ന്യൂദല്ഹി: ചന്ദ്രയാന് 3ന്റെ വാര്ഷികദിനത്തില് ശുഭാംശുവിനെയും മറ്റ് നാല് ബഹിരാകാശ യാത്രികരെയും പ്രധാനമന്ത്രി നരേന്ദ്ര മോദി ആദരിക്കും. 2023ല് ചന്ദ്രയാന് 3 ചന്ദ്രന്റെ ദക്ഷിണധ്രുവത്തില് ലാന്ഡ് ചെയ്ത ചരിത്രപ്രസിദ്ധമായ ദിനമാണ് ദേശീയ ബഹിരാകാശ ദിനമായി ഭാരതം ആഗസ്ത് 23ന് ആചരിക്കുന്നത്.
ബഹിരാകാശ യാത്രികരായ പ്രശാന്ത് നായര്, അജിത് ക്യഷ്ണന്, അംഗദ് പ്രതാപ്, ശുഭാംശു ശുക്ല എന്നിവരെ പ്രധാനമന്ത്രി നരേന്ദ്ര മോദി കാണുമെന്നാണ് വിവരം. ന്യൂദല്ഹിയിലെ ഭാരത് മണ്ഡപത്തിലാണ് ചന്ദ്രയാന്റെ വാര്ഷികാഘോഷ ചടങ്ങുകള് നടക്കുന്നത്.
ആക്സിയം 4 ദൗത്യം പൂര്ത്തിയാക്കി മടങ്ങിയെത്തുന്ന ഗ്രൂപ്പ് ക്യാപ്റ്റന് ശുഭാംശു ശുക്ലയ്ക്കുള്ള സ്വീകരണച്ചടങ്ങു കൂടിയാണിത്. ജൂലൈ 15നാണ് 18 ദിവസം ഐഎസ്എസില് താമസിച്ച് ദൗത്യം പൂര്ത്തിയാക്കി സംഘം ഭൂമിയില് തിരിച്ചെത്തിയത്. ശുഭാംശുവിനോടൊപ്പം ബഹിരാകാശ യാത്രയ്ക്കുള്ള പരിശീലനം നേടിയവരാണ് മറ്റ് നാലു പേരും. ഇത് രണ്ടാം തവണയാണ് ദേശീയ ബഹിരാകാശ ദിനം രാജ്യത്ത് ആഘോഷിക്കാനൊരുങ്ങുന്നത്. ഒന്നാം വാര്ഷിക ചടങ്ങില് രാഷ്ട്രപതി ദ്രൗപദി മുര്മുവും പങ്കെടുത്തിരുന്നു.
