ന്യൂദല്‍ഹി: സുപ്രീംകോടതി വിധി മാനിച്ച് കഴിഞ്ഞ ആഴ്ചയില്‍ ഷെല്‍റ്ററുകളില്‍ അടയ്‌ക്കാന്‍ വേണ്ടി പിടികൂടിയ മുഴുവന്‍ തെരുവു നായ്ക്കളേയും വീണ്ടും തെരുവിലേക്ക് വിട്ടയച്ച് ദല്‍ഹി മുനിസിപ്പല്‍ കോര്‍പറേഷന്‍ അധികൃതര്‍. ദല്‍ഹിയിലെ ചെങ്കോട്ട ഭാഗത്ത് നിന്നും പിടികൂടിയ 700 നായ്ക്കളേയും പിടിച്ചിടത്ത് തന്നെ കൊണ്ടു വിട്ടുവെന്നും ദല്‍ഹി മുനിസിപ്പല്‍ കോര്‍പറേഷന്‍ അധികൃതര്‍ പറഞ്ഞു.
നേരത്തെ സുപ്രീംകോടതി രണ്ടംഗബെ‍ഞ്ചാണ് ദല്‍ഹിയിലെ മുഴുവന്‍ തെരുവുനായ്‌ക്കളേയും പിടികൂടി ഷെല്‍റ്ററുകളില്‍ അടയ്‌ക്കാന്‍ ഉത്തരവിട്ടത്. ഒരു സ്കൂള്‍ വിദ്യാര്‍ത്ഥിനി തെരുവ് നായയുടെ കടിയേറ്റ് വിഷാബാധയേറ്റ് മരണപ്പെട്ടതിനെ തുടര്‍ന്നാണ് ഈ രണ്ടംഗ ബെഞ്ച് സ്വമേധയാ ഈ കേസില്‍ വാദം കേട്ടത്. ദല്‍ഹിയില്‍ തെരുവ് നായക്കളുടെ കടിയേല്‍ക്കുന്ന സംഭവങ്ങള്‍ കൂടിവരുന്ന പശ്ചാത്തലത്തിലായിരുന്നു തെരുവ് നായ്‌ക്കളെ അടിയന്തരമായി പിടികൂടണമെന്നും കുട്ടികള്‍ക്ക് തെരുവുകളിലേക്ക് ഭയം കൂടാതെ വരാന്‍ കഴിയുന്ന സാഹചര്യം ഉണ്ടാക്കണമെന്നും കോടതി വിധിച്ചത്. ഇതേ തുടര്‍ന്നാണ് ദല്‍ഹി മുനിസിപ്പല്‍ കോര്‍പറേഷന്‍ ജീവനക്കാര്‍ തെരുവ് നായ്‌ക്കളെ പിടികൂടാന്‍ ആരംഭിച്ചത്. ഇതോടെ തെരുവ് നായ്‌ക്കള്‍ക്ക് വേണ്ടി പ്രവര്‍ത്തിക്കുന്ന ദല്‍ഹിയിലെ പതിനായിരക്കണക്കിന് സംഘടനകളുടെ പ്രവര്‍ത്തകര്‍ രംഗത്തെത്തിയിരുന്നു. ചിലര്‍ അക്രമാസക്തരാവുകയും ചെയ്തു.
തുടര്‍ന്നാണ് തെരുവ് നായ്‌ക്കള്‍ സംബന്ധിച്ച കേസ് സുപ്രീംകോടതിയുടെ വിശാല ബെഞ്ചിലേക്ക് വിട്ടത് ഈ ബെഞ്ചാണ് മുഴുവന്‍ തെരുവ് നായ്ക്കളേയും അടിയന്തരമായി വിട്ടയയ്‌ക്കാന്‍ ഉത്തരവിട്ടത്.
