കൊച്ചി: കര്വ് ഇവി, നെക്സോണ് ഇവി മോഡലുകളിലേക്കു കൂടി ലൈഫ്ടൈം ബാറ്ററി വാറണ്ടി അവതരിപ്പിച്ച് ടാറ്റ മോട്ടോഴ്സ്. ആദ്യമായി ഹാരിയര് ഇവിയിലാണ് ആജീവനാന്ത ബാറ്ററി പരിരക്ഷ ടാറ്റ മോട്ടോഴ്സ് അവതരിപ്പിച്ചത്. ലൈഫ്ടൈം ബാറ്ററി വാറണ്ടിക്ക് മികച്ച പ്രതികരണം വാഹന ഉടമകളില് നിന്നും ലഭിച്ചതോടെ കൂടുതല് മോഡലുകളിലേക്ക് ഇത് വ്യാപിപ്പിക്കാന് ടാറ്റ തീരുമാനിക്കുകയായിരുന്നു. കര്വ് ഇവിയുടേയും നെക്സോണ് ഇവി 45കിലോവാട്ട് മോഡലിനുമാണ് ലൈഫ്ടൈം ബാറ്ററി വാറണ്ടി നല്കുക.
പുതുതായി വാങ്ങുന്നവര്ക്ക് മാത്രമല്ല നിലവിലെ ഉടമകള്ക്കും ഈ ലൈഫ് ടൈം ബാറ്ററി വാറണ്ടിയുടെ സംരക്ഷണം ആസ്വദിക്കാനാവും. ഫസ്റ്റ് ഓണർഷിപ്പിൽ തുടരുന്ന, നിലവിലുള്ള കര്വ് ഇവി, നെക്സോണ് ഇവി 45കിലോവാട്ട് മോഡലുകൾക്കാണ് ഇപ്രകാരം വാറണ്ടി ലഭ്യമാവുക.
‘ആശങ്കയില്ലാതെ ഇവി ഉപയോഗിക്കാവുന്ന സൗകര്യങ്ങള് ഒരുക്കുന്നതുവഴി പ്രീമിയം ഇവി സാങ്കേതികവിദ്യയെ കൂടുതല് ജനകീയമാക്കാനുള്ള ശ്രമങ്ങളാണ് ഞങ്ങള് നടത്തുന്നത്. ഇന്ത്യയിലെ ഇവി സാങ്കേതികവിദ്യ വികസിക്കുന്നതില് ഞങ്ങള് നിര്ണായക പങ്കുവഹിച്ചിട്ടുണ്ട്’. ടാറ്റ പാസഞ്ചര് ഇലക്ട്രിക് മൊബിലിറ്റി ലിമിറ്റഡ് സിസിഒ വിവേക് ശ്രീവാസ്തവ പ്രതികരിച്ചു.
എക്സ്ക്ലുസിവ് ലോയല്റ്റി പ്രോഗ്രാം വഴി നിലവിലുള്ള ടാറ്റ ഇ വി ഉപഭോക്താക്കൾക്ക് കര്വ് ഇവി, നെക്സോണ് ഇവി 45കിലോവാട്ട് മോഡലുകൾ വാങ്ങുമ്പോൾ 50,000 രൂപയുടെ നേരിട്ടുള്ള ഓഫറുകൾ ലഭ്യമാക്കുമെന്നും കമ്പനി അറിയിച്ചു
