കീവ് : ഉക്രെയ്‌നിന്റെ സ്വാതന്ത്ര്യദിനത്തിൽ ഹൃദയംഗമമായ അഭിനന്ദനങ്ങൾ അറിയിച്ച പ്രധാനമന്ത്രി മോദിയോട് ഉക്രെയ്ൻ പ്രസിഡന്റ് വോളോഡിമർ സെലെൻസ്‌കി നന്ദി പറഞ്ഞു. റഷ്യയുമായുള്ള യുദ്ധം അവസാനിപ്പിക്കുന്നതിൽ ഇന്ത്യയുടെ സംഭാവനയെ ഉക്രെയ്ൻ പ്രതീക്ഷിക്കുന്നുണ്ടെന്ന് സെലെൻസ്‌കി പറഞ്ഞു. ഇതോടൊപ്പം സമാധാനത്തിനും സംഭാഷണത്തിനുമുള്ള ഇന്ത്യയുടെ നിലപാടിനെയും സെലെൻസ്‌കി അഭിനന്ദിച്ചു.
‘ഉക്രെയ്‌നിന്റെ സ്വാതന്ത്ര്യദിനത്തിൽ നിങ്ങളുടെ ഹൃദയംഗമമായ ആശംസകൾക്ക് പ്രധാനമന്ത്രി നരേന്ദ്ര മോദിയോട് നന്ദി പറയുന്നു. സമാധാനത്തിനും സംഭാഷണത്തിനുമുള്ള ഇന്ത്യയുടെ സമർപ്പണത്തെ ഞങ്ങൾ അഭിനന്ദിക്കുന്നു. ‘- സെലൻസ്കി എക്സിൽ കുറിച്ചു.
ഇതിനു പുറമെ ഇപ്പോൾ ലോകം മുഴുവൻ ഈ ഭയാനകമായ യുദ്ധം ശാശ്വതമായി അവസാനിപ്പിക്കാൻ ശ്രമിക്കുമ്പോൾ ഇന്ത്യയുടെ സംഭാവനയെ ഞങ്ങൾ പ്രതീക്ഷിക്കുന്നു. നയതന്ത്രം ശക്തിപ്പെടുത്തുന്ന ഓരോ തീരുമാനവും യൂറോപ്പിൽ മാത്രമല്ല, ഇന്തോ-പസഫിക് മേഖലയിലും അതിനപ്പുറത്തും മികച്ച സുരക്ഷയിലേക്ക് നയിക്കുന്നുവെന്നും സെലൻസ്കി പറഞ്ഞു.
അതേ സമയം മോസ്കോയും കീവും തമ്മിലുള്ള യുദ്ധം തുടരുന്നതിനിടയിൽ റഷ്യൻ എണ്ണ വാങ്ങിയതിന് ഇന്ത്യയ്‌ക്കെതിരെ യുഎസ് പ്രസിഡന്റ് ഡൊണാൾഡ് ട്രംപ് ചുമത്തിയ ‘ശിക്ഷാ’ തീരുവകൾക്കുള്ള സമയപരിധി അടുത്തുവരുന്ന സമയത്താണ് ഉക്രെയ്ൻ പ്രസിഡന്റിന്റെ പരാമർശങ്ങൾ.
