തിരുവനന്തപുരം : വെഞ്ഞാറമൂട് സ്വദേശിയായ യുവാവിനെ സ്ത്രീയെന്ന വ്യാജേനെ ചാറ്റ് ചെയ്ത് കുടുക്കി കടത്തിക്കൊണ്ടുപോവുകയും സ്വര്ണാഭരണങ്ങള് കവര്ന്ന ശേഷം പാങ്ങോടിനടുത്തുള്ള സുമതി വളവില് ഉപേക്ഷിക്കുകയും ചെയ്ത പ്രതികള് അറസ്റ്റിലായി. മടത്തറ സ്വദേശി മുഹമ്മദ് സല്മാന് (19), കൊല്ലായില് സ്വദേശി സുധീര് (24), ചിതറ സ്വദേശി സജിത്ത് (18), കുളത്തൂപ്പുഴ സ്വദേശി ആഷിഖ് (19) എന്നിവരാണ് അറസ്റ്റിലായത്. ഡേറ്റിംഗ് ആപ്പ് വഴി സ്ത്രീയെന്ന വ്യാജേനെ സൗഹൃദം സ്ഥാപിച്ചശേഷം കാറിലെത്തി യുവാവിനെ കൂട്ടിക്കൊണ്ട് പോവുകയും മര്ദിച്ചും ഭീഷണിപ്പെടുത്തിയും നഗ്നനാക്കി ഫോട്ടോയെടുക്കുകയായിരുന്നു. തുടര്ന്ന് മൂന്ന് പവന്റെ സ്വര്ണമാല തട്ടിയെടുത്തശേഷം പാങ്ങോടിനടുത്ത് സുമതിവളവില് തള്ളിയിട്ടു. യുവാവ് നല്കിയ പരാതിയില് 48 മണിക്കൂറിനകം പ്രതികളെ പിടിക്കാന് പൊലീസിനു കഴിഞ്ഞു. ആഷിഖിനെ കുളത്തൂപ്പുഴ ഭാഗത്ത് നിന്ന് വെഞ്ഞാറമൂട് പൊലീസും മറ്റു പ്രതികളെ ആലപ്പുഴയിലെ ഹോട്ടലില് നിന്നും ആലപ്പുഴ പൊലീസുമാണ് പിടികൂടിയത്.
