കോതമംഗലം: ബേസില്‍ പറയുന്നു; മതം, അതു മാത്രമായിരുന്നു അവരുടെ പ്രശ്നം റമീസിനും അവരുടെ കുടുംബത്തിനും സോന മതം മാറണമെന്നതു മാത്രമായിരുന്നു ആവശ്യമെന്ന് സോനയുടെ സഹോദരന്‍ ബേസില്‍. മതം മാറണമെന്നാവശ്യപ്പെട്ട് അവനും (റമീസും) അവന്റെ കുടുംബവും സുഹൃത്തുക്കളും അവളെ പൂട്ടിയിട്ടു മര്‍ദിച്ചു. മതം മാറണമെന്നു പറഞ്ഞ് ഒരു കുടുംബം ഒരു പെണ്‍കുട്ടിയെ ഇങ്ങനെ പൂട്ടിയിട്ടു മര്‍ദിക്കുമോ. അവര്‍ക്കും കുട്ടികളില്ലേ.
ബേസിലിന്റെ വാക്കുകളില്‍ നിന്ന്: അച്ഛന്‍ മരിച്ച ശേഷമാണ് ഇവര്‍ (റമീസും വീട്ടുകാരും) വീട്ടില്‍ വരുന്നതും സോനയുടെ മതം മാറണമെന്നാവശ്യപ്പെട്ടപ്പോള്‍ തങ്ങള്‍ സമ്മതിച്ചതും. അച്ഛന്‍ മരിക്കും മുമ്പു വിവാഹം ആലോചിക്കാന്‍ വീട്ടില്‍ വരട്ടേയെന്ന് ഫോണില്‍ വിളിച്ചു ചോദിച്ചിരുന്നു പക്ഷേ അപ്പോള്‍ മതം മാറുന്ന കാര്യം പറഞ്ഞിരുന്നില്ല. മതം മാറണം, പൊന്നാനിയില്‍ രണ്ടു മാസം താമസിക്കണം എന്നൊക്കെ മരണ ശേഷമാണ് പറഞ്ഞത്. അച്ഛന്റെ ആണ്ടു കഴിഞ്ഞ് മതംമാറ്റമാകാമെന്നാണ് ഞങ്ങള്‍ പറഞ്ഞത്. അവരതു സമ്മതിച്ചു പോയതുമാണ്.
അതിനു ശേഷം റമീസിനെ ലോഡ്ജില്‍ നിന്ന് അനാശാസ്യത്തിനു പിടിച്ചപ്പോള്‍, ഇനി മതം മാറില്ലെന്ന് സോന അവന്റെ ഉമ്മയോടും വാപ്പയോടും പറഞ്ഞു. അവന്‍ എന്നോട് ഇത്ര വലിയ തെറ്റു ചെയ്തതിനാല്‍ ഞാന്‍ ഇനി മതം മാറുന്നില്ലെന്നാണ് അവള്‍ പറഞ്ഞത്. അപ്പോള്‍ അവരൊന്നും മിണ്ടിയില്ല. അവളോടു പറയുന്നതിലും ഞങ്ങളോടു പറയുന്നതിലും അവര്‍ക്കു മതം തന്നെയായിരുന്നു പ്രശ്നം. ഇല്ലെങ്കില്‍ പള്ളിയില്‍ നിന്ന് അവരെ പുറത്താക്കുമെന്നും പറഞ്ഞു. എന്നാല്‍, അവളുടെ ഇഷ്ടം പോലെ മതം മാറട്ടെയെന്ന് ഞാന്‍ പറഞ്ഞു. പിന്നീട് അവള്‍ മതം മാറില്ലെന്നു പറഞ്ഞത് ശരിക്കും അവരെ പ്രകോപിപ്പിച്ചു.
കൂട്ടുകാരിയുടെ വീട്ടില്‍ പോകുകയാണെന്നു പറഞ്ഞാണ് സോന വീട്ടില്‍ നിന്നു പോയത്. റമീസും മറ്റും അവിടെയെത്തി അടിമാലിയില്‍ വച്ചു തന്നെ രജിസ്റ്റര്‍ വിവാഹം ചെയ്യാമെന്നു പറഞ്ഞു. ഇതിനു കൂട്ടുകാരിയും അവരുടെ ഭര്‍ത്താവുമെല്ലാം ഏര്‍പ്പാടാക്കി. അപ്പോള്‍ ഇവര്‍ ഉമ്മയെയും വാപ്പയെയും ഫോണില്‍ വിളിച്ചു കുറെ നേരം സംസാരിച്ചു. അതു കഴിഞ്ഞ് നിലപാടു മാറി. നമുക്ക് ആലുവയില്‍ രജിസ്റ്റര്‍ ചെയ്യാമെന്നു പറഞ്ഞ് റമീസും കൂട്ടരും അവളെ വഞ്ചിച്ച് വിളിച്ചുകൊണ്ടുപോയി. അവിടെ അവരുടെ വീട്ടിലെത്തിച്ചു പൂട്ടിയിട്ട് റമീസും കുടുംബവും മതം മാറണമെന്നു പറഞ്ഞ് അവളെ മര്‍ദിച്ചു. മാനസികമായി ചൂഷണം ചെയ്തു. മതം മാറാന്‍ മാത്രം അത്രയും ചൂഷണം ചെയ്തതിനാലാണ് അവള്‍ ആത്മഹത്യ ചെയ്തത്. അവന്റെ ഉമ്മയും ക്രിസ്ത്യാനിയായിരുന്നു, മതം മാറിയതാണ്. ഇവരുടെ കുടുംബം തന്നെ ഇങ്ങനെ മതംമാറ്റിക്കൊണ്ടിരിക്കുകയാണെന്നാണ് എനിക്കു തോന്നുന്നത്.
നിര്‍ബന്ധിത മതംമാറ്റമാണ് ഇതിലെ പ്രധാന പ്രശ്നം. പൂട്ടിയിട്ടു മര്‍ദിക്കുമ്പോള്‍ ഉപ്പയുടെയും ഉമ്മയുടെയും കുടുംബങ്ങളുണ്ടായിരുന്നു.
