേമപദ്ധതികള് താഴെത്തട്ടിലേക്ക് എത്തുന്നുണ്ടെന്ന് ഉറപ്പുവരുത്തി, ഭരണത്തില് സുതാര്യത വര്ധിപ്പിച്ചു, രാജ്യത്തുടനീളം ശുചിത്വസന്ദേശം പ്രചരിപ്പിച്ചു. നരേന്ദ്രമോദിയുടെ നേതൃത്വത്തില്, ശുചിത്വം, ജലസംരക്ഷണം, പരിസ്ഥിതി സംരക്ഷണം എന്നിവയില് രാജ്യം ആഗോള മാതൃക സൃഷ്ടിച്ചു. ഇന്ന് ഒഡിഎഫ് പ്ലസിലേക്ക് അതിവേഗം പുരോഗമിക്കുന്നു, അതേസമയം ശുദ്ധജലവും ശുചിത്വ സൗകര്യങ്ങളും ഗ്രാമപ്രദേശങ്ങളിലേക്ക് പോലും എത്തുന്നുവെന്നും അദ്ദേഹം കൂട്ടിച്ചേര്ത്തു.
