ബെംഗളൂരു: ധര്‍മ്മസ്ഥല എന്ന ക്ഷേത്രനഗരിയെ നശിപ്പിക്കാന്‍ താന്‍ നുണക്കഥ പറഞ്ഞതാണെന്ന് ഒടുവില്‍ പ്രത്യേക അന്വേഷണസംഘത്തിന് മുന്‍പാകെ വെളിപ്പെടുത്തി ശുചീകരണത്തൊഴിലാളി. നൂറോളം സ്ത്രീകളുടെ മൃതദേഹം മറവുചെയ്തെന്നും അവരില്‍ പലരും ക്രൂരമായ ബലാത്സംഗത്തിന് ഇരയായെന്നും അതില്‍ സ്കൂള്‍ ബാഗ് ചുമലിലിട്ട കുട്ടികള്‍ വരെയുണ്ടായിരുന്നെന്നും ഉള്ളതെല്ലാം തന്നെ ഒരു സംഘം പഠിപ്പിച്ച നുണക്കഥകളായിരുന്നുവെന്ന് ശുചീകരണത്തൊഴിലാളി പ്രത്യേക അന്വേഷണസംഘത്തിന്റെ ചോദ്യം ചെയ്യലില്‍ നിവൃത്തിയില്ലാതെ തുറന്നുപറയുകയായിരുന്നു. 17 ഇടങ്ങളില്‍ കുഴിച്ചിട്ടും കാര്യമായി യാതൊന്നും കിട്ടാതായതോടെ ശുചീകരണത്തൊഴിലാളിയെ ചോദ്യം ചെയ്യുന്ന രീതി അന്വേഷണ സംഘം മാറ്റിയതോടെയാണ് തത്ത പറയുന്നതുപോലെ താന്‍ പറഞ്ഞതെല്ലാം കള്ളക്കഥയായിരുന്നുവെന്ന് ശുചീകരണത്തൊഴിലാളി ഏറ്റുപറഞ്ഞത്.
ഈ ശുചീകരണത്തൊഴിലാളി ഹിന്ദു സമുദായക്കാരനല്ലെന്ന് നേരത്തെ എഴുതിയിരുന്നു. ഇയാള്‍ പണ്ട് ദളിതനായ ഹിന്ദുവായിരുന്നു. പിന്നീട് മതപരിവര്‍ത്തനത്തിന് വിധേയനായി ഹിന്ദു അല്ലാതായി. ഇയാള്‍ ഇപ്പോള്‍ തന്നെ കഥ പറഞ്ഞുപഠിപ്പിച്ചത് മഹേഷ് റെഡ്ഡി തിമ്മറോഡി എന്ന ധര്‍മ്മസ്ഥലയിലെ ഒരു റിയല്‍ എസ്റ്റേറ്റ് ഏജന്‍റാണെന്നാണ് വെളിപ്പെടുത്തിയിരിക്കുകയാണ് ശുചീകരണത്തൊഴിലാളി. ഇയാള്‍ പണ്ട് ഇവിടെ പല ഭൂമിക്കച്ചവടം നടത്തിയിരുന്നതായി പറയുന്നു. എന്നാല്‍ ക്ഷേത്ര ധര്‍മ്മാധികാരി മഹേഷ് റെഡ്ഡി തിമ്മറോഡിയുടെ ഭൂമിക്കച്ചവടത്തിന് പിന്നില്‍ ക്ഷേത്രത്തിന് പങ്കില്ലെന്ന് വെളിപ്പെടുത്തിയതോടെയാണ് ക്ഷേത്രാധികാരികളും തിമ്മറോഡിയും തമ്മില്‍ തെറ്റിയതെന്ന് പറയുന്നു. മഹേഷ് റെഡ്ഡി തിമ്മറോഡി ഒരു ഹിന്ദു സംഘടനാപ്രവര്‍ത്തകനാണെന്ന് പറയുന്നു. പക്ഷെ യഥാര്‍ത്ഥത്തില്‍ ശുചീകരണത്തൊഴിലാളിയെക്കൊണ്ട് ഇതെല്ലാം പറയിച്ചതിന് പിന്നില്‍ മതപരിവര്‍ത്തന ലോബിയ്‌ക്കും എന്‍ജിഒ സംഘങ്ങള്‍ക്കും ചില മുസ്ലിംസംഘടനകള്‍ക്കും പങ്കുണ്ടോ എന്ന കാര്യവും പരിശോധിച്ച് വരികയാണ്.
മറ്റു ഗത്യന്തരങ്ങളില്ലാതെ വന്നപ്പോള്‍ വാര്‍ത്താസമ്മേളനം വിളിച്ചുകൂട്ടി കര്‍ണ്ണാടക മുഖ്യമന്ത്രി സിദ്ധരാമയ്യയ്‌ക്കെതിരെ ശക്തമായ ആരോപണം തിമ്മറോഡി ഉയര്‍ത്തിയിരിക്കുകയാണ്. സിദ്ധരാമയ്യ 28 കൊലപാതകങ്ങള്‍ നടത്തിയിട്ടുണ്ടെന്നും അതിന്റെ തെളിവുകള്‍ തന്റെ പക്കലുണ്ടെന്നുമാണ് മഹേഷ് റെഡ്ഡി തിമ്മറോഡി ആരോപിച്ചിരിക്കുകയാണ്. അതേ സമയം, ശുചീകരണത്തൊഴിലാളിയുടെ വെളിപ്പെടുത്തലിന് പിന്നില്‍ വലിയ ഗൂഢോലോചനയുണ്ടെന്നും ഇതിന് പിന്നിലെ ശക്തികളെ പുറത്തുകൊണ്ടുവരുമെന്നും തക്ക ശിക്ഷ കൊടുക്കുമെന്നും പ്രഖ്യാപിച്ചിരിക്കുകയാണ് കര്‍ണ്ണാടക ഉപമുഖ്യമന്ത്രി ഡി.കെ. ശിവകുമാര്‍. ഇതോടെ കര്‍ണ്ണാടകത്തിലെ രാഷ്‌ട്രീയം കലങ്ങി മറിയുകയാണ്.
യൂട്യൂബര്‍മാര്‍ ഏറെ പൊലിപ്പിച്ച 13ാം സ്പോട്ടില്‍ കുഴിച്ചത് കള്ളിപൊളിച്ചു
യൂട്യൂബര്‍മാരും ടിവി ചാനലുകാരും ഏറെ പൊലിപ്പിച്ച ധര്‍മ്മസ്ഥലയിലെ ഒരു പ്ലോട്ടായിരുന്നു 13. ഇവിടെ കുഴിച്ചാല്‍ 70 മൃതദേഹങ്ങളോ അസ്ഥിക്കൂടങ്ങളോ കിട്ടുമെന്നാണ് ചാനലുകാരും ശുചീകരണത്തൊഴിലാളിയും പറഞ്ഞത്. പക്ഷെ ഇവിടെ കുഴിച്ചപ്പോള്‍ ഒന്നും കിട്ടിയില്ല. റഡാര്‍ ജെസിബി ഉപയോഗിച്ച് ഏകദേശം 80 അടിയോളം കുഴിച്ചിരുന്നു. എന്നിട്ടും ഒരെല്ലിന്‍ കഷണവും കിട്ടാതായപ്പോഴാണ് അന്വേഷണഉദ്യോഗസ്ഥരുടെ വിധം മാറിയത്. ചോദ്യം ചെയ്യുന്ന രീതിയും മാറിയതോടെ ശുചീകരണത്തൊഴിലാളി തത്ത പറയുന്നതുപോലെ സത്യം പറഞ്ഞത്. പക്ഷെ ഈ സത്യത്തിനുള്ളില്‍ അയാള്‍ മറ്റ് ചില കുറ്റവാളികളെക്കൂടി മറച്ചുപിടിക്കുന്നുണ്ടെന്ന് കരുതുന്നു.
