തിരുവനന്തപുരം: ഒരു നിയോജകമണ്ഡലത്തില്‍ പുതിയ വോട്ടര്‍മാരെ പട്ടികയില്‍ ചേര്‍ക്കുമ്പോള്‍ അവരുടെ വിവരങ്ങള്‍ മുന്‍പ് ഭാഗമായ മണ്ഡലത്തിലെ പട്ടികയില്‍ നിന്ന് നീക്കംചെയ്തെന്ന് ഉറപ്പാക്കണമെന്ന് മുഖ്യ തിരെഞ്ഞെടുപ്പ് ഓഫീസര്‍ കര്‍ക്കശ നിര്‍ദേശം നല്‍കി. വോട്ടര്‍ രജിസ്‌ട്രേഷന്‍ ഫോമുകള്‍ തിരഞ്ഞെടുപ്പ് കമ്മീഷന്റെ വെബ്‌സൈറ്റില്‍ ചേര്‍ക്കുന്ന പ്രവൃത്തികള്‍ ബി.എല്‍.ഒ.മാര്‍ ത്വരിതപ്പെടുത്തണം. വോട്ടര്‍ രജിസ്‌ട്രേഷന്‍ ഫോമുകള്‍ സമയബന്ധിതമായി തീര്‍പ്പാക്കാന്‍ ബി.എല്‍.ഒ സൂപ്പര്‍വൈസര്‍മാര്‍ക്ക് നിര്‍ദേശം നല്‍കണം. പ്രവര്‍ത്തനം കൃത്യമായി വിലയിരുത്തണം. തദ്ദേശ തിരഞ്ഞെടുപ്പുമായി ബന്ധപ്പെട്ട് ജില്ലാ കലക്ടറുടെ ചേംബറില്‍ ചേര്‍ന്ന യോഗത്തില്‍ അധ്യക്ഷനായ മുഖ്യ തിരെഞ്ഞെടുപ്പ് ഓഫീസര്‍ ഡോ. രത്തന്‍ യു ഖേല്‍ക്കര്‍ വോട്ടര്‍പട്ടിക പുതുക്കുന്നത് സംബന്ധിച്ച പ്രവൃത്തികള്‍ വേഗത്തിലാക്കാനും നിര്‍ദേശം നല്‍കി.
