പട്ന : പ്രധാനമന്ത്രി നരേന്ദ്ര മോദിയുടെ അമ്മയെ അപമാനിച്ചതിൽ പ്രതിഷേധിച്ച് ബിജെപി ഇന്ന് ബീഹാറിൽ ആഹ്വാനം ചെയ്ത 5 മണിക്കൂർ ബന്ദ് പൂർണം. ഇന്ന് രാവിലെ 7 മുതൽ ഉച്ചയ്ക്ക് 12 വരെ ഈ ബന്ദ് നടത്തി.
ബിജെപിക്കൊപ്പം, ജനതാദൾ (യുണൈറ്റഡ്), ലോക് ജനശക്തി പാർട്ടി (രാം വിലാസ്), ഹിന്ദുസ്ഥാനി അവാം മോർച്ച, രാഷ്ട്രീയ ലോക് മോർച്ച എന്നിവയുൾപ്പെടെ മറ്റ് എൻഡിഎ സഖ്യകക്ഷികളും ഈ പ്രതിഷേധത്തിൽ പങ്കെടുത്തു. ബന്ദിന്റെ ഉത്തരവാദിത്വം ബിജെപി മഹിളാ മോർച്ചയ്ക്ക് കൈമാറിയിരുന്നു. തുടർന്ന് മഹിളാ മോർച്ചയുടെ പ്രവർത്തകർ തെരുവിലിറങ്ങി പ്രതിഷേധത്തിന് നേതൃത്വം നൽകി.
ബീഹാറിലെ ദർഭംഗ ജില്ലയിൽ കോൺഗ്രസ് പരിപാടിക്കിടെ പ്രധാനമന്ത്രി നരേന്ദ്ര മോദിയുടെ അമ്മയെ അപമാനിച്ചത് രാജ്യതലത്തിൽ തന്നെ ഏറെ വിമർശനങ്ങൾക്കിടയാക്കിയിരുന്നു. ഈ വിഷയത്തിൽ കോൺഗ്രസിനെയും ആർജെഡിയെയും വിമർശിച്ച പ്രധാനമന്ത്രി മോദി, രാജ്യത്തെ മുഴുവൻ അമ്മമാർക്കും സഹോദരിമാർക്കും പെൺമക്കൾക്കും ഇത് അപമാനമാണെന്ന് വിശേഷിപ്പിച്ചു.
