കണ്ണൂര്: പ്രധാനമന്ത്രി നരേന്ദ്രമോദിക്കും ഏഴ് കേന്ദ്രമന്ത്രിമാര്ക്കും ഇത്തവണയും ഓണക്കോടി കണ്ണൂരില് നിന്ന്. കേരളം ഔദ്യോഗികമായി സമ്മാനിക്കുന്ന ഓണക്കോടി കൈത്തറി തുണിയില് കണ്ണൂര് മേലെചൊവ്വയിലെ ലോക്നാഥ് വിവേഴ്സാണ് നെയ്തെടുക്കുന്നത്.
കൈത്തറി ആന്ഡ് ടെക്സ്റ്റൈല് ഡയറക്ടറേറ്റിലെ ഉദ്യോഗസ്ഥസംഘം നേരിട്ടെത്തിയാണ് ഇതിന് നിര്ദേശം നല്കിയത്. പ്രധാനമന്ത്രിക്ക് വ്യത്യസ്ത നിറങ്ങളിലുളള രണ്ട് ഡിസൈനാണ് ഒരുക്കിയത്. ആഭ്യന്തരമന്ത്രി അമിത്ഷാ, പ്രതിരോധമന്ത്രി രാജ്നാഥ് സിങ്, കേന്ദ്ര ഗതാഗതമന്ത്രി നിതിന് ഗഡ്കരി തുടങ്ങി ഏഴ് മന്ത്രിമാര്ക്ക് ഒരോന്നും വീതമാണ്. ആകെ ഒമ്പത് തരത്തിലുള്ള ഡിസൈനുകളാണ് ലോക്നാഥ് വിവേഴ്സ് നെയ്തെടുത്തത്.
നിയോഗത്തില് വലിയ അഭിമാനവും സന്തോഷവുമുണ്ടെന്ന് ലോക്നാഥ് വിവേഴ്സ് അധികൃതര് പറഞ്ഞു. ആദ്യതവണ അവര് നല്കിയ ഡിസൈന് നെയ്തു കൊടുക്കുകയായിരുന്നു. ഇപ്പോള് നമ്മള് തന്നെയാണ് ഡിസൈനിങ്ങും നിര്വഹിക്കുന്നത്. ഇതിന് ഹാന്ഡ്ലൂമില് നിന്നും അംഗീകാരം വാങ്ങുകയാണ് ചെയ്യുന്നത്.
സാധാരണയായി പ്രധാനമന്ത്രിക്ക് മാത്രമാണ് ഓണക്കോടി ഒരുക്കിയിരുന്നത്. ഇത്തവണ ഏഴ് മന്ത്രിമാര്ക്ക് കൂടി ഒരുക്കാന് അവസരം കിട്ടിയെന്നും അധികൃതര് പറഞ്ഞു.
ഇരുപതു വര്ഷത്തോളം പ്രവൃത്തിപരിചയമുള്ള എളയാവൂര് സ്വദേശിനി കെ.വി. സഹജയാണ് തുണി നെയ്തെടുക്കുന്നത്. ടെന്ഷനുണ്ടായിരുന്നെങ്കിലും നല്ല രീതിയില് നെയ്തെടുക്കാന് സാധിച്ചെന്ന് സഹജ പറഞ്ഞു.
ഇന്ന് കണ്ണൂരില് നിന്നും തുണി തിരുവനന്തപുരത്തെത്തിച്ച് ഹാന്ഡെക്സ് തയ്യല് യൂണിറ്റില് കുര്ത്ത തുന്നും. തുടര്ന്ന് ഹാന്ഡെക്സ് അധികൃതര് നേരിട്ട് പ്രധാനമന്ത്രിയുടെ ഓഫീസിന് കൈമാറും.
