ചണ്ഡീഗഡ്: പഞ്ചാബ് സര്വകലാശാല വിദ്യാര്ത്ഥി യൂണിയന് തെരഞ്ഞെടുപ്പില് എബിവിപിക്ക് ചരിത്രവിജയം. പ്രസിഡന്റായി എബിവിപി നേതാവ് ഗൗരവ് വീര് സോഹല് വിജയിച്ചു. ചരിത്രത്തില് ആദ്യമായാണ് ഒരു എബിവിപി സ്ഥാനാര്ത്ഥി പഞ്ചാബ് സര്വകലാശാല വിദ്യാര്ത്ഥി യൂണിയന് പ്രസിഡന്റാവുന്നത്. 3147 വോട്ടുകള് നേടി 488 വോട്ടിന്റെ ഭൂരിപക്ഷത്തോടെയാണ് ഗൗരവ് വീര് സോഹല് വിജയക്കൊടി പാറിച്ചത്.
ഈ വിജയം മാറ്റത്തിനായി കൊതിച്ച, ഓരോ വിദ്യാര്ത്ഥിയുടെയും വിജയമാണെന്ന് ഗൗരവ് വീര് സോഹല് അഭിപ്രായപ്പെട്ടു. നിരന്തരമായ പോരാട്ടത്തിനും സേവനത്തിനുമുള്ള അവസരമായാണ് ഈ സ്ഥാനത്തെ കാണുന്നത്. വിജയം വ്യക്തിപരമല്ല, തന്നെ പിന്തുണച്ച ഐഎന്എസ്ഒ, എച്ച്ആര്എസ്സി ഉള്പ്പെടെയുള്ള എല്ലാവര്ക്കും നന്ദി അറിയിക്കുന്നതായും അദ്ദേഹം കൂട്ടിച്ചേര്ത്തു.
പഞ്ചാബ് സര്വകലാശാല ചരിത്രം സൃഷ്ടിച്ചതായി എബിവിപി ദേശീയ ജനറല് സെക്രട്ടറി ഡോ. വീരേന്ദ്ര സിങ് സോളങ്കി അഭിപ്രായപ്പെട്ടു. ഐക്യത്തിന്റെയും ഉത്തരവാദിത്തത്തിന്റെയും പുരോഗതിയുടെയും ആത്മാവോടെ ഭാവി കെട്ടിപ്പടുക്കാനുള്ള വിദ്യാര്ത്ഥികളുടെ കൂട്ടായ ദൃഢനിശ്ചയത്തിന്റെ പ്രതീകമാണ് ഈ നിമിഷം. ഇത് വെറുമൊരു തെരഞ്ഞെടുപ്പ് വിജയമല്ല, ആശയപോരാട്ടങ്ങളുടെ വിജയമാണ്. പഞ്ചാബ് സര്വകലാശാലയില് പ്രാദേശികവാദവും ഭിന്നിപ്പും സൃഷ്ടിക്കാനുള്ള ശ്രമങ്ങളെ വിദ്യാര്ത്ഥികള് നിരാകരിച്ചിരിക്കുകയാണെന്നും അദ്ദേഹം പ്രസ്താവനയില് കൂട്ടിച്ചേര്ത്തു.
