ന്യൂദല്ഹി: സ്വാമി വിവേകാനന്ദന് ചിക്കാഗോയിലെ ലോകമതപാര്ലമെന്റില് നടത്തിയ ചരിത്രപ്രസിദ്ധമായ പ്രസംഗത്തിന്റെ 132-ാം വാര്ഷികദിനത്തില് പ്രസംഗം പങ്കുവെച്ച് പ്രധാനമന്ത്രി നരേന്ദ്രമോദി. 1893 സെപ്തംബര് 11ന് ചിക്കാഗോയില് സ്വാമി വിവേകാനന്ദന് നടത്തിയ പ്രസംഗം ഒരു നിര്ണായക നിമിഷമായി കണക്കാക്കപ്പെടുന്നുവെന്ന് പ്രസംഗം പങ്കുവെച്ച് പ്രധാനമന്ത്രി സാമൂഹ്യമാധ്യമമായ എക്സില് കുറിച്ചു.
ഐക്യത്തിനും സാര്വത്രിക സാഹോദര്യത്തിനും ഊന്നല് നല്കി ലോകവേദിയില് ഭാരത സംസ്കാരത്തിന്റെ ആദര്ശങ്ങളെക്കുറിച്ച് അദ്ദേഹം ആവേശത്തോടെ സംസാരിച്ചു. നമ്മുടെ ചരിത്രത്തില് ഏറ്റവും ആഘോഷിക്കപ്പെട്ടതും പ്രചോദനാത്മകവുമായ നിമിഷങ്ങളില് ഒന്നായിരുന്നു അതെന്നും പ്രധാനമന്ത്രി കുറിച്ചു. സ്വാമി വിവേകാനന്ദന്റെ പ്രസംഗം ഉള്ക്കൊള്ളുന്ന ബേലൂര് മഠത്തിന്റെ വെബ്സൈറ്റിന്റെ ലിങ്കാണ് കുറിപ്പിനൊപ്പം പങ്കുവെച്ചത്.
ആചാര്യ വിനോബ ഭാവെയ്ക്ക് ശ്രദ്ധാഞ്ജലി
ന്യൂദല്ഹി: ആചാര്യ വിനോബ ഭാവെയുടെ ജന്മദിനത്തില് ശ്രദ്ധാഞ്ജലി അര്പ്പിച്ച് പ്രധാനമന്ത്രി നരേന്ദ്രമോദി. ഭാരതത്തിലെ ഏറ്റവും ആദരണീയരായ ആത്മീയ നേതാക്കളിലും സ്വാതന്ത്ര്യ സമരസേനാനികളിലും സാമൂഹിക പരിഷ്കര്ത്താക്കളിലും ഒരാളായി അദ്ദേഹം ഓര്മിക്കപ്പെടുന്നുവെന്ന് പ്രധാനമന്ത്രി കുറിച്ചു.
ഗാന്ധിയന് ആദര്ശങ്ങള് പ്രചരിപ്പിക്കുന്നതിനും പാര്ശ്വവല്കരിക്കപ്പെട്ടവരെ ശാക്തീകരിക്കുന്നതിനുമായി അദ്ദേഹം തന്റെ ജീവിതം സമര്പിച്ചു. ഒരു വികസിത ഭാരതം കെട്ടിപ്പടുക്കുന്നതില് അദ്ദേഹത്തിന്റെ ചിന്തകള് നമ്മെ വളരെയധികം പ്രചോദിപ്പിക്കുന്നതായും പ്രധാനമന്ത്രി എക്സിലെ കുറിപ്പില് കൂട്ടിച്ചേര്ത്തു.
