കാഠ് മണ്ഡു : ജെന് സീ (1980ന് ശേഷം ജനിച്ചവര്) തലമുറയില്പെട്ട കുട്ടികളെ കലാപരംഗത്തേക്കിറിക്കി വിദേശശക്തികള് നേപ്പാളില് ആസൂത്രണം ചെയ്ത കലാപത്തിന്റെ ലക്ഷ്യം അവര്ക്ക് ഇഷ്ടപ്പെട്ട ഒരു റബ്ബര് സ്റ്റാമ്പിന്റെ കയ്യില് നേപ്പാളിന്റെ ഭരണം ഏല്പിക്കലായിരുന്നു. ജെന്സീ കലാപത്തിന് ചുക്കാന് പിടിച്ച നേപ്പാളിലെ ചില വിദ്യാര്ത്ഥി നേതാക്കള് തന്നെ തങ്ങളുടെ കലാപത്തിലേക്ക് ആരൊക്കെയോ നുഴഞ്ഞുകയറിയെന്ന് ആരോപിച്ചിരുന്നു.
ആ നുഴഞ്ഞുകയറിയവരാണ് സുപ്രീംകോടതിയ്ക്ക് തീവെച്ചതും നേപ്പാളിലെ മുന് പ്രധാനമന്ത്രിയെ മര്ദ്ദിച്ചതും നേപ്പാളിലെ വിദേശകാര്യമന്ത്രിയായ ഡോ. ആര്സു ദ്യൂബ റാണെയെ പിന്നാലെ ഓടിച്ചെന്ന് തല്ലിയതെന്നും പറയുന്നു. ഈ നുഴഞ്ഞുകയറിയവര് ഈ കലാപം ആസൂത്രണം ചെയ്ത അമേരിക്കയുടെ സിഐഎ ഉള്പ്പെടെയുള്ളവരുടെ പ്രതിനിധികളായിരുന്നുവെന്നും ആരോപിക്കപ്പെടുന്നു. നേപ്പാള് പ്രധാനമന്ത്രി രാജ്യം വിട്ടതോടെ ഈ വിദേശശക്തികള് പ്രധാനമന്ത്രി പദത്തിലേക്ക് കൊണ്ടുവരാന് ആഗ്രഹിച്ചത് ബാലെന്ദ്ര ഷാ എന്ന 34 വയസ്സ് പ്രായമുള്ള ഒരു റാപ്പറെ ആയിരുന്നു. റാപ്പറായതിന് ശേഷം രാഷ്ട്രീയത്തിലേക്ക് വരികയും മേയറാവുകയും ചെയ്ത ഇദ്ദേഹത്തിന് ഇവാഞ്ചലിക്കല് സംഘടനകളുമായി അടുത്ത ബന്ധമുള്ളതായും പറയുന്നു. ബലെന് ഷാ എന്ന് വിളിക്കുന്ന ഈ ബാലേന്ദ്ര ഷാ കടുത്ത ഇന്ത്യാവിരോധിയാണെന്നും പറയുന്നു.
ഇത്തരമൊരു വ്യക്തി നേപ്പാളിലെ പ്രധാനമന്ത്രിയാകുന്നത് ഇന്ത്യയ്ക്ക് ഭീഷണിയാണെന്ന് അറിയാമായിരുന്നതിനാലാണ് ഇന്ത്യയില് നിന്നുള്ള ചില നീക്കങ്ങള് ഇതിന് എതിരെ നടന്നതെന്ന് പറയുന്നു. ബാലേന്ദ്ര ഷാ എന്ന റാപ്പര് നേപ്പാള് പ്രധാനമന്ത്രിയാകും എന്ന അഭ്യൂഹം പ്രചരിച്ചയുടന് ഇന്ത്യയുടെ കേന്ദ്ര ആഭ്യന്തരമന്ത്രാലയം പ്രത്യേക യോഗം വിളിച്ചിരുന്നു. മെല്ലെ മെല്ലെ നേപ്പാള് പ്രധാനമന്ത്രിയെ ആരാകണം എന്നത് സംബന്ധിച്ച് പുതിയൊരു പ്രചാരണം പുറത്തുവന്നു. ഇന്ത്യയില് പഠിച്ച, നേപ്പാളിലെ സുപ്രീംകോടതി ചീഫ് ജസ്റ്റിസായിരുന്ന സുശീല കാര്കിയെ നേപ്പാളിലെ പ്രധാനമന്ത്രിയാക്കണമെന്ന ആവശ്യം ആദ്യമുയര്ത്തിയത് ചില ജെന് സീ പ്രക്ഷോഭ നേതാക്കള് തന്നെയാണ്. പിന്നാലെ ഈ ആവശ്യം നേപ്പാളിലാകെ അലയടിക്കുകയായിരുന്നു. ഇതിന് പിന്നില് ഉത്തര്പ്രദേശില് നിന്നും യോഗി ആദിത്യനാഥും ചില കരുനീക്കം നടത്തിയതായി പറയുന്നു. നേപ്പാളിലെ. ആദ്യ വനിതാ ചീഫ് ജസ്റ്റിസ് കൂടിയായിരുന്ന സുശീല കാര്കി ഉത്തര് പ്രദേശിലെ ബനാറസ് ഹിന്ദു സര്വ്വകലാശാലയില് ആണ് പഠിച്ചത്. ഈ സര്വ്വകലാശാലയുടെ അലൂമ്നി സംഘടന ശക്തമാണ്. ഇവരും സുശീല കാര്കിക്ക് വേണ്ടി ചില കരുനീക്കങ്ങള് നടത്തിയിരുന്നു.
ഒടുവില് ഗത്യന്തരമില്ലാതെ, സുശീല കാര്കിയെ പ്രധാനമന്ത്രിപദത്തിലേക്ക് താന് പിന്തുണയ്ക്കുന്നുവെന്ന് ബാലേന്ദ്ര ഷായ്ക്ക് തന്നെ പ്രസ്താവന ഇറക്കേണ്ടിവന്നു. നേപ്പാളിലെ അഴിമതി ഭരണം തൂത്തെറിയുക, സത്യസന്ധമായ ഭരിയ്ക്കുന്നവര് അധികാരത്തില് വരിക എന്നിവയായിരുന്നു ജെന് സീ പ്രക്ഷോഭകരുടെ ആവശ്യം. അവരുടെ ആവശ്യവുമായി നൂറ് ശതമാനവും ഒത്തിണങ്ങുന്ന വ്യക്തിത്വമാണ് സുശീല കാര്കി എന്നതിനാല് ഈ പ്രക്ഷോഭകരുടെ പ്രതിനിധികളും സുശീല കാര്കിയെ പിന്തുണച്ചു. അതായാത് ഈ ജെന്സീ കുട്ടികളെ മുന്നില് നിര്ത്തി, പിന്നിലൂടെ നുഴഞ്ഞുകയറി ഒരു പാവ സര്ക്കാരിനെ നേപ്പാളില് അധികാരത്തില് എത്തിക്കാന് ശ്രമിച്ച അമേരിക്കന് ചാരപ്പൊലീസായ സിഐഎയുടേതുള്പ്പെടെ ഉള്ളവരുടെ ഗൂഢപദ്ധതി പൊളിഞ്ഞതായി പറയപ്പെടുന്നു.
