‘ജ്ഞാനാനന്ദം’ എന്നതിനര്ത്ഥം ആഴത്തിലുള്ള അറിവും അതില് നിന്നുള്ള ആനന്ദവും അനുഭവിക്കുക എന്നതാണ്.
അത് സാധാരണയായി വിവക്ഷിക്കുന്ന ജീവിതലഹരിയുടെ ശാരീരിക തലത്തിനപ്പുറമുള്ള ആന്തരികമായ ഒരു അവസ്ഥയാണ്.
സ്വാധ്യായം, ധ്യാനം, നിദിധ്യാസനം, പ്രകൃതിയുമായി ഇണങ്ങിച്ചേരല്, കര്മ്മയോഗം, നിരന്തരമായ അന്വേഷണം, എന്നീ ആറ് സാധനകളിലൂടെ ജ്ഞാനാനന്ദം അനുഭവവേദ്യമാക്കാം.
ആത്മീയ പഠനം (സ്വാധ്യായം)
ആധികാരിക ഗ്രന്ഥങ്ങള് പഠിക്കുന്നതിലൂടെയും, പ്രഭാഷണങ്ങള് കേള്ക്കുന്നതിലൂടെയും ജ്ഞാനം വര്ദ്ധിപ്പിക്കാന് ഏതൊരാള്ക്കും കഴിയും.
ഉപനിഷത്തുകള്, ഭഗവദ്ഗീത, യോഗസൂത്രങ്ങള് എന്ന് മാത്രമല്ല പുസ്തകങ്ങള് വായിക്കുന്നതും ബുദ്ധിപരമായി ജ്ഞാനം വര്ധിപ്പിക്കുന്ന ഒന്നാണ്.
ആത്മീയപഠനം എന്നത് വെറും ബുദ്ധിപരമായ ഒന്നല്ല, മറിച്ച് പഠനത്തിന്റെ ഓരോ ഘട്ടത്തിലും അത് ജീവിതത്തിലേക്ക് പകര്ത്താന് പാകത്തിന് ആകുമ്പോള് ആണ് പഠനം ആത്മീയ പഠനം ആകുന്നത്. അതാണ് സ്വാധ്യായം. അങ്ങനെയുള്ള
ജ്ഞാനം വര്ദ്ധിക്കുമ്പോള്- അത് ജീവിതത്തില് പകര്ത്താന് കഴിയുമ്പോള്- അതില് നിന്നുള്ള ആനന്ദം അനുഭവിക്കാന് സാധിക്കും.
ധ്യാനം
ജ്ഞാനാനന്ദം അനുഭവിക്കാനുള്ള ഒരു പ്രധാന മാര്ഗ്ഗമാണ് ധ്യാനം. ധ്യാനത്തിലൂടെ മനസ്സിനെ ശാന്തമാക്കാനും, ജ്ഞാനത്തിന്റെ ആഴത്തിലുള്ള ഉള്ക്കാഴ്ചകള് നേടാനും കഴിയും. പതിവായ ധ്യാനം ആന്തരികമായ ശാന്തിയും സന്തോഷവും നല്കും. ധ്യാനം ആനന്ദവും ലഹരിയുമായി അനുഭവപ്പെടും.
മനനവും-നിദിധ്യാസനവും
നിദിധ്യാസനം എന്നാല് നമുക്ക് കിട്ടിയ അറിവുകളുടെ വെളിച്ചം നിത്യജീവിതത്തില് പകര്ത്തുക എന്നതാണ്. അറിവുകളെ യുക്തിഭദ്രമായി അപഗ്രഥിച്ച്(മനനം ചെയ്ത്) തനിക്ക് ചേര്ന്നവയെ ലോകത്തിന് ഉപയോഗപ്രദമാക്കിത്തീര്ക്കുുന്നത് ആനന്ദം നല്കുന്ന ഒന്നാണ്.
പഠിച്ച കാര്യങ്ങളെക്കുറിച്ച് ആഴത്തില് ചിന്തിക്കുക (മനനം ചെയ്യുക). അത് നിങ്ങളുടെ ജീവിതത്തില് എങ്ങനെ പ്രാവര്ത്തികമാക്കാം എന്ന് മനസ്സിലാക്കുക. തുടര്ന്ന്, ആ ജ്ഞാനത്തില് പൂര്ണ്ണമായി മുഴുകുക (നിദിധ്യാസനം ചെയ്യുക). ഇത് ജ്ഞാനത്തെ കേവലം വിവരത്തില് നിന്ന് ഒരു അനുഭവമാക്കി മാറ്റാന് സഹായിക്കും. ഈ ആഴത്തിലുള്ള അനുഭവം ആനന്ദകരവും ലഹരി പിടിപ്പിക്കുന്നതുമായിരിക്കും.
പ്രകൃതിയുമായി ഇണങ്ങിച്ചേരല്
പ്രകൃതിയുടെ സൗന്ദര്യവും പൂര്ണ്ണതയും ശ്രദ്ധിക്കാനാകണം. പ്രകൃതിയിലെ ഓരോ ചെറിയ കാര്യത്തിലും അടങ്ങിയിരിക്കുന്ന ജ്ഞാനത്തെക്കുറിച്ച് മനനം ചെയ്യണം. ഇത് മനസ്സിനെ വിശാലമാക്കും. ആഴത്തിലുള്ള സന്തോഷം നല്കുന്നതും ആനന്ദം അനുഭവിക്കന് സഹായിക്കുന്നതും ആണിത്.
സേവനം (കര്മ്മയോഗം)
മറ്റുള്ളവരെ സഹായിക്കുന്നതിലൂടെയും നിസ്വാര്ത്ഥ സേവനത്തിലൂടെയും ആന്തരികമായ സംതൃപ്തിയും ആനന്ദവും നേടാന് കഴിയും. ഇത് ജ്ഞാനാനന്ദം അനുഭവിക്കാനുള്ള മറ്റൊരു മാര്ഗ്ഗമാണ്, കാരണം സേവനത്തിലൂടെ അഹംഭാവം കുറയുകയും ആഴത്തിലുള്ള ബന്ധം അനുഭവപ്പെടുകയും ചെയ്യും.
നിരന്തരമായ അന്വേഷണം
ജ്ഞാനം ഒരു പരിധിയില് അവസാനിക്കുന്ന ഒന്നല്ല. അതിനാല് നിരന്തരമായ അന്വേഷണത്തിലൂടെയും പഠനത്തിലൂടെയും പുതിയ അറിവുകള് നേടാനും, അതില് നിന്നുള്ള ആനന്ദം അനുഭവിക്കാനും കഴിയും.
ഇത് ശാശ്വതമായ ഒരു യാത്രയാണ്, ലക്ഷ്യമല്ല.
ഈ കാര്യങ്ങള് പതിവായി പരിശീലിക്കുന്നതിലൂടെ ജ്ഞാനത്തെ ലഹരിയായി എന്നുമെന്നും, അനുഭവിക്കാന് സാധിക്കും. ഇങ്ങനെ ജ്ഞാനത്തിലൂടെ ആന്തരികമായ സംതൃപ്തിയും പൂര്ണ്ണതയുള്ള അനുഭൂതിയും നേടുന്ന അവസ്ഥയാണ് ജ്ഞാനാനന്ദം.
ഇത് സാധാരണ ലഹരിയെപ്പോലെ ബാഹ്യമല്ല, ആന്തരികമാണ്.
(അധ്യാപകനും, സര്ട്ടിഫൈഡ് കൗണ്സിലറും, പ്രഭാഷകനും, നാഷണല് ബുക്ക് ഓഫ് റെക്കോര്ഡ്സ് ഭാരത് വിഭൂഷന് അവാര്ഡ് ജേതാവുമാണ് ലേഖകന് )
ജന്മഭൂമി ഓണ്ലൈന്