ബാലഗോകുലം മലയാളഭാഷയോടും മലയാളസംസ്‌കൃതിയോടും പ്രതിബദ്ധതയുള്ള പ്രസ്ഥാനമാണ്. മലയാളഭാഷയില്‍ കാലക്രമേണ തിരസ്‌കൃതമായ തനതു സംഖ്യാലിപികളെ പ്രായോഗികമാക്കുവാന്‍ 1997 മുതല്‍ മലയാളപഞ്ചാംഗം പുറത്തിറക്കുന്നു. ഭാരതീയ ഭാഷകള്‍ക്കെല്ലാം സ്വന്തമായി സംഖ്യാലിപികളുള്ളതുപോലെ മലയാളഭാഷയ്‌ക്കും സഖ്യാലിപിയുണ്ടായിരുന്നു. വിസ്മൃതിയിലാണ്ടതും പുതിയ തലമുറയ്‌ക്ക് അജ്ഞാതവുമായ സംഖ്യാലിപികളെ പ്രയോഗക്ഷമമാക്കേണ്ടത് ഇച്ഛാശക്തിയുള്ള മലയാളിയുടെ കടമയാണ്.
ഭാഷയുടെ തനിമയും ഗരിമയും കാക്കുവാന്‍ മലയാളി വെമ്പല്‍കൊള്ളാതിരിക്കുകയും മലയാളഭാഷയെ വെറുക്കുകയും ചെയ്യുന്നു. ഇംഗ്ലീഷിനെ പുല്‍കുകയും, ഇംഗ്ലീഷില്‍ സംസാരിക്കുന്നത് മാന്യതയുടെ ലക്ഷണമായി കണക്കാക്കി നാം അടിവേര് മറക്കുന്നു. പുതിയ തലമുറ പ്രവാസികളാകുകമാത്രമല്ല സ്വദേശത്തെ ഉപേക്ഷിച്ച് പലായനം ചെയ്യുന്നു. രാഷ്‌ട്രീയ സാമൂഹ്യ സാഹചര്യം ഇത്തരം പ്രവണതകളെ ആളിക്കത്തിക്കുന്നു. ഇവിടെ എങ്ങനെ പഠിക്കും, എങ്ങനെ ജീവിക്കും എന്നചിന്ത യുവാക്കളില്‍ വളരുന്നു. പെറ്റമ്മയോടും പിറന്നനാടിനോടുമുള്ള സ്‌നേഹം ഭാഷയിലൂടെയും നാട്ടുനന്മയിലൂടെയും കാര്‍ഷികവൃത്തിയിലൂടെയുമാണ് രൂപപ്പെടുന്നത്.
ഭാഷയുടെ പൈതൃകവും പിറന്നനാടിന്റെ സ്വത്വവും, നാടിന്റെ മഹിമയും കാക്കേണ്ടത് വരും തലമുറയോടുള്ള കരുതലാണ്. ബാലഗോകുലം നിരവധി കര്‍മ്മപദ്ധതികളുമായി സുവര്‍ണ്ണജയന്തിയിലേക്ക് കടക്കുകയാണ്. സംഘടനയുടെ സ്ഥാപകന്‍ എം.എ. കൃഷ്ണന്റെ നേതൃത്വത്തിലാണ് 1997 മുതല്‍ മലയാളപഞ്ചാംഗം പുറത്തിറക്കുന്നത്. കര്‍ഷക വിരുദ്ധതയും തൊഴിലാളികളെ ദിശതെറ്റി ചിന്തിപ്പിച്ചതുമൂലം കാര്‍ഷികസംസ്‌കൃതി തകര്‍ക്കപ്പെട്ടു. മലയാളത്തിന്റെ മണ്ണും മനസ്സും കാര്‍ഷികസംസ്‌കൃതിയോടു ചേര്‍ന്നുനില്‍ക്കുന്നതാണ്. ആ കാര്‍ഷികവൃത്തിയുടെ മനസ്സിനെ നാം വീണ്ടെടുക്കേണ്ടതുണ്ട്. മലയാളിയുടെ കാര്‍ഷിക കലണ്ടറായ ഞാറ്റുവേലയും, ഓരോ ഞാറ്റുവേലയില്‍ മണ്ണിലേക്കിറക്കേണ്ട വിളകളേയും പഞ്ചാംഗത്തില്‍ സൂചിപ്പിക്കുന്നു.
മലയാളപഞ്ചാംഗത്തില്‍ പഞ്ചാംഗഘടകമായ നക്ഷത്ര-വാര-തിഥി-കരണ- നിത്യയോഗങ്ങളില്‍ ഉപയോഗക്ഷമത കുറഞ്ഞ കരണവും നിത്യയോഗവും ഒഴിവാക്കി, കാര്‍ഷികതനിമയെ കൂട്ടിച്ചേര്‍ത്തു. ആഴ്ചയും, തിഥിയും, നക്ഷത്രവും ചേര്‍ന്ന ശുഭമായ വിളവിറക്കല്‍ദിനം സ്വന്തമായി കണ്ടെത്തുവാന്‍ ഈ പഞ്ചാംഗം സഹായിക്കുന്നു. നാട്ടറിവുകളും, വീട്ടറിവുകളും, കാര്‍ഷിക പഴഞ്ചൊല്ലുകളും ഇതില്‍ കൊടുത്തിരിക്കുന്നു. ലോക പരിസ്ഥിതിദിനത്തില്‍ വൃക്ഷങ്ങള്‍ നടുമ്പോള്‍ വാസ്തുവിദ്യാപരമായ ദിശകളും ഇതില്‍ സൂചിപ്പിച്ചിരിക്കുന്നു.
മലയാളിക്ക് സ്വന്തമായി ഒരു കാലഗണനയുണ്ടായിട്ട് 1200 വര്‍ഷം കഴിയുകയാണ്. ഭാരതത്തിലെ പഞ്ചാംഗങ്ങള്‍ സൗരവര്‍ഷവും ചന്ദ്രമാസവും അടിസ്ഥാനമാക്കി കാലനിര്‍ണ്ണയം ചെയ്യുമ്പോള്‍ കൊല്ലവര്‍ഷം സൗരവര്‍ഷത്തെയും സൗരമാസത്തെയും ശാസ്ത്രീയമായി പഠിച്ചാണ് പഞ്ചാംഗം തയ്യാറാക്കിയത്. അതിനുമുമ്പ് സപ്തര്‍ഷിവര്‍ഷം പിന്തുടര്‍ന്നിരുന്നു. കൊല്ലം പ്രധാന വാണിജ്യകേന്ദ്രമായപ്പോള്‍ ഇവിടെയെത്തിയ കച്ചവടക്കാര്‍ അവര്‍ക്ക് പരിചിതമായ സപ്തര്‍ഷിവര്‍ഷവും ഇവിടെ പ്രചാരത്തിലിരുന്ന കാലഗണനാരീതികളും സംയോജിപ്പിച്ച് ഉപയോഗിക്കുവാന്‍ തുടങ്ങി.
സപ്തര്‍ഷിവര്‍ഷത്തിന്റെ ഗണനം കൃത്യമല്ലായിരുന്നു. നൂറ് വര്‍ഷം കൂടുമ്പോള്‍ ഒന്നു മുതല്‍ ആരംഭിക്കുന്ന രീതിയായിരുന്നു. ആയതിനാല്‍ തീയതികളില്‍ പല വ്യതിയാനങ്ങളും സംഭവിച്ചു. ക്രിസ്തുവിന് മുമ്പ് 76-ല്‍ തുടങ്ങിയ സപ്തര്‍ഷി വര്‍ഷം നൂറ് വീതമുള്ള പത്താമത്തെ ചക്രമാരംഭിച്ചത് എ.ഡി. 825-ല്‍ ആയിരുന്നു. ആ വര്‍ഷം കണക്കാക്കി കൊല്ലം കേന്ദ്രമായി വേണാട് രാജ്യത്തിലെ രാജാവായിരുന്ന രാജശേഖരവര്‍മ്മ എ.ഡി. 825 ആഗസ്റ്റ് 25 ന് കൊല്ലവര്‍ഷം ആരംഭിച്ചു.
മലയാളികളായ പ്രഗത്ഭപണ്ഡിതന്മാര്‍ ഭാരതത്തിലെ വിവിധ കാലഗണന പഠിച്ചു. കൃഷ്ണവര്‍ഷവും ശകവര്‍ഷവും രാശിചക്രവും കണക്കാക്കുന്നത് സൂര്യന്റെ അത്യുച്ചരാശിയായ മേടം രാശി മുതലാണ്. അങ്ങനെ പുതുവര്‍ഷം മേടം ഒന്നിന് സംഭവിക്കുന്ന സമരാത്രദിനമായ വിഷുവിലായിരുന്നു. മലയാളഗണതിജ്ഞര്‍ സൂര്യദേവന്റെ സ്വക്ഷേത്രരാശിയായ ചിങ്ങത്തെ ഒന്നാം മാസമായി സ്വീകരിച്ചു. കൊല്ലവും വര്‍ഷവും ഒരേ അര്‍ത്ഥമുള്ള വാക്കുകളാണെങ്കിലും കൊല്ലം എന്ന സ്ഥലനാമവുമായി ബന്ധപ്പെട്ടാണ് കൊല്ലവര്‍ഷം ഉണ്ടായത്.
കൊല്ലം നഗരം സ്ഥാപിച്ചതിന്റെ ഓര്‍മ്മയായും, വേണാടിന്റെ തലസ്ഥാനം കൊല്ലം ആക്കിയതിന്റെ ഓര്‍മ്മക്കുമായാണ് കൊല്ലവര്‍ഷം ഉണ്ടായതെന്ന് അനുമാനിക്കപ്പെടുന്നു. 28 മുതല്‍ 32 വരെ ദിവസങ്ങളുള്ള പന്ത്രണ്ട് മാസങ്ങള്‍ കൊല്ലവര്‍ഷത്തിനുണ്ട്. ഭൂമി സഞ്ചരിക്കുന്ന ഓരോ രാശികളേയുമാണ് മാസങ്ങളായി അടയാളപ്പെടുത്തിയത്. സൂര്യന്‍ ഉത്തരായനത്തില്‍ ഭൂമിയില്‍ നിന്ന് കാണുന്ന സമയം 30 ഡിഗ്രി സൂര്യനെ ചുറ്റുവാന്‍ കൂടുതല്‍ സമയം വേണ്ടതിനാല്‍ ആ മാസങ്ങള്‍ക്ക് ദീര്‍ഘദിനങ്ങളും, ദക്ഷിണായനകാലത്ത് ഹൃസ്വമാസങ്ങളും സംഭവിക്കുന്നു. അണ്ഡാകൃതിയിലുള്ള ഭൂമിയുടെ സഞ്ചാരപഥമാണ് ഇതിന് കാരണം. നാലു വര്‍ഷം കൂടുമ്പോള്‍ ഗ്രിഗോറിയന്‍ കലണ്ടറില്‍ ഫെബ്രുവരിക്ക് 29 ദിവസംവരുന്ന പ്രശ്‌നം കൊല്ലവര്‍ഷത്തിനില്ല. അയനചലനത്തില്‍ അധിവര്‍ഷം സ്വയം ക്രമപ്പെടുത്തുന്ന ശാസ്ത്രീയമായ ഗണനരീതിയാണ് കൊല്ലവര്‍ഷത്തില്‍ അവലംബിച്ചിട്ടുള്ളത്. കൊല്ലംവര്‍ഷം സ്വീകരിച്ചതിനാല്‍ മലയാളിക്ക് 1200 വര്‍ഷത്തിന്റെ സ്വച്ഛന്ദവും സുന്ദരവുമായ ചരിത്രം അഭിമാനത്തോടെ പറയാന്‍ സാധിക്കും.
മലയാളപഞ്ചാംഗത്തില്‍ സാധാരണ കലണ്ടറില്‍ കാണുന്ന വിശേഷദിനങ്ങള്‍ കൂടാതെ ലോകത്ത് ആചരിക്കുന്ന പ്രധാനദിനങ്ങള്‍, ക്ഷേത്രവിശേഷദിനങ്ങള്‍, വിവിധ മതപ്രാധാന്യ ദിനങ്ങള്‍ എന്നിവ ഉള്‍പ്പെടുത്തിയിരിക്കുന്നു. 25 വര്‍ഷമായി ബാലഗോകുലം കൊല്ലവര്‍ഷത്തെ കേന്ദ്രീകരിച്ച് ചിങ്ങം ഒന്നിന് മലയാളപഞ്ചംഗം പ്രസിദ്ധീകരിക്കുന്നു. 1201-ാമാണ്ട് ചിങ്ങം ഒന്നിന് അതായത് 2025 ആഗസ്റ്റ് 17 ന് മലയാള ഭാഷാദിനമായി ആചരിച്ചുകൊണ്ട് മലയാളപഞ്ചാംഗം പുതിയ വര്‍ഷത്തേക്ക് കടക്കുകയാണ്.ഞായറിന്റെ അഥവാ സൂര്യന്റെ വേളയായ ഞാറ്റുവേലകളിലെ കൃഷിമുറകള്‍, നവോത്ഥാനനായകരുടെയും ദേശീയ നേതാക്കളുടെയും ചിത്രങ്ങള്‍, കാര്‍ഷിക പഴഞ്ചൊല്ലുകള്‍, കാര്‍ഷിക പാരിസ്ഥിതിക സന്ദേശങ്ങള്‍, പ്രസക്തമായ വിശേഷദിവസങ്ങള്‍, സാംസ്‌കാരിക പ്രതീകങ്ങള്‍ എന്നിവ ഉള്‍പ്പെടുത്തിയിരിക്കുന്നു. എ.ഡി. 825-ല്‍ കൊല്ലത്ത് നിന്നും ആരംഭിച്ച കൊല്ലവര്‍ഷത്തെ ജനകീയമാക്കു
വാനും മലയാള സംഖ്യാലിപിയുടെ പ്രചാരണത്തിനും, കേരളത്തനിമയുടെ വീണ്ടെടുപ്പിനും ഒരു ജനകീയ മുന്നേറ്റം അനിവാര്യമാണ്. അതിനായി ഏവരുടെയും പരിശ്രമം ഉണ്ടാകുമെന്ന് കരുതുന്നു.
ജന്മഭൂമി ഓണ്‍ലൈന്‍