ഇന്‍ഡോര്‍: സാമ്പത്തികമായി പിന്നാക്കം നില്ക്കുന്നവര്‍ക്ക് ഏറ്റവും ചെലവ് കുറഞ്ഞ കാന്‍സര്‍ ചികിത്സയുമായി പുതിയ ആരോഗ്യ കേന്ദ്രത്തിന് തുടക്കമിട്ട് മാധവ് സൃഷ്ടി സേവാ സമിതി. പദ്ധതി ആരോഗ്യസേവയുടെ ഉത്തമ ഉദാഹരണമാണെന്ന് ആരോഗ്യ കേന്ദ്രം ഉദ്ഘാടനം ചെയ്ത ആര്‍എസ്എസ് സര്‍സംഘചാലക് ഡോ. മോഹന്‍ ഭാഗവത് പറഞ്ഞു. ഇത് നേരിട്ടുള്ള സേവനമാണ്. സമൂഹത്തിന്റെ സന്തോഷം തന്നെയാണ് സ്വന്തം സന്തോഷമെന്ന ധാര്‍മിക വിചാരമാണ് പദ്ധതിക്ക് പിന്നില്‍. രാജ്യത്ത് ആരോഗ്യ സേവന മേഖലയില്‍ നിരവധി മികച്ച മാതൃകകള്‍ ഉയര്‍ന്നുവരുന്നുണ്ട്.
സേവനം ചെലവുകുറഞ്ഞതും എളുപ്പമുള്ളതും ആയിരിക്കണമെന്ന് അദ്ദേഹം പറഞ്ഞു. വ്യത്യസ്ത ചികിത്സാ മാര്‍ഗങ്ങള്‍, വ്യത്യസ്ത അന്തരീക്ഷം, കാലാവസ്ഥാ വൈവിധ്യം എന്നിവയെ ആശ്രയിച്ചുള്ള ചികിത്സ ഉപയോഗപ്രദമാണ്. വ്യക്തിഗത സ്വഭാവത്തിനനുസരിച്ച് ‘കസ്റ്റമൈസ്ഡ്’ ചികിത്സാ സംവിധാനം ഈ പദ്ധതിയില്‍ ഉണ്ട്. ഇവിടെ ഒരേ മേല്‍ക്കൂരയ്‌ക്കു കീഴില്‍ എല്ലാ ചികിത്സകളും ലഭ്യമാണ്. തുടര്‍ച്ചയായ സേവനം ലഭ്യമാക്കുന്നത് അഭിനന്ദനാര്‍ഹമാണ്. നമ്മുടെ സേവനം സ്വീകരിക്കുന്നവര്‍, പിന്നീട് സേവനം നല്‍കുന്നവരായി മാറണമെന്ന് അദ്ദേഹം പറഞ്ഞു.
നാല് നിലയില്‍ ആരംഭിച്ച പുതിയ കേന്ദ്രം പ്രധാനമായും കാന്‍സര്‍ ചികിത്സയ്‌ക്കും വൈവിധ്യമാര്‍ന്ന പരമ്പരാഗത ചികിത്സാ രീതികള്‍ക്കുമായാണ് സമര്‍പ്പിച്ചിരിക്കുന്നത്. താഴത്തെ രണ്ട് നിലകളിലായി അത്യാധുനിക സൗകര്യങ്ങളോടെ കുറഞ്ഞ നിരക്കില്‍ കാന്‍സര്‍ ചികിത്സ നല്‍കും. പരിചയസമ്പന്നരായ ക്യാന്‍സര്‍ വിദഗ്ധരുടെ സംഘം, ഏറ്റവും പുതിയ ഉപകരണങ്ങളുടെയും രീതികളുടെയും സഹായത്തോടെ സേവനം നല്‍കും. ആദ്യഘട്ടത്തില്‍ കീമോതെറാപ്പി, സി.ടി. സ്‌കാന്‍ എന്നിവ ആരംഭിക്കും. ഉടന്‍ തന്നെ റേഡിയേഷന്‍ ചികിത്സയും തുടങ്ങും. ഇതിനായി അന്താരാഷ്‌ട്ര നിലവാരത്തിലുള്ള രണ്ടു ബങ്കറുകള്‍ തയ്യാറായിട്ടുണ്ട്. ഏറ്റവും പുതിയ സാങ്കേതിക വിദ്യയുള്ള ലൈനാക് മെഷീന്‍ ഉടന്‍ സ്ഥാപിക്കും. കാന്‍സര്‍ ചികിത്സയ്‌ക്കാവശ്യമായ എല്ലാ മരുന്നുകളും കുറഞ്ഞ നിരക്കില്‍ ഇവിടെ ലഭ്യമാകും. ഒരു നിലയില്‍ പ്രകൃതിചികിത്സാ കേന്ദ്രമാണുള്ളത്. സ്ത്രീകള്‍ക്കും പുരുഷന്മാര്‍ക്കും വേര്‍തിരിച്ച യൂണിറ്റുകളോടെ. ഇവിടെ ആയുര്‍വേദം, ഹോമിയോപ്പതി, യോഗ ചികിത്സ, ന്യൂറോതെറാപ്പി, ക്രയോതെറാപ്പി, പാലിയേറ്റീവ് കെയര്‍, അക്യുപംക്ചര്‍, അക്യുപ്രെഷര്‍ തുടങ്ങിയ മാര്‍ഗങ്ങള്‍, ആധുനിക ഉപകരണങ്ങളോടും പരിചയസമ്പന്നരായ ഡോക്ടര്‍മാരുടെ മേല്‍നോട്ടത്തോടും കൂടി ലഭ്യമാകും. വരും തലമുറയെ സംസ്‌കാരസമ്പന്നരാക്കി വളര്‍ത്തുന്നതിനായി ‘ഗര്‍ഭസംസ്‌കാര്‍ കേന്ദ്രം’ കൂടി സ്ഥാപിച്ചിട്ടുണ്ട്.
പരിപാടിയില്‍ സിംബയോടെക് ഫാര്‍മലാബ് ചെയര്‍മാന്‍ അനില്‍ സത്യാനി അധ്യക്ഷത വഹിച്ചു. ആര്‍എസ്എസ് മാള്‍വ പ്രാന്ത സംഘചാലക് പ്രകാശ് ശാസ്ത്രി, ശ്രീഗുരുജി സേവാ ട്രസ്റ്റിന്റെ അധ്യക്ഷന്‍ മുകേഷ് ഹജേല, സെക്രട്ടറി സന്ദീപ് ജമീന്ദാര്‍ എന്നിവര്‍ പങ്കെടുത്തു.
