തിരുവനന്തപുരം: തദ്ദേശ സ്വയംഭരണ തെരഞ്ഞെടുപ്പില് പ്രകടനം മോശമാകുമെന്ന ഇടതുപക്ഷത്തിന്റെ ഉറച്ച ബോധ്യമാണ് തെരഞ്ഞെടുപ്പ് അട്ടിമറിക്കുന്ന പ്രവര്ത്തനങ്ങളിലേക്ക് അവരെ നയിക്കുന്നതെന്ന് ബിജെപി സംസ്ഥാന ജനറല് സെക്രട്ടറി അനൂപ് ആന്റണി വാര്ത്താസമ്മേളനത്തില് പറഞ്ഞു.
തദ്ദേശസ്വയംഭരണ തെരഞ്ഞെടുപ്പ് അട്ടിമറിക്കാന് ഇടതുപക്ഷ യൂണിയനിലെ ഉദ്യോഗസ്ഥരെ കൂട്ടുപിടിച്ച് ക്രമക്കേട് നടത്തി. കേരളത്തില് രണ്ടേമുക്കാല് ലക്ഷത്തിലധികം ഇരട്ട വോട്ടുകളുണ്ട്. അഞ്ച് ലക്ഷത്തിലധികം ക്രമക്കേടുകളുണ്ട്. തെരഞ്ഞെടുപ്പ് അട്ടിമറിക്കാന് കൂട്ടുനിന്ന ഉദ്യോഗസ്ഥര്ക്കെതിരെ ക്രമിനല് നടപടി സ്വീകരിക്കണമെന്നും അനൂപ് ആന്റണി ആവശ്യപ്പെട്ടു.
സംസ്ഥാന സര്ക്കാരിനെതിരെയും ഇടതുപക്ഷം ഭരിക്കുന്ന തദ്ദേശസ്വയംഭരണ സ്ഥാപനങ്ങള്ക്കെതിരെയുമുള്ള ഭരണവിരുദ്ധ വികാരം കൊണ്ട് തദ്ദേശസ്വയംഭരണ തെരഞ്ഞെടുപ്പില് മോശം പ്രകടനം നേരിടേണ്ടി വരുമെന്ന് ഇടതുപക്ഷം തിരിച്ചറിഞ്ഞിട്ടുണ്ട്. അതിന്റെ പശ്ചാത്തലത്തിലാണ് തെരഞ്ഞെടുപ്പ് അട്ടിമറിക്കാനുള്ള എല്ലാ നീക്കങ്ങളും നടത്തുന്നത്. വാര്ഡ് വിഭജനം മുതല് അതിനുള്ള ശ്രമങ്ങള് ആരംഭിച്ചു. അതുകൊണ്ടുമാത്രം ഒന്നും ആകില്ല എന്ന ബോധ്യം വന്നതുകൊണ്ടാണ് വോട്ടര് പട്ടികയിലും കൃത്രിമം കാണിക്കുന്നത്. സിസ്റ്റമാറ്റിക് ആയിട്ടുള്ള കൃത്രിമങ്ങളാണ് വോട്ടര് പട്ടികയില് കാണുന്നത്.
ഇടതുപക്ഷ യൂണിയനില്പ്പെട്ട സര്ക്കാര് ജീവനക്കാരെ ഉപയോഗിച്ചാണ് അട്ടിമറി നടത്തുന്നത്. ലക്ഷക്കണക്കിന് ആളുകള്ക്ക് തദ്ദേശസ്വയംഭരണ തെരഞ്ഞെടുപ്പിന്റെ വോട്ടര് പട്ടികയില് ഇരട്ട വോട്ടുണ്ട്. തെരഞ്ഞെടുപ്പിനെ അട്ടിമറിക്കുന്ന രീതിയിലാണ് ഈ സംഖ്യ. പഞ്ചായത്ത് തിരിച്ചുള്ള കണക്കുകള് ബിജെപി ശേഖരിച്ചിട്ടുണ്ട്, അത് പരിശോധിക്കുകയും ചെയ്തു.
തെരഞ്ഞെടുപ്പ് കമ്മിഷന് ഗൗരവമായി വിഷയത്തില് ഇടപെടണം. അടിയന്തരമായി നടപടി സ്വീകരിച്ച് ലക്ഷക്കണക്കിന് വരുന്ന ഇരട്ട വോട്ടുകള് കണ്ടെത്തി ഒഴിവാക്കണം. ഈ വിഷയത്തില് കൃത്യമായ അന്വേഷണം നടത്തണം. തിരുവനന്തപുരം കോര്പ്പറേഷന് അടക്കം മറ്റു പലയിടങ്ങളിലും ബിജെപി പരാതി നല്കിയിട്ടുണ്ട്. പരാതികള് തെരഞ്ഞെടുപ്പ് കമ്മിഷന് ഗൗരവമായി പരിഗണിച്ച് അന്വേഷണം നടത്തണമെന്നും അനൂപ് ആന്റണി ആവശ്യപ്പെട്ടു. തിരുവനന്തപുരം നഗരസഭയിലെ പല വാര്ഡുകളിലും അന്തിമ ഡീലിമിറ്റേഷന് സമയത്തുണ്ടായതിനേക്കാള് വളരെയധികം കൂടുതലാണ് വോട്ടര് പട്ടികയിലെ കണക്ക്. ഇത് യാദൃച്ഛികമായി സംഭവിച്ചതല്ല, ഗുരുതര വീഴ്ചയാണെന്ന് ബിജെപി സംസ്ഥാന സെക്രട്ടറി വി.വി. രാജേഷ് പറഞ്ഞു.
